Gkl:text:kap05

Das Fuͤnfft Capitel.

Mit was wichtigem bedencken vnser Held Grandgauchier zu der Ehe hab gegriffen/ vnd sich nicht vergriffen.

<Absatz 1> WJE ist jhm dann nun gedachte fuͤterung bekommen? wann ich mein Maul nicht zur Taschen mach/ so muß ich nichts anders sagen/ als wie es die Welschen außsprechen/ voll voll/ fuͤr wol wol. Was heißt aber wol/ wo nicht bei eim vollen Faß/ auch staht ein schoͤnes Glaß/ bei noͤtlichkeit ein zierlichkeit/ das ist/ bei eim wolgesetzten Muͤllersackstracken Mann von leib/ auch ein Ranbigend/ Tieffundament gewelbig/ wol gegossen/ Grabtieffgesencktes Weib: Dann wie kan man sich fraͤwen/ da sich das Kitzelfro Thier nicht regt/ welches den namen vom fraͤwen traͤgt? wie solt es stehn/ wann der Adam an der Muͤntz zu Worms allein solt schlagen/ vnd kein mitschlagende Euam haben?

<Absatz 2> Derhalben vnnd dieweil er mercket/ daß die Strofitel Venus zu einem widerschein gern stuͤnde an der Sackpfeiffen Bauchus/ vnnd neben der Bauchfuderigen Zeres: so sahe er jhm vmb ein bezoͤpfftes Außstracktieff vnd beginenpflaster vmb/ zu befoͤrderung der jnneren Nierendaͤuung pro Knibus/ vnd stillung des auffrhûrigen geschwollenen Welschhanenhalß/ vnd auffgelauffener rotblawen Schlangenkaͤl/ welchs er klafftern lang im schweiß seins angesichts warm vberlegen mußt.

<Absatz 3> Ließ sich auch an der einigen Fidel benuͤgen/ dieweil er auch nur einen Fidelbogen hat/ dann <<111>> was sollen zusamen vilerley Safft? eins nimpt dem andern die krafft/ die Adlersfedern verzehren die Taubenfettich/ so warff ja den roten vnnd weissen jener voll Zapff zum Laden auß/ doch den Straßburgischen Botten vngemeynt: So heißts ja auch/ wa sich vneinigkeit straußt/ da wird zu eng das Hauß/ vnnd ziehet der staͤrckst dem schwaͤchern den Harnisch auß.

<Absatz 4> Hielts derhalben gar nicht mit den goͤle/ gule/ gaule/ geylen/ Zungstreckenden Hundsbrautlaͤuffern/ Kaͤßhirnwuͤrmmuͤrbē/ Außquinkessentzgemergelten Kucurbitirern/ beulengeschwollenen Raͤhgerittenen Bockenreutern: Rotznaßglitzendē/ Duͤrrbackenschmutzigen/ Beingrattelen Elenbogenhinckern: Bleichgeschmirbeten/ Mottengefressenen/ wurmstichigen/ dolchgestuͤmmelten/ Muͤntzbeschnittenen Bruchbindern vnd laͤtzfuͤterern: Blaterbletzigen/ außsetzigen/ weißschupigen/ im Holtzsequester ligenden vnd erfaulenden Jobsmaͤrtlern/ Lazarus Spenglern/ vn̅ Holtz Junckern von Caiaco: Blintzlenden/ Glaßzitterigen/ Kruckenstupffigen/ stim̅maunzendē/ Sinnstumpffen/ Marckersaͤugerten/ Ruckengrimmigen/ Ohrensausigen Kopffschuͤttelern/ die verglasurte Bleienfarbe gesicht haben/ lere gedechtnuß vnnd lere Seckel: Jn summa/ er sagt gar ab/ disen Stinckboͤckē/ siechtaͤgigen Schmotzenschmeckeren/ Hindenleckeren/ Hosenschmierern/ Struͤmpffuͤterē/ Wadensteckē/ Parpelschwitzern/ Bockenholtzsauffern/ neunmal Frantzoͤsigen Rittern/ Eselsmessigen Dorffarren vnnd andern verminnten Ochssen/ die inn alle Krebsloͤcher jhre Nasen stecken woͤllen/ vnnd das Poͤnitere theur kauffen. O wie fein haltet Hippocrates den Coitum oder geheitum fuͤr ein art vom <<112>> fallenden siechtag/ da man mit dem Kopff thut/ als wer man mit dem Arß vnsinnig.

<Absatz 5> Nein/ Nein/ diß war seins glaubens gar nicht/ er fieng kein Troianischen farrenwuͤtigen Hellenkrieg drumb an/ mault mit keim Agamemnon vm̅ das Brisachelslein/ stuͤrtzt sich in kein Kurtzenloch drumb/ war kein Pausanischer/ Scedasischer/ Carrarischer/ Barhuͤserischer/ Leuitischer vnd Dirschereitischer Freimuͤllerischer Meidlinmetziger: ward kein Mundischer Jsenpfaff drum̅/ daß er ins elend einer nacht halben kom̅: Er war kein Bryas/ daß jm die Braut im schlaff die augē außriß: man dorfft jn nicht drum̅ auff Macrinisch inn ein Ochsen vernehen/ noch Sicilische Vesper mit jm spilen: Temoclia dorfft jhm keinen Schatz im Bronnen zeigen: man gesegnets jm nit wie dem Salust mit Peitschē <Peitschē/> oder dem Schweitzerischen Amptmann mit der Achßt im Bad/ vn̅ dem Domherren mit dem Strigel: Er stuͤrtzt kein Bischofflichen halß darumb im Keller ab: zuͤnd nicht der Herrengurr Tais zu lieb Xerxis Koͤniglichen Palast an: er acht nicht der Flora Erb: man dorfft jm nicht wie den Affen die Stifel halb außziehen/ vnd darnach fliehen: die Paͤbstmuter Marozia dorfft jhn mit keim kuͤssen ersti\cken: pfaͤlet kein Fraw durch die taͤschen/ wie der Hunnisch Koͤnig Cacan zu Forliff des Lombardi.|schen <Lombardischen> Koͤnigs Gisulffs Fraw/ die er/ nach dem sie jm die Statt vnd jr ehr verahten gehabt/ wie gehoͤrt/ mit eim vnadamischen spieß vn̅ flocken hat gespisset vnd verkeihelt. Es dorfften jn Koͤnigs Gisulffs Toͤchter mit jrem Milchmarckt nit betriegen/ vnd faul stinckend fleisch vnter das Nackmentelein zwischen die Bruͤst verstecken/ auff daß vor scheutzlichem gestanck niemand mit jnē schertzte: Daher die Vngarn meintē/ daß alle Lombardische weiber also <<113>> stincken/ vnd liessen derhalb den Kitzel in die Hosen sincken.

<Absatz 6>

Vergaß sich nicht wie Hercul in der Spinstubē/ wie dz Vlenweiß Weißheitmuster im Circenberg/ der Trew Eckart/ Dannheuser vnnd Sachsenheimer in Venusberg/ Koͤnig Mitridat im Moͤrland Ponto/ Hannibal in Capua/ Juli vnnd Antoni inn Egipten. Jn sum̅a er ließ nie kein Nieren/ noch anders/ wie das Huͤndlein von Bretta dahinden/ von frembdes genaͤsch wegen: dann sein ehr war jhm lieber/ wie der Jugfrawen/ <Jungfrawen/> die band die Aer an ein Seidenē faden beim Kuͤschwantz am Hurendantz.

Tanzszene

<Absatz 7> Verspeiet derhalben die Corinthische hohe Zatzenstifft/ Solonisch Wolffshuͤlen/ Hellegablische Bordaͤl/ Sixtische Mummenheuser/ Bußkloͤster/ halbe Thaͤcher/ Rosenauische/ Schweinawische/ Oberhausische Fischerfeld/ Metziger Awen/ auff dem Roͤberg: Neuhauserwaͤldlin/ Neupeterswaͤldlin: Leipsische Kniehoͤltzlin: die Widertaͤufferisch Liechtmeicherei/ die pecora campi, die das Graß mit dem Geseß abmeyen/ vnnd den Leuten <<114>> vor dem gesicht mit jhrem Aretinischen Welschen Passion vmbgehn: dann die Kinder truͤncken offt nicht/ wann sie nicht den Wasserkessel vor jhnen sehen: vnnd was bringen sie daruon/ als erlamete Wolffsweychen/ vnd das blau vnnd gruͤn im Rucken/ welchs sie darnach mit wilden Katzenbeltzen woͤllen vertrucken: vnnd wann sie die frische junggefiderte pfeil verschossen haben/ darnach bei den jungen Frawen wie ein verschnittener seufftzen ligen/ vnd vnbesoldete Factoren vnnd Substituten kriegen/ es besolde sie dann die Fraw.

<Absatz 8> Pfuy auß/ beids mit den Milchpfennigen| Barrenmerrern/ vnd Gartleuffigen/ Stallnaschigen/ bodenhartbretkerbigen Bockenbre\cken/ Ovidischen Neunreutigen Zirene/ Hurenmuter Arsbasia/ Hurenreimerin Zapffo/ Huren Procuratorin Lenont: suͤßeinschwetzige Zomproni/ Hurentrewe Lewin/ augenschaͤdliche Sinoppe/ Hellwert Quadratari/ Landhur Rudope mit dem Kunckelturn/ Hengstbruͤnstige Schamiramis/ Farrengebruͤte Baszipfae/ Hundsgebruͤte Minerua/ Geile Gulia/ Populea/ Klepatra: Gallische vnnd Arterische todgeminnte/ fuͤnff vnd zwentzig reutige Mezalin/ Procolische zehenspeniger/ Herculische fuͤnfftzighuderer/ Jndische sibentzigmoͤgige/ Machometische viertzigmansame/ Gregorij des 7. S. Mechtild| <Mechttild/> Neapolitanische Janna/ Frantzoͤsische Valentina/ Bellagnes/ Stampiana/ vnkaste Chastegnereych/ Katzenreyne Brandenkaͤterlin/ Drottin vnd Roßliebe.

<Absatz 9> O wie ein gute Pitagorische/ Druidische/ Caballisti/ Minemonische vnnd Lullische gedechtnuß fuͤr solchen Huren vnd Bubentroß. Es nimpt mich selber wunder/ wie ich den Hurendantz weiß also zuerzelen/ gleich wie Simonides die verfallen Zech: <<115>> vnd Petrarch den triumpff Damore: ich bin gar der Memori vber das Faß kommen: derhalben haltet in ehren solchen Xerxischen kopff/ der alle seine Kriegsleut im gantzen Hoͤr von 100000. wußt mit jren besondern namen zunennen: Ja wers glaubt/ ich denck wann er einen schon Claͤuslin geheissen hat/ vnnd Peternel hieß/ so hat er doch Claͤuslin muͤssen heissen/ dann bei diesen Herrn gilt der Hofmennisch Reimen/ Jch laß Ruben Bieren sein.

<Absatz 10> Nun wolan/ so wißt jhr nun/ daß er nichts hielt auff die Heimduͤckische/ gestolene/ Nachtdiebische Kitzelfreud/ da sich einer inn Dachmarter vnd gespenst verstellen muß/ ja wie Jupiter inn Ochssen/ Drachen/ Schwanen/ Kefer/ Wider/ Moͤrschwein/ Widhopffen/ vnd Gold verwandeln/ vn̅ wie Ouidius in ein Floh sich wuͤnschen. Dann es gibt gestolene Kind/ Liffkindecken/ eilwerck/ vngeheure Krippel/ Spanische Hechizos/ vnzeitling/ ehezeitig geburt/ vnzeitig erstickt Obs/ Hebammenpfetz/ Stieffvattersuͤpplin/ Henckergriff/ Liebtraͤnck/ ja Lebenertrenck/ Blind Hebammenholen/ tollsuͤff/ Brustschwindung/ Kindverschnirung/ leibpfrengung/ auffgeschuͤrtzt engguͤrtel/ Profeibegrebnuß/ weirwigen/ Fischspeiß/ fuͤndling/ außwirffling/ Bauchbinderin/ Seuenbaͤum/ Ruckenschmaͤr/ Pfulwenbaͤuch/ vnd ehrgrindig Vertugallen roͤck/ darunder man den aufflauffenden Deig inn der Multer kan verbergen. Er hielt das Bachikantverßlin gar Zehengebottisch. Est magnum crimen, corrumpere virginis himen. Der ein Jungfraw darff schwechen Darff auch inn ein Capell brechen.

<Absatz 11> Noch viel minder kont er verdaͤwen des Platons Lacedemonisch Gartenbruͤderisch Weibergemeynschafft/ wiewol es inn <inn den Ny> Decreten cap: <<116>> dilectissimis, causa 12. q. 1. gebillicht wird/ weil vnter guten Freunden all ding soll gemeyn sein/ wie der Lufft vnnd der Sonnenschein. Noch die Lesbische Lawdische Klingenbalierer vnnd Wadelsauger/ Buberonen/ wie sehr es der Maleventisch Bischof de la Casa Sodomae rhuͤmet: noch alle Kysolacken/ Pfitzidisser/ Cotitto/ Fellrumer/ die die Jungen durchs Maul wie die Wisel werffen solten/ Lidische Mittaggeyle Stielmelcker/ Geyßhirten inn der Sonnen/ Siphniasserische Pfostenhalter vnd Cibeles Orden <Orden.> Noch das vnmenschliche/ Stallstinckige Stafermo <Stafermo/> schoͤne Fraw Geyßbergerin.

<Absatz 12> Sonder (damit ich ein mal abtruck) er schicket sich nach ordnung der natur zu einer ordenlichen Ehrennehrlichen/ Nachbaurlichen/ gesindfolgigen/ gemeynnutzlichen/ handlichen vnd wonhaftlichē Haußhaltung vnd eygenherd. Dan̅ seins Vatters Hofmeister Silenus jne mehr dann einmal hat berichtet/ daß nichts auff Erden einer Alleinbeherschung vnd Monarchi oder Manherschi (welche man dann fuͤr die beste Regimentsbestellung außgibt) gleichaͤhnlicher nachoͤmet/ vnd sich Koͤniglicheres ansehens erweiset/ auch mehr nach weiß der gemeynartung schicket/ als die haͤußliche Herrschafft/ vnd Herrschafftliche Haͤußlichkeit.

<Absatz 13> Dann inn derselbigen erkennt der Haußfuͤrst seines Tachtropffes Reichsgrentzen/ darauß jhne niemand ziehet/ l. nemo. ff. de Reg: iur, seins Ackerlands Marggraffschafft/ seins Feldes jaͤrliche eintrag/ Zoͤll vnd gefell/ seines Schatzkastens erweiterung vnnd mehrung/ seinen zweyzoͤpffigen Tresorirer vnd Kuchenmeister/ seine Kindercredentzer/ seiner Kastenbeytzung vnverfangēheit/ seine feindliche straufende Rotten vnd freybeuterei der Spatzen/ seiner gibel befestet anstoͤß/ seins Rauchloches/ <<117>> Lichtes vnd Lufftes bekoͤmlichkeit/ seine Cloacische heimliche Schußloͤcher/ seines bodens Freyheit/ seines Vnderthanen Gesindes gewerb/ Gesatz vnd gepreuch/ seiner Hoͤfischen Ehehalten Reißtaͤg/ seiner Kinder Schalcksnarrenkurtzweil/ kurtzweilige rhaͤt vnnd Affenbossierlichkeit/ deßgleichen derselbigen Kinderpapagei taͤgliche vnnd naͤchtliche Lautgestim̅te Kam̅ergeigung/ Tischhofirung vnnd Capellemeysterei/ sein Hund vnd Katzenschmeychler/ sein Maͤuß vnd Fligenschmarrotzer/ seines hohes vnnd nideres Haußwildes oder Vihes sicheren ein vnnd außzug <außzug/> seiner Dauben vnd Bienen freyen ab vnd anzug/ seiner Pferd Ackerpostlauff/ sein Spitalfresig Almusenreