Quelltext der Seite Gkl:text:kap27

== Das XXVII Capitel. == 

'''Wie Gargantuwal die zeit anlegt/ wann sich Regenwetter regt.''' 

(1) '''BEgab sichs dann/ daß das Wetter nicht getemperiert/''' vnfrisch/ truͤb '''vnnd tropffig war/ so bracht man die vormittagig zeit nach obgedachtem''' ordenlichen '''brauch zu:''' ''<<359>>'' '''On daß er weiter ein schoͤn hell Fewer anmachen ließ/ die betruͤbung/''' nibelung/ vnnd feule '''des luffts zuenderen''' vnd zuleuteren/ wie man etwann gantze Weckholterwaͤld/ die Pestilentzische Lufft zuuertreiben anzuͤnt/ vnd den gantzen Birneischen Rontzefall des Bergwercks halben/ auff Phaetontisch Gold drauß zuschmeltzen/ vn̄ wie jener Toͤringisch Jungherr die Scheur von wegē der grossen Maͤuß ansteckt. 

(2) '''Aber nach dem Mittagmal pflegen sie an statt jhrer''' gewonlichen Heuschrecklichē '''felduͤbung''' vnd Graßverram̄elung/ Spinnen vnd Schneckenmaͤsig '''zu Hauß zubleiben/''' oder inn der Statt vnnd naͤhe herumb zufahren. '''Vnd auff Apotherapische''' gesundheitpflegige '''manier''' in der Scheuren/ Tennen/ vnd dem vor vnd Hinderschopff '''etwas leibswaͤferung halben zuthun zusuchen: da banden sie Garben/''' schuͤtteten vnd warffen Korn/ wanneten das getreschte/ trug einer zwey Malter oder viertheyl Frucht auff beiden Achsseln/ vnd zwey zwischē beiden Armen/ halfen ein weil dem Vulcano schmiden/ wie der Hoͤrnen Seifrid/ der den Ampoß trey Klaffter inn die Erd schlug/ ruͤhrten Moͤrtel/ trugen vnd waltzten stein/ strigelten die Pferd/ '''hauetē Holtz/ trescheten/''' vnd anders. Dann sie waren nicht des Reigergeschlechts vnd Moͤnchischen glaubens jenes Malers/ der nur wans regnet spacieren gieng/ damit jn niemand auff der Gassen jrrt. Was soll diß Saugeschlecht/ die Regenwuͤrm? Sonder Fuͤrstenmaͤsig/ thaten wie die grosse Potentaten vnnd Regenten/ welche auff der Baͤrenhaut nicht zu verschim̄elen/ vnnd daß Armbrost ernstlicher anspannung bißweiln nachzulassen/ gemeinlich wan̄ jnen das jagen erleidet/ ein Handwerck oder sonst Geschaͤfft herfuͤr suchen/ Da haspelt der Sardanapal/ <357; recte 360> ''<<360>>'' Vespasian flechtet Baderhuͤtlin/ Augustus trehet Spindelboͤltz/ der ander glaset Aengster/ ''Carolus V.'' dichtet lebendige Vrwerck/ einer schleifft Scheren/ jener schmirt Stifel/ diser fegt Kisten/ etlich stricken Netzgarn/ Domitian zimmert Prettspil/ oder lehrt dantzen/ die Egyptischen Koͤnig bawen Pyramidische Todenbeinheußlein. Scipio Muckenheußlin auß Schneckenheusern. Der Schultheyß ladet Mist fuͤr kurtzweil/ daß man jhn fragen muß/ wer der Schultheiß sey/ Der Burgemeyster spitzt Federn vnd meßt auß/ Jener Algaͤuisch Vogt bricht Hanff oder spinnt/ Curius delbt Ruben/ andere weben/ etlich machen fingerbrillen/ viel erdencken weite Seckel vnd eng Kasten/ mancher Registriert das Mettenbuch/ Demetrius Koͤnig inn Asien spilt mit gulden wuͤrffeln/ die jm der Koͤnig Perses schicket/ der darnach an den Roͤmern gantz Asien inn einer schantz verspilt: der gut theil saufft mit Alexandro Magno: viel blendet die Schrifft/ darumb lesen vnd studierē sie des weniger/ sie moͤchten sonst Schreiber vnd Pfaffen werden/ etlich tretten den Einsidlern die Schuh auß vnnd flechten Koͤrb/ jener Spartanisch Koͤnig sticht den Zeußlin die augen auß/ Cyrus schneutzt die Baͤum/ Attalus giesset Puppendocken/ Seuerus hetzt Rephuͤner zusam̄: Agesilaus reut mit den Kindern auff dem Stecken herumb/ der Goͤrtzisch Graff schleifft mit den Buben auff dem Eiß: Keiser Varius suchet alle Spinnwepp inn der gantzen Statt Rom ab/ vnd laßt sie bei 10000. Pfunden wiegen: Keyser Henrich fangt Fincken/ Koͤnig Deiotarus schlaͤgt den Pferden ein/ oder bind den Geyssen den hinckenden Elenbogen. Koͤnig Coruinus bind Reben/ Keyser Antonius Pius eget: Diocletianus haͤllt den Pflug. Koͤnig Agamemnon setzt Maßholderbaͤum. Keyser ''<<361>>'' [[Bild:H_kap28_B Y4v.jpg|mini|Seidensticker]] Vespasian tauscht Maulesel/ Martius schmidt Harnisch. Affricanus setzt Oelbaͤum. Hercules setzt Eychen/ vnd pflaͤstert die Haͤfen/ Ptolomeus Auletes Pfeifft/ Maximilian steigt nach Gemsen: Nero schlegt auff der Cythar/ Epaminandas <?> singt darzu: dann was die Fuͤrsten geigen/ das muͤssen die Vnterthanen dantzen. Koͤnig Wilhelm Vischart inn Normandy bindet vnd windet die Segelseyl/ Europus bawet Laternen. Die Schwedisch Koͤnig giessen Kannen vnd pletzen Pfannen/ die Portugalischen Koͤnig schuͤtteln nicht wie Keyser Pertinax den Pfeffer Sack: sondern laden gantz Pfefferschiff auß/ die Parthische Koͤnig <spitzen> Nadeln. Der jung Dionys legt ein/ Demetrius wird ein Schwerdfeger/ wie auch gemeinlich die alte Teutsche Koͤnig: Daher heissen sie so gern Kuͤndegen/ Degenbrecht/ Degenhart/ Degenward/ vnd Reckdendegen: vnd die Castilischen Spanier/ der Schwaben Bastart/ ''Diego.'' Vnnd hierumb ist auch jener vnschuldig Poet zuentschuldigen/ der des Keysers Maximilians/ ''<<362>>'' Hochloͤblichster gedechtnuß/ Demut auß seiner Rhetorick nicht anders zuloben wußt/ als daß er setzt/ Er hab seinen Pantzer geflickt vnnd den Harnisch gefegt: Hats villeicht bey dem Homero gelehrnt/ der lobt seinen Vlyssem/ daß er sein Schiff bletz. Ja es lehrt die Fraw wol das Netz bletzen/ wann der Meister nicht zu Hauß ist. 

(3) Nun disen angleichungen hoher Leut/ folgt auch vnser Discipel Gargantzumal/ wan jm das Regenwetter den Paß auff dem Feld verlegt: doch mit gutem Raht seins Preceptors '''uͤbet''' er '''sich inn''' wolgegruͤndeten zierlichen '''Kuͤnsten/ als mit malen/''' schnitzen/ schnetzeln/ Wachsbossieren/ schindelgebeuvisieren/ Papirenschiff formiren/ eingraben/ Kupfferstechē/ etzen/ formen|schneiden/ entwerffen| <entwerffen/> abreissen/ Land vnnd Staͤtt inn grund legen/ Festungen stellen vnd auffreissen/ '''Bildhauen/''' außstreichen <außstreichen/> jlluminieren. '''Oder bracht die alt weiß mit dem''' Schach vnd '''Prettspiel auff die ban/ wie Leonicus dauō geschribē/ vnd vnser gut freund hat Lascaris <Lascaris hat> getriben: Vnd''' solches nicht on nutz/ dann '''vnter dem spielen kamen jnen zu sinn die alte Scribenten/ die dauon meldung gethan/ vnnd Gleichnussen darauß''' zu nutz '''gezogen haben.''' 

(4) '''Oder sie giengen''' auß/ oder fuhren herumb etliche kuͤnstliche Werck vnd fuͤnd '''zubeschawen/ wie man die Metall''' extrahirt vnd soluirt/ scheidet vnd '''auß ziehet: die Alchemisten/''' wie sie calcinieren/ reuerberiren/ cimentiren/ sublimiren/ fixiren/ putreficirn/ circulirn/ ascrudirn/ lauiren/ imbibiren/ cohobiren/ coaguliren/ tingiren/ transmutiren/ laminiren/ stratificiren/ den Koͤnig suchen/ den Geist/ den ''lapidem philosophorum,'' den Mann beim Weib/ den entloffenen Mercurium/ vnd ''per omnes species'' gradiren/ es seien Metall/ ''gemmae,'' Mineralien/ ''<<363>>'' kraͤuter/ saͤfft/ ''olea, salia, liquores,'' oder anders: Jtem wie man falsche Perlein/ Edelgestein vnd Corallen mach: dann auß dem mißbrauch lehrt man den rechtē brauch: der mißbrauch ist aller guter braͤuch rost/ der sich stets an haͤngt: also dz auch einer schreibet/ ''Superstitiones'' seien ''Religionis Rubigines.'' Jtem sie '''besuchten die Muͤntzbraͤger/''' die newen Thalertrucker/ '''die Jubilierer/ Gesteinbalierer/''' Steinmetzen/ Goldschmid/ Goldarbeiter/ Steingruben/ Guckesbergwerck/ fuhren ein in die Gaͤng/ schecht/ stollen/ vnd geschick/ sahen schuͤrffen/ weschen/ roͤsten/ quetschen/ zermalmen/ raͤden/ schroten/ Marscheiden/ Wuͤnschelruten/ Masen/ Bauchen/ Bauchstempffeln/ Durchwerffen/ Durchschlagen/ Durchlassen/ Troffteren/ Stampffen/ Graubstreichen/ Stempffen/ Seiffen/ Radschlagen/ Spleissen/ Schlackenschlagen/ Steinabziehen/ Doͤrren/ Dornziehen. Auch den Hawerzeug vn̄ sonst Jnstrument/ Aertztroͤge/ Bergtroͤg/ Wasserseyg/ Haͤspel/ Spillscheibē/ Kampffreder/ Gebell/ Schwengreder/ das Heintzenseyl/ den hoͤltzen Heine/ den Heintzen/ die Roßkunst mit der BremScheib/ das KehrRad/ die Pauchtroͤg/ Saͤckschleiffen/ Saumhund/ Sauseck/ Schlaffkarren/ Pompenzoͤg/ Mangelrad mit wasserkannen/ Haspelpompen/ Wasserwerck zur kunst/ Schemelpompen/ Jochergebew/ Ventilpompen/ Scherpompen/ Hundzeug/ Kimpompen/ Schauffelpompen/ vnderlegt Pompen/ Troghespel/ viel gerinnpompen/ Klammerpompen/ Taschenpompen/ Taschenhespel/ Trettpompen/ Hengsitzerpomp/ Windfeng/ Wettergezeug/ Windfaß/ Fluͤgelfeng/ Windschecht/ Windstangen/ Balgfeng/ Haspelfeng/ Windschoͤpffen/ Leilachfochtern/ Probiroͤfen/ Malmuͤlen/ Bereitstuben/ Lautertroͤg/ Schlem̄graͤben/ Bauchgraͤben/ Sigertroͤg/ Gold''<<361; recte 364>>''schlichen/ Schmeltzoͤfen/ Windoͤfen/ Kupfferbrechen/ Eisenziegel/ Doͤrroͤfen/ Deßgleichen ferrner die Saltzbornen/ Salpetersud/ Alaunsud/ Kupfferwasserscheid/ '''das Geschuͤtz giessen/''' die Zeugheuser/ die Antiquiteten/ die Friburgisch Cristallenmuͤl/ die Hamer oder Eisenschmidt/ die Buͤchenschmid/ <Buͤchssenschmid/> dz Arckenal/ die Festungē/ Wassergebew/ new Muͤlwerck von Gewichtmuͤlē/ Wagenmuͤlen/ Eselsmuͤlen/ Wurtzmuͤlen/ Vrwerck/ den Schatz zu Sanct Dionyß/ die Englische Docken an Baͤren vn̄ Bollē uͤben/ Schiffzimmern/ Ruͤstkammer/ '''Thuchferber/ Seidenstricker/''' Sammatwepp/ Organisten/ Lautenmacher/ Pfeiffentreher/ Musirer/ Damascanirer/ Weinbrennen/ Birbrawē/ Weinfewren/ Bronnkammern/ Seyffensieden/ Steinbrechen/ Eisenschmid/ '''Taͤppichwircker/''' Schuͤßgrabē/ Schuͤtzenmatten/ Seiden machē/ Brotsparkunst/ Weinsparkunst/ aber nicht Wasser Sparkunst/ es sey dan̄ auff Brisach/ Dantzigische Fuͤrnißsieder/ Farbensieden: Goldschlagent gemalen Gold: Jnn Leymen farbenbrennen/ springende Bronnen/ Quellen/ Saltzpfannen/ Glaßhuͤtten/ Schreiner eingelegt arbeit/ Contrafeiten/ Steingraben/ Rotschmid/ frembde Pferd Kuppeln/ Schmeltzhuͤtten/ Ofenkunst/ Holtzsparkunst/ Bibliothecken/ Kloͤster/ Spitaͤl/ Feldsichenhauß/ Baͤder/ Paliermuͤlen/ Moͤntzstempffel Muͤlen/ Seidenmuͤlen/ Roßmuͤlen/ Puluermuͤlen/ Zehenraͤdermuͤlen/ die Muͤlartzt/ '''Truckereien/''' Kupffertrucken/ Schrifftgiesser/ '''Vrenmacher/ vnd etcetera die gantz Kuͤnstlerzunfft/''' zogen von einer zu der andern/ '''schenckten Trinckgelt vnd etlich maß Wein/''' da war man williger dann willig: '''da forscheten/ ergruͤndeten/ vnnd ersinnten sie eines jeden Kunstfertigkeit/ fund vnnd grund:''' ''<<362; recte 365>>'' vnd gerawet sie keine zeit/ die sie damit zubrachten/ wie Sant Augustin/ da er einer Spinn ein halbe stund hett zugesehen. 

(5) '''Ferner giengen sie publicas Lectiones zuhoͤren/ die Solen Actus''' mit jhrer gegenwart zuehren/ zu den Doctormalen/ Magistrirungen/ Promotionen/ Gradationen/ Degradationen/ Disputationen/ Quotlibetē/ Comoͤdien/ Anatomien/ außfahrten/ Hochzeiten/ Daͤntzen/ Kirchweihen/ auff die Buͤrst/ aufs Rahthauß/ fuͤrs Gericht/ zur Audientz| <Audientz/> die Bescheid ablesen zuhoͤren/ vnterm freyen Himmel inn die Acht thun sehen/ zur ''Curia Rotae,'' zu Parlementen/ '''vnnd den gantzen Proceß''' zu sampt des Knausten Gerichtlichem Feurzeug zuuͤben: '''auch die Predigt/''' die Vesper/ Complet/ die gemeyne Herbergen/ Zuͤnfft/ Gaffel/ Stuben/ Thuͤrn/ Dum̄hoͤff/ die Rot Kammer/ die brennend Kammer/ inn die Senisch Academy ''à l'intronato,'' Fronleichnamsproceß/ Fastenbuß/ Cellenfahrten/ Refenterschlampen/ vnd wa kurtzumb etwas zusehen stund. 

