Gkl:text:kap09

Das Neunt Capitel.

Wie Gurgelstrozza in eben so wunder Abenteurlicher weiß geboren ward/ gleich wie auch war seins gantzen Lebens art.

<Absatz 1> JNn dem sie also im sauß lebten/ vnnd diß sauber subtil Zechgesprech vnd Gesangzech vorhatten/ fieng Gurgelschwante/ die gut schwanger Fraw an zukrachen/ vnd sich zu vnderst vbel zugeheben. Derhalben sprang Grandgoschier auß dem Klee/ vnd sprach jhr troͤstlich zu/ vermeynend es wird gleich an die Bindriemen gehn: Hieß sie sich vnder den Wilgenposch dort hin ins graß strecken/ ob sichs schickt/ daß sie neun Fuͤß von sich streckt.

<Absatz 2> Derwegen vmb troͤstlicher hoffnung willen bald ein frisch kurtzweilig Puͤplein zubekommen/ hielt er bei seim Buͤrstlein an/ daß man es auff ein newes anfieng/ da man es vor gelassen hat/ lustig gut geschirr zumachen. Ein Schelm der vom andern weicht/ allweil Sonn vnd Mon leucht: Eyn Schelm der dem andern etwas vergibt/ vnd jn nit laßt außsauffen. Wer einen im trunck vnnd spiel darff betriegen: darff auch ein Statt verrhaten vn̄ seine Eltern verliegen. Diß Rumorn geschach zur nachfolg der geburt Jouis/ darbei die rasenden Corybanten <<195>> auch ein Cabirisch vnsinnig wesen/ jauchtzen/ goͤln/ singen/ dantzen/ getruͤmmel vnd geduͤmmel mußten fuͤhren/ auff daß der Kinderfresser Saturn/ das aͤchtzen vnd kraͤchtzen/ vnd das ruffen Iuno Lucina fer opem seiner Berekyntischer Frawen Opsrhea im Kindergebaͤren nicht hoͤrte/ noch vernem wann der jung herfuͤr kriechend Bastart Jupiter mit weinen vnd greinen den Tag anzaͤnnet.

<Absatz 3> Wiewol nun jren der Kindsgepfrengten Frawen das bauchgrimmen etwas vngewont war. Gleichwol dieweil derselb schmertz nur ein kurtzer vbergang/ vnd die freud/ so bald hernach zu folgen pflegt/ langwiriger vnd groͤsser/ die alles vor erlitten leid auffhebt/ also das auch die gedechtnuß vn̄ erinnerung daruon nicht vberbleibt: Ja groͤsser freud als vber eim gefundenen verlornen Schaf. Derhalben liebe Gemahl/ sprach er/ frisch auff/ lustig/ lustig sie praten schon/ Seit kuͤnreg/ Seit Kuͤndegen/ frisch auff vmb die Schaf/ die Boͤck springen <springen.> Helff vns dessen ab/ habe ein gut hertz/ laßt den Bauch S. Velten haben. Machs auff ein ort/ so kompt bald ein anders fort. Ha/ sagt sie/ jhr habt gut sagen/ Were dem Faß der boden auß/ Jedoch mit guter hilff will ich mich brauchen/ vnnd dapffer bauchen/ dieweil jrs also haben wolt. Aber was geb ich drumb/ daß er abgehawen wer. Was? sagt Grandgosier.

<Absatz 4> Ha antwort sie/ wie seit jhr so einfaltig: Jhr verstehets je wol. Ja ich meynts auch/ sagt er/ Du meynst mein gesellen? Bei dem Schneckenblut/ gelusts dich/ so schaff mir ein Messer. Ach/ sagt sie/ bei leib <?> nicht/ verzeih mir/ ich meints nicht von hertzen. Aber inn ernst/ ich werd heut wol zu thun gewinnen/ wo mir das gluͤck nicht beisteht/ Vnd dasselbig alles vonwegen einer Pflitschen/ den euch S. <<196>> Sebastian Pfeil beschuͤtz/ welchen ein andechtige Fraw/ als er zu tieff stack/ etwann fuͤr etwas anders ansehe/ Wolauff/ wolauff (sprach er) Bekuͤmmer dich deßhalben nicht mehr/ vn̄ laß es die vier Ochssen da vornen schalten vnd walten. Jch muß noch hingehn ein Fach außzufuͤren/ vnd ein Schnittlein weichen. Wa vnter des dich ein Wee anstieß/ will ich bald bei dir sein/ vnd inn die Haͤnd maͤchtig fertig speitzen.

<Absatz 5> Vber ein kleins hernach begunt sie zu seufftzen/ zu echtzen/ zu krechtzen/ zu hendwinden/ zuweinen/ zugreinen/ zuschreien/ zu scheuen/ zu zitteren/ zuschaudern <zuschaudern/> zubeben/ vnd sich vbel genug zugeheben. Alsbald postierten die Hebammen Saͤcklin herzu/ trugen den Achgnesischen Babst her auff dem Agnesischen Habetstul/ mischt Schnittlauch/ Bingelsafft/ Hasenrennlin/ Gichtkoͤrner/ Gertwuͤrtzlin/ Natterwurtz/ Nesselsamen/ Quittenkerner/ Pappelskaͤßlin/ Balsamrauch/ Magdalenenkraut/ Basiliscendampff/ Nepten/ welchs sie alles zuuor gebraucht gehabt: Aber in der hoͤchsten noht stieß man jr Magnetstein zu/ Trachenkraut/ Adlerstein/ Smaragden/ Corallen/ Sibenzeit/ Nebelgertlin/ Camillen/ Eisenkrautwasser/ Betonien/ Hirtzkreutz/ Helfantenzaͤn/ Buͤglin/ Bibergeil/ vnser Frawen eyß. Deßgleichen thaten jhr gebuͤr die Weemuͤtter/ auß vielen orten erfordert/ die ein hoͤrt beicht/ die ander laß/ die dritt bat jr vor/ die viert hielt jr das Moͤnchisch Kreutzstoͤcklin vor/ die fuͤnfft als sie tastet/ fand ein fellwerck/ eins zim̄lichen argen geschmacks/ vn̄ meynt es wer das Kind/ aber es war nur das vndē am end/ welchs entgieng von der mollification vnd miltifincatz des rechten darmes/ welchen jr den Wolffmag nennen/ der sich also erzeiget/ von wegen daß sie zu vil Kutteln hat gessen/ wie jhr hie oben verstanden. <<197>>

<Absatz 6> Derhaben <Derhalben> zwo alte verrostete Schellen auß den beiwonenden Gevatterin/ welche fuͤr grosse Kůhaͤrtztin vnd Alraundelberin geacht waren/ vn̄ die ein auß der Krautenaw von Colmar/ die ander von Wisensteig bei Vlm dargegabelet waren/ macheten jhr alsbald ein solch schrecklich restrinctiff/ verstrengung/ einpfrengung vnd verstricktiff/ daß es alle Brachaͤcker dabei verdorren/ vnd wol neuntzig Kuͤen hett vergeben moͤgen: Darumb auch alsbald der armen Kindbetterin daruon gleich alle Daͤuchel/ furen/ runsen/ klafegen/ dolen vnd riolen verstopffet/ opilirt/ vernaͤgelt/ vnd vermalschlosset gestunden/ also daß jrs koͤmmerlich mit den zaͤnen hetten erlargiren/ erlassen/ erweiteren/ lassiren vnd erditerichen moͤgen: Welchs dannoch schrecklich ist zugedencken/ wann die Zullspilendē Buben/ so sies spil verlieren/ zur straff den zweck mit den schoͤnen zaͤnen auß dem treck muͤssen auf Niderlaͤndisch trecken vnd schlecken: Vnd der Teuffel hinder S. Martins Meß mit weissen Rubenzaͤnen das Pergamen| <Pergamen/> darauff der alten Welschparlirenden geschnatterigen Weiber geschnader zucopieren/ muß wie der Schuster das leder erzerren/ errecken/ erstrecken/ erdaͤnsen vnd außdensieren.

<Absatz 7> Diesem vnfall nun zuweren/ worden jhren gleich die Seitenwehr der Mutter mit Hasenlupp bestrichen/ auch gar erlassen vnd eroͤffenet/ on den angebundenen Naterschlauch. Daruon fing das Kind an zuerschrecken vnd erhupffet/ vnd kam inn solchem Auflauff in die kraus Holader/ zabelet vnd grabelet daselbs durch die langscheidige leibsleist/ so lang biß es vnter die Vchsen vnd Schulter kam/ da sich vorgedachte Ader entzwey theylt. Allda macht es nicht lang mist/ sonder nam seinen weg durch die Koͤnigliche Weinstraß zu der lincken/ kam <<198>> also zu dem lincken Ohr herauß. Oho der weiten langen Ohren/ darinn der schwimmend Esel viel Reiß voll Fisch het fangen koͤnnen: darumb heißt er nit geboret/ dann vom Vatter/ sonder eroret/ das ist/ von der Mutter auß den Ohrn geschuͤttelt: vnd ist warlich eben so ein grosse ketzerei/ wan man sagt/ Diese Fraw hat das Kind geborn/ als wann man im Elsaß sagt/ Diser Mann hat das Kind gemacht/ drumb muß man jhm zu Jar die Zunfftvermehrungjrrten schencken/ daß er vber ein Jar dest willigrr <williger> sey: So mans doch viel mehr den Kindermachenden Weibern schencken solt/ die sonst zum handel vnwillig sein. Aber wir woͤllen bald ein Haͤringconcily drüber halten.

<Absatz 8> So bald es nun erohret war/ schrey es nicht wie andere Kinder Mie/ Mie/ Mi/ noch auff Herodotisch vnd Beccesalenisch Beck/ Becke/ Beckē: (wiewol das gebaͤch vnd die Wecken zu seim folgenden durstigē geschrey sich wol schicken) auch lachts nicht auff Zoroastrisch/ dann es sparts nach der Physicorum lehr biß vber 40. tag: Sonder ruffet mit heller stim̄ zusauffen her/ zusauffen/ tosupen/ vnd bald hernach im andern thon/ Tranck/ trenck/ trinck/ tronck/ trunck/ vnd zum letzten/ Aha Baire, Bere, Bibere, Boire, Bure, als ob er die gantz Welt zusauffen ermant/ das gantze Supplingerland/ Weinstram/ vnd Tranckreich.

<Absatz 9> Wann jhrs nicht glaubet/ ficht es mich nicht an/ aber ein Bidermann/ ein verstendiger mensch/ glaubt allzeit was man jm verkuͤndt/ vnnd was er inn Schrifften find. Jst es wider die Natur/ wider den gemeynen brauch? Haha/ hast noch viel nicht erlebt/ hast auch noch viel nicht gehoͤrt/ die Gabelē sind nicht all zweizinckig: Liß das Wunderbuch/ liß Trallian von Mirabilibus vnnd langlebigen/ <<199>> Appolon/ vn̄ Antigon von Mirabilischen Narrationen: du findst meh dann einmal/ das ein Baur ein Jgel geschissen hat: daß man in Jndien den Eseln auff den ohren reut: daß einer auff eim halbē Pferd| <Pferd/> welches ein fallender Schußgatter entzwey getheilet/ noch etlich Meilen sey geritten/ vnuermerckt biß ers gedummelt: daß einem Feldfluͤchtigen im Sprung vber ein Zaun mit eim Schlachtschwerd vnuersehrter fuͤß alle vier schuhluͤmmel seien hinweg gehawen worden: daß einer solchen starcken Brantenwein getruncken/ daß jm Nachts vom Athem das Bett angangen/ vnd wann er nicht vngefehr im Schlaf drein geseycht/ drinn verbrunnen wer. Aber genug/ wann Vrganda nicht im Amadis wer/ was wer es? was weren die Caballistische Buͤcher nutz/ von den obgehuͤlten der Natur vnd Naturmachei/ wann man nicht einen andern verstand darhinder sucht? Man muß nicht bei einerley Ouidischen vnd Liberalischen verformungen bleiben/ die Legend muß auch etlich schreiben/ vnd wir auch etlich dutzend treiben.

<Absatz 10> Aber was darff es der Maͤuß/ wann Katzen da sind: ich bitt euch/ stichelgruͤblet vnd wannereuteret ewere Mollenkoͤpff nicht mit disen eitelen gedancken. Was? ist nicht Bachus vnser Landbruder dem Jupiter nah bei dem Geseß herauß geschloffen/ vnnd auß der hufft erzeuget. Daher noch das spruͤchwort kompt/ wann einer eim aͤnlich sicht daß man spricht/ Er ist jhm so gleich/ als wer er jm mit der leyter auß dem Arß gestigen/ der Pyrgopolinitisch <Pyrgopolinicisch> Rocketeyllad oder Spaltdieburg vom Rogenstuͤck/ war er nit auß seiner Mutter Fersen geboren? der Crockemuschisch Muckenkracher von Krichenknack auß seiner Saͤugammen Pantoffel? Papentap auß seiner Großmutter Schlapphaub? <<200>> Finckenritter im Lautenstern. Ja war nit Minerua inn Jupiters hirn durch orenoͤffnung des Vulcan Achßt erzeuget? Erichtthon der Athener Koͤnig auß Volckans Schuͤttdensamen? Adonis durch des Mirrenbaums rinde? Castor vnnd Pollux auß den Eierschalen/ die Leda außbruͤtet? der Sicilisch Ertzraͤuber Selvus <Selurus> auß dem feurspeienden Etna? der groß Alexander auß dem Hammonischen Lindwurm? Goffroi auß eim Melusinischen Moͤrwunder? welches Paracels fuͤr warhafft im Onomastico mit dem exempel der geschicht des von Stauffenberg bekraͤfftiget: die ersten Menschen auß Pyrrhe steinwurff? Cadmi gesellen auß Trachenzaͤnen? der Engellendisch Prophet Merlin/ auß zwey boͤsen/ eim Nachtgeyst vnnd eim alten Weib? gleich wie auch Plato auß eim Geyst vnd einer Jungfrawen soll hindersich kommen sein? vnd wie ein Kartentaͤuscherischer saurer Laur/ sampt eim Schneckenfresser schreibt/ soll auch der heut verrufft Luther von eim Auffhocker außgeheckt sein: eben wie ein Predigkautzischer Brieffmaler malet vnd dicht| <dicht/> das der Teuffel die Moͤnch von eim Galgen hab geschissen/ vnnd den hindern mit Nonnenkutten gewischt: aber der Socius machts zu grob/ man solt jhm das Maul mit eim handvoͤlligen Baurenkegel wischen: der machts hoͤflicher/ der sie auß verlegenem Korn malet? Was sind nit die Mirmidonische Voͤlcker auß Aumeysen? die Gothier auß den Panischen Waldwundern? Was? wirfft nicht das Wisele seine jungē durchs Maul: Kriechet nit auß des Phoͤnichs Aeschen ein anderer Phoͤnichs? auß verfaultē Kuͤen/ Binen? auß den Binen wuͤrmlein? auß dem Mist die Maͤuß? auß dem Chamelstreck ein Machometisch Sau? auß eim Loͤwen ein Katz? auß eim Hanen ein Basilisc? auß meim vnnd deim <<201>> Fleysch Schlangen? auß den vergrabenen KrebsSchwaͤntzen Scorpionen? Was? sind Marx Curio vnd Marx Kolencarbo nicht mit zaͤnen gleich auff Erden kom̄en/ als ob sie gleich dem brot traͤueten? haben wir nit im Wunderbuch erlebt/ daß die Kinder/ alsbald sie auß Mutterleib kommen/ geprediget haben? Schreibt doch Donatus/ der Vergilius hab auch nicht geweynt/ als er geboren ward/ Es lehrt doch der Obercelsisch Theophrastus in seiner Metaformirung/ wie man Riesen vnnd Zwerglin soll im Perdsmist außbruͤten/ vn̄ Kinder ohn Weiber machen/ Ja Eyer vnter den Vchssen außbruͤten/ ja auch im Latz/ den Hennen vnnd Weibern zu tratz: Dise Spagirische Kunden werden bald nebē den Buberonen vnnd Geysseronen ein Weibsparkunst erfinden/ wie jene die Holtzsparkunst. Hierzu werden die Weiber keim Priuilegy geben: O auff jhr Weiber/ schlagt tod die loidigen Goͤcken Spatzen vnd Hasen/ die es beides mit einander versehē woͤllen. Dann diß ist keine Spanische sparsamkeit/ da jren zwen oder drey wol an einer Huren vnd an eim Mantel genug koͤnnen haben: Was auch der Han koͤnn.

<Absatz 11> Aber was bemuͤhe ich mich lang/ die frembd Geburt zubewehren/ jhr werden euch noch mehr verwunderen/ wann ich euch jetz des Plinij Capitel außleget/ inn welchem er von den frembden widersinnischen Mißgeburten handelt: ob ich wol nicht so ein Glaubgesicherter/ gewisser vnd standhaffter Lugener bin/ als er gewesen. Liß das sibend Buch in Natuͤrlichen Historien am vierten Capitel: Vnd laßt mich damit vnbekoͤmmert/ verrucket mir forthin nicht mehr also meine gute gedancken. <<202>>