(6) '''Oder vnser Cyrogargantua besucht die Fechtschulen vnnd Fechtboͤden/ da that er sein Schulrecht/''' hub auff/ gieng ein mit Dusacken/ darinn Blei gegossen war/ im Bogen/ im geschlossenen vnnd einfachen sturtz/ legert sich inn die Bastei/ erzeygt sich inn allen Ritterlichen Wehren/ wie sie vor Augen lagen/ im Schwerd/ Messer/ Spieß/ Stangen/ Staͤnglin/ Tolchen/ Hallenbart/ Rapier/ Paratschwerd/ Lederen Tusacken zum Platzmachen/ Straͤußt sich wider die Marxbruͤder/ die Franckfortische Meyster des langen Schwerdts/ schrib mit Dinten/ so sicht wie Blut/ die Feder mußt jhm oben schweben/ vnd solt es kosten sein junges Leben/ er wagts inn ''<<366>>'' Gotts Macht/ schlug drauff daß der Beltz kracht/ focht vmb die hoͤchst Blutrur/ vmb das Kraͤntzlin/ vmb die Schul/ ein Glaß mit Wein/ wie es der Gesell an jhn begert/ trocken oder naß/ scharff oder stumpff/ nackend oder bloß/ braucht vor dem Man Hildenbrantsstreich/ siben klaffter inn die Erd/ braucht des Ecken eckhaw/ des Laurins Zwerckzug/ Fasolts blindhaw/ den ober vnd vnterhaw/ mittel vnd fluͤgelhaw/ im tritt/ mit kurtzer vnnd langer schneid/ knopf/ ort/ einlauff/ gemaͤchstoß/ beinbruch/ armbruͤch/ fingerbruͤch/ gesellenstoͤß/ mordstoͤß/ Gesichtstich/ waren alle erlaubt/ denen die sie brauchē konten: dann ''Dolus'' an ''Virtus ^&c.'' den Zornhaw/ krumhaw/ schillerhaw/ scheitelerhaw/ wunder versatzung/ nachreisen/ vberlauff/ durchwechssel/ hengen/ anbinden/ stich im winden abschneiden/ schlug sie auß den vier Legern erstes eingangs/ auß alber/ tag/ Ochs vnd Pflug/ het sein Gemerck auff die vier bloͤse/ schwaͤche vnd stercke/ abnemmen vnnd außnemmen/ verweisen/ durchhawen/ verfuͤrhaw/ den Tuͤrckischen zug/ treiben/ rad/ etc. ohn den Vatterstreich/ welchen der Schmidlein inn seinen Fechtschulpredigten weißt/ vnnd des Bauren Speichelhaw. 

(7) '''Jtem an statt des vmbmeyens''' im Garten/ '''pflegten sie heimzubesuchen die Specereilaͤden/ Wurtzkraͤm/''' Balbierstuben/ des Geßners Gaͤrten/ die Wasserbrenner/ Krautnirer/ Puluerkremer/ Simplicisten/ Kaͤlberaͤrtzt/ Bader/ Platerscherer/ Steinschneider/ Wundaͤrtzt/ '''Apotecker:''' besah/ beroch/ betastet/ versuchet/ schmacket/ rib/ vn̄ '''betrachtet''' jhr materien/ '''Frucht/ Wurtzeln/ Pletter/ Gum̄i/ Samen/''' Safft/ '''Salben''' vnd Schmer/ so eigentlich als wern sie von Gwalter Reiffen von Straßburg/ vnd Meister Lisset Benancio darzu bestelt: vnnd ''<<367>>'' namen war mit was betrug vnnd beschiß dise Elementsbetheurer/ Saffranirer/ Chrisostometaͤflin/ Latwergen verguͤlder/ Wurtzelbeytzer/ vnnd Tranckferber/ vmbgehn: wie nach jhrer Quidproquockitet/ Merdapromuscitet vnd Pfeffersecklichkeit sie alles was inn Menschlichen leib kommen soll/ verketzern/ verehbrechen/ verstŭmpeln/ vergruͤmpeln vnnd verhuͤmpelen/ Landkremerei mit Spanischen Pfeffer treiben/ Gerbelirpfeffer vnder guten Pfiffer <Pfeffer> mischen/ Rumpff vnder Moscatnuß/ Weingebeitzt Schwertwurtzel vnder Galange/ gedoͤrrt Weißbrot vnder Speißwurtz/ Fusci vn̄ gedoͤrrt Holtz vnder Saffran/ Leimen vnder Jmber/ Gummi vnder Zuckerkandel: abgangen/ verlegen/ vermischmescht/ verrochen/ versaurt spaͤnen vnnd Spinnenwerck/ gedruͤß vnnd gemuͤß/ gehackt Stro vnnd staub inn gemalten Buͤchssen vn̄ Laden fuͤr Arabische vnnd Jndische wehrschafft haben (darumb gab disen Quinquo brockern auch Eulenspiegel zu Moͤllen jhr Gespick treuwlich wider/ den kat fuͤr den wust) ein Gurgelwasser vnnd Recept von dreyen gemeinen wurtzel Epfich/ Fenchel vnnd Wegwart fuͤr ein gulden/ was sie von Vnschlit/ Seiff/ Wachs/ Zucker/ Honig/ oͤl/ Ertz vnnd Metal bey kauffmansgewicht einkauffen/ bey Medicischem gewicht/ da vier vntzē ein pfund thun/ außwigen: mit jhren ''totus Modus regitur in minis,'' vnnd ''Luminarijs'' ins grab leuchten: die freigabe der Natur/ Erd vnd Wasser theur verkaufen/ einer Teuffelsgerittenen wurtzeltelberin/ Segensprecherin/ vnnd abgeribenen Krautgraserin Authentischen glauben/ wie den Sibyllen geben: halten ding die sich minder als der Welsch wein vber jar halten lassen/ darumb muß es verfaulen/ das die Glaͤser zerspringen: nemmen Recept anzumachen/ ''<<365; recte 368>>'' deren materien sie nicht halb haben/ darumb muͤsen sie ''quid pro quisieren'' vn̄ ''Merda'' promuscisirē/ Teuffelsmilch fuͤr Reubarbar reichen/ boͤß Granaten fuͤr ''Malorum Granatorum,'' Clistir von heisser Suppenbruͤ/ Galloͤpffel fuͤr Myrobalan/ ''succum tithymalli'' fuͤr ''Diagrodium,'' Kirsengommi fuͤr Arabischen gummi/ Kerigmus fuͤr Alckermes/ aͤnis vn̄ Maͤußtreck fuͤr Garamantischen Pfeffer/ gebrant Hundszaͤn/ vnnd weiß Kiselstein fuͤr Elephantenzaͤn vnd Spodium/ gestossen Glaß fuͤr Electuari de gemmis/ Wild rauten fuͤr Zigerkraut: vnd anders vnzalichs/ welches Gargantua alles erfaren wolt: auch wie sie distilieren/ daß es nach siben Bruͤdern schmackt/ ziecht der Acht voran: wie sie die Fluͤß des Seckels an sich ziehen/ wie die Sonn das Wasser: wie sie Capaunen essen/ vnnd geben den Krancken die Bruͤ: wie sie/ die Kunst zuuerbergen/ alles bey nacht/ oder im Hinderhauß bereyten: Vnnd als dann sagen/ ''pereat qui pereat,'' der Tod kein zorn nit hat. Hey wie fruͤ jr liebe Sirupmaͤnlin/ jr Clisterisisten/ Sackpfeiffer vnnd Atham verkauffer/ wie habt jhr so schoͤne geschwollen Backen <Backen.> Ach daß jhr euwer lebenlang muͤßten Diebsaugen fuͤr oculorum populi essen/ vnnd die Kaͤfer ohn fluͤgel/ daß euchs hertz abstoß/ so gibts euch auch ein krafft. O jr Leuß vnd Leutfresser/ jhr Saffranirer/ Pulueristen vnnd Zuckeristen/ jr verzuckerte Honigmaͤuler/ wer wird euch von euwerem alten Adam bringen/ gewiß noch die Puluermuͤl. Jr Proquokisten seit nach Lissets meinung nicht werd/ daß jhr Kolen vmbtraget/ noch gebletzt Schuh vnd abgetragene Schuluͤmmel außschreyet/ oder geferbt Huͤtlin vnd gebrochen Glaͤser außruffet. Aber Kundlob von Hohen Rhumsteig sagt/ es wer schad vmb euwer kuͤnstliche hand/ welche so herrlich im Klingelstein ''<<369>>'' Metten vnnd Wetterleuten kan: es seyen noch etlich feine Moͤrselstempffel vnd' euch/ welchē das Faßbinderisch punperlepump wol von Hand gehet: auch feine scharpffe Scharnuͤtzel koͤpfflin/ welche die Gordische knoͤpfflin maͤchtig sauber an die wurtzbrieff vn̄ Sambenitenhuͤt schraubē: auch es so meisterlich mit dem Maul/ sampt dem Weberknoff einbinden vnd winden/ daß es wenig Fadem kostet. Derhalben meint er/ wann euch schon Silui vnd Champier verjagten/ weren jhr zu eim Pasteten oder Pestenbeck dannoch nit verdorben. Dan graben mag ich nicht/ betteln schaͤm ich mich. 

(8) Warlich diser Bettelschamischer Mammonischer Schaffner/ ist ein warer Sam der Welschen Practic/ de tri vnnd Wechsselrechenung der vortheyligen spitzigen griflin/ der hat die Kauffmaͤnnische Beutelzauser vnnd Geltmauser/ die Genuesische/ Florentzische vnnd Venedisch Buchhaltung gelehret/ vnnd wie man die Handtwerck soll vertrucken: Fretten vnnd spoͤtten/ an/ vor vnnd hinderkauffen: Blutwucheren/ vnderm Wucherhuͤtlein spilen/ die Muͤntz verwechsselen/ vmbschlagen: außlesen: beschneiden: befeyhelen: mehr nemmen dann geben: Drey Leiptziger Maͤrck vnd ein Franckforter Meß jeden fuͤnff vom hundert gibt auch 20. O Neschehbeisser/ Tarbit/ Diebraht/ Koirtmeister auß Hellenengelland: O Regenspurgischer Mosche/ der sagt/ wo ich wone/ daselbst sind die Hirten nicht theur/ O Ribbis: ''Vsurupinae, Corrosuren:'' Wachenwucherer: Zeitverkaͤuffer: Zeitfinantzer: die theurer verborgen dann vmb bereit Gelt geben: Geitzaugen/ im Sack verkauffen/ Schade Loth/ Waarbefeuchtiger/ Wollnetzer <Wollnetzer/> Jngwerbeschwerer: Farbenaͤnderer: oben das huͤpsch/ vnden das aͤrgst: ''<<370>>'' Ja oben vnnd vnden huͤpsch/ vnnd inn der mitten der aͤrgst/ da heißts nicht ''in medio consistit Virtus,'' wie der Teuffel zwischen zweyen alten Weibern: Jtem verfinsterer vnnd verhencker der Gewaͤlb vnd Gaͤden zum augen verblenden: dise wird Bodinus gewißlich auch vnder die Zaubergeschlecht rechnen/ weil er der Augenblender vnnd Vergauckler keyn gnad will haben: Jtem Elenzucker/ meßschuͤrtzer/ da vns des messen theurer als bey den Pfaffen ankommet/ also heißts/ auß dem befuͤrtzen kommen ins bescheissen: Zahlverwerffer: Gewichtfaͤlscher: Eisern werden: Bubenfreiheitsucher: da billicher vor dem Thor das Galgengericht jr Freithoff vnnd Kirchoff were: Ja laß mich ledig des dritten Pfennings/ so zahl ich das vberig: O Quinquernellisten: Wahrvermenger/ Blindenkauffgeber: Stulreuber/ die darnach die Strauchdieb vnnd Strassenraͤuber muͤssen streckē/ damit der Schelm den dieb straffe. ''O Campsortes Banquarij,'' Muͤntzwescher/ Muͤntzwelsche/ Muͤntzfelscher/ Muͤntzschmeltzer/ jr werd des Contrabantz nicht Reicher/ der Teuffel hol dann den letzten. Etwann feurt man die Heyligen/ vnnd verbrannt die/ so die gemein Muͤntz entheyligten/ jetzund Feurt man die gemeynes Nutzes entheyliger/ vnnd tregt sie schier auff den Henden/ vnnd verbrennt dargegen die Heyligen. O Muͤntzringerer/ Muͤntz schwecher/ Muͤntzabgieser/ muͤntzaufzieher/ muͤntz Contrafeiter/ O wie wird man euch fŭr zerschrickte Ziesalien oder Pagament im Hoͤllchimischen SchmeltzDigel granuliern/ als wann man euch vber Baͤsem|reiß schuͤß: Ja diesen Diebischen grempel wissen auch wol die/ so Sperber auff der Hand tragen/ damit sie nur des Sebastians Francken Adler war machen/ das krumbschnaͤbel muͤssen geraubt ha''<<371>>''ben. Ach wo bleiben die Thurnierarticul? mancher schilt heut einen ein Pfeffer Sack/ der eben an dem bein hinckt/ manchem wehrts nur des <das> ''Posse,'' das ''Velle'' wer genug da. Jhr koͤndt das dienst oder Gnadengelt zu der gelihenē Hauptsum̄ schlagen: Aber was gwint jhr mit euwern einreuten vnnd leisten/ Fuͤrsten bleiben Fuͤrsten/ wann jhr schon die Kacheloͤfen einschlegt/ vnd den Pferden Zuckererbes inn den Roßbaren schuͤtt: die Witwen vnnd Weisen/ die jhr verderbt/ werden genug Raach vber euch schreien/ alsdann nemm euch der Teuffel zum Giselpfand: Der moͤcht euch auff kein Rad Malen/ vn̄ an die Kackē hefften/ sonder euch gar auffs Rad den Rechten einsatz vnd das widergelt geben/ auff eitel Longins Judenspiessen: da huͤtet euch jhr Herrn/ welche gelbberingelte vnnd vngberingelte Juden den Vnderthanen zuschaden ziehet. Leut die man im Ellend solt behalten/ den huͤlfft man zu Reichthumb von aller heyden Hemdath der Goym/ muͤssen als die Herrn dienen/ vnnd solche dieb muͤsig ziehen/ als wann ein Haußvatter ein pockechte Hur im Hauß ziecht/ die jhm sein Soͤn vn̄ gesind vergifftet. Ja versprech mir mein wahr/ daß deiner des theurer ohn werdest: Verkauff mir die Frucht auff auffschlag: Ley mir auff die saat: deins abwesserens vnd abreissens bedarff der Muͤller Herrgot: Jch leih den Leuten drumb kein gelt/ das sie bey mir malē solln/ Ey thu jm ein vererung/ so laßt er dir das Gelt lenger: Jch laß mich nicht ehe zahlen/ die Muͤntz aͤndere sich dann: die loß Muͤntz muß man eim studenten/ oder Landsknecht/ oder eim der hinweg ziecht anhencken: ich muß mein dienst deß hoͤher anschlagen: O Schadewacht/ Leg mir lieber schloffen: Jst dann dein gelt Hasenart/ welche zugleich geberen/ andere juͤn''<<369; recte 372>>''ger auffziehen/ vnnd sich wider belauffen/ so hetz dich der Lucifer. Auß diesem sind viel andere gute Boͤßlin entstanden/ als daß man Fremde Pracht <vnnd> leichtfertigkeit hat eingefŭhrt/ vnd wie Cæsar sagt| <sagt/> mit der Wahr auch die gefar der Laster gar/ die Seidenspinnwep/ die zufuhr dein <dem> Feind Wehr vnd Wafen/ das Moͤntzgerberliren/ das PostPapir wigen/ steigern/ auffnem̄en/ anloͤsen: weinjudentzen/ kornratten/ mit den Protmaͤusen maͤhlgrempelen. Ja/ ich behalt mein Frucht biß Sanct Gregor auff eim Falben Hengst daher Reut: Hui Teuffel schlag dem Faß den Boden auß/ vnnd schliff inns Korn vnnd fahr zum Tachfenster auß: O jhr getauffte Juden/ vnnd elementsbodenlose ertzhertzen vnnd Landratzioner/ gelt der Reimenweiß Eulenspiegel kan euch Schimpffsweiß im lxx. Capitel fein treffen/ mit den steinenen Stulraͤubern: Darumb prechen euch auch die Stuͤl/ weil jhr so gar schwer steinen seit/ wann schon euwer Haͤuser/ vom Plutschweiß gemoͤrtelte starcke Pfeyler haben: Was achts er/ wann jhr schon Gelt auff lehen leihet/ daß jhr Jungherrn seyet: Vnnd die Seel inn die Kist pfrengen/ vnnd das gewissen vber die Oberthuͤr an Nagel hengen/ vnnd nit glaubet daß ein Kerleß im andern steck: Jr werd mir kein Katz im Sack verkauffen/ wann jhr schon zu Linsen vnd Bonen seyt gewesen: Scheisset all inn Prei/ sagt Glockengieserhaͤnßlein zu Noͤrnberg. 

(10) '''Folgends gieng er auch hin/ die''' Lugenpriviligirte '''wortbeutelige Landfarer/''' alte weiber Clistirer: Coloquintenpurgatzer: wurmsamenkraͤmer: '''Triackerslapper:''' Schlangenbeschwerer: Starenstecher: Zanprecher: knabsack vnnd Marcktloͤtschē mit dem Englischen verstand fuͤr die langweil '''zuhoͤren/ wie schoͤn jhnen der schwatz anstehet/''' wie ''<<370; recte 373>>'' vngelacht vnnd ohn zungenstoͤlpern sie die grobsten luͤgen außstossen/ daß sie dē Teuffel soltē lachen machen: wie ab gefuͤhrt sie die Leut vbertoͤlpelē/ besefelē/ vn̄ jnen das Pludermuß vnd wurmsamēkat auff Zigeinerisch eingauckelen vn̄ den Seckelsamē außgauckelē: '''fůrnemlich gefulē jm die auß dē Quatland: Dan von''' Erbsuͤndiger '''natur sind sie''' nebē jhrem quacksalbē/ '''herliche gute Bossenreisser:''' Kuntzējaͤger: Miesterhaͤmerlin vn̄ Roßtreckgauckeler: gute Selaͤrtzt/ die mit Scamoni vnnd Nießwurtz eim die Seel außpurgieren/ Hola herbey/ zu vnserem Prey: Kaufft in der noht: so habt jhrs im tod/ ein wurtzel inn dem mund: so ist er gesund: hie rauch Bibergeil vnnd Frauwenkut fuͤr den Krampff gut: diß Kirsenmuß mit Teriacs vermengt ist gut mithridat: stileoswurtz fuͤrs Podagram: ein pfund Victrill fuͤr wuͤrm/ gepratē Speck fuͤr Ratten/ hie disen Zucker von Him̄el gebracht: O gut Cristier mit Birckengerten fuͤr Weiber: Fuͤr den Sot Johans Prot: Fuͤr den Schweiß/ Harn von einer Geiß: den Glockenklang/ vnd was heur der Guckgauch sang/ das Plo vom Himmel/ vnnd deß boͤsen gelts schimmel/ von der Prucken das getuͤmmel/ das gelb von einer besengten Mor/ der Affenschwantz vnnd Sneckenor/ vnnd das Hirn von der Mucken/ gut zum Schlaff/ die Schlaͤff damit getrucknet. Ja Hamelshoden/ der euch kunden mit Flachßadern vnnd Hanffringen den halß ein kleins virtheil Stuͤndlein rib/ was gelts wa es euch den Krampff an Fingern nicht vertreib: Vnd wer als dann die Diebsdaumen abschnitt/ der hett gewiß gluckhafft Wuͤrffel. Es solt einer auch zu jhnen sagen/ wie dort der Fuchß zum Froschartzet: wilt besehen eins andern Seich/ wie sichstu dann vms maul so pleich/ es gibt dein Plo Maul/ dz dir ist ''<<374>>'' Lung vnnd Leber faul/ man sicht am Quacken vnnd der Gosch/ das du bist ein Frosch: Aber eben so mehr erstickt als erfroren/ wann es jhe muß gehenckt sein. 

(10) '''Nach dem''' sie nun lang also der Welt Laͤuff zuerfaren/ vmbgezogen waren/ '''fuͤgeten sie sich heim zu dem nachtessen/ vnnd''' demnach es schwer wetter/ '''assen sie vil maͤssiger als zur andern zeit/ speiß die abtrocknet/''' ringert '''vnnd extenuirt: auff daß die feuchte betruͤbung des Luffts/ welche von wegen notwendiger naͤhe mit dem Leib gemeinschafft suchet/ hie durch also verbessert wuͤrde/ vnnd jhnen nit zu vnstatten kaͤm/ weil sie kein vbung/ wie zu ander malen/ vorgehabt hetten.''' 

(11) '''Also ward Gargantua''' angezogen vnnd '''Gubernirt/ vnnd pracht solche weiß durch taͤglichen geprauch inn ein gute gewonheit/ vnnd nach seins alters vermoͤglichkeit zu grossem nutz/ wie jhr hoͤrt. Welches wiewol es erstlich schwer scheinet/ jedoch ward es durch staͤte vbung so leicht/ suͤß vnnd angenem/ daß es viel meher ein kurtzweil fuͤr ein Koͤnig/ als befleissigung vnd lehr eines Schulers war. Gleichwol Herrkundlob auff daß er jhm von diser strengen sinn vnnd Leibsbemuͤhung zuzeiten eine fristung gebe/ gieng er jhm etwann in eim Monat ein schoͤnen Tag auß/ an dem sie morgen Fruͤ auffprachen/ vnd entweders gehn Gentili zogen/ oder zu Charantonsprucken/ oder Sant Claudi/ oder Montrouge/''' aber nit Rotenburg bey Tuͤbingen/ dahin die studenten woͤchlich vmb guten Wein walfarten/ Papir zuholen/ welchs sie gleich so wolfeil ankompt/ als wann die Noͤrenbergischen Bierbrauwer jaͤrlichs hoͤfen in Tuͤringen holen: oder es stattlicher zuvergleichen/ als wann man das ''Palliū'' zu Rom holet. '''Vnnd daselbs pliben sie als dann''' ''<<375>>'' '''den gantzen Tag/ vnnd machten des besten dings gut geschirr/ als man erdencken mag: rammelten/ rolleten/ luderten/ trancken genug/ spileten/ sungen/''' jauchtzeten/ koͤgelten/ '''dantzeten/ kaͤlberten sich''' etwann '''auff einer schoͤnen''' gruͤnen '''Wisen/''' buͤrtzelten/ '''suchten Vogelnester/ namen Spatzen auß/ fiengen Wachtelen/''' triben Federspiel/ bestelten ein Lerchenherd/ angelten: '''fiengen Froͤsch/ Krebseten/''' gruben Schnecken/ badeten/ fiengen Ael/ besahen die Binenkoͤrb/ hauten Gerten vnd Meyen/ machten Weidenfloͤten vnd Holderpfeiffen/ stelten den Kautzen auff den Kloben/ fuͤhrten einander auff dem Schlieten <?> den Berg auff vnnd ab/ vogelten. Vud <Vnd> uͤbten ein jungen Sperwer. 

(12) '''Wiewol nun also derselb Tag ohn Buͤcher vnnd Lectur hingieng/ gieng er gleichwol nicht on Frucht ab: Dann sie erinnerten sich inn dieser lustigen Wisen/ etlicher schoͤner Verß''' oder spruͤch '''vom Feldbaw/ auß dem Vergilio/ Hesiodo/ Rustico/ Politiano:''' Clemente Affrico: '''machten''' vnnd schriben inn jhre Schreibtaͤflin '''etliche''' kurtze '''lustige Epigrammata zu Latin/ vnnd vbersetzten sie darnach inn Rondeo vnd Ballade gestalt auff Frantzoͤsisch''' oder Teutsch/ Reimeten vmb die wett/ dichteten Lieder/ auff allerley melodei/ erfunden newe buͤnd/ newe daͤntz/ newe spruͤng/ newe Passa repassa/ newe hoppeltaͤntz/ machten newe Wissartische Reimen von gemengten trey huͤpffen vnd zwen schritten. 

(13) '''Wann sie dann bancketierten''' vnd vnderzechten/ '''scheideten sie von dem Wasserigen Wein das Wasser/''' oder vom Weinhafften Wasser den Wein/ '''wie Cato von der Re Rustica lehret/ vnnd Plinius mit eim Hebhaͤubecher weiset: wescheten den Wein inn einem Becken voll Wasser/ darnach zogen sie''' ''<<376>>'' '''jhn wider ab/ vnnd schanckten das Wasser von eim Glaß ins ander:''' erfunden/ '''baweten''' vn̄ zimmerten '''viel kleine''' sinnreiche '''automata/ das ist/ selbs bewegliche kunstwercklin/''' newe Pratspißwerck (dern Rob. Stephani sich so sehr zu Franckfort verwundert/ als er jhr Meß beschreibet:) Das Fuͤnfft Rad am Karren/ Stockfischmuͤlen/ darauff man die Stockfisch plaͤwet/ die Popfingisch Narrenschleiffen/ da ein grober rauher Burgermeister newlich den Schleiffstein also verderbt hat/ daß man jhn wider behawen muß: New Traͤgerzeug/ newe Schloͤsser zu gewelben vnnd Kisten/ die fuͤrfallen mit einem Schluͤssel: Malschloͤsser mit Buchstabē/ Verremßter Sessel/ die eim Haͤnd vn̄ Fuͤß fiengen/ wann einer drein saß/ selsam Fußeisen/ kuͤnstliche Circul vnd Meßstaͤb/ vnerfaulige Deuchel/ Lauten die sich selbs richten/ vnnd Fewrzeug/ der selbs im Busen ein Fewr auffschlegt: Dann sie wußten bessers als Clauß Narr/ der sorgt/ der Fewrzeug/ welchen einer inn Busen schob/ solt jhn verbrennen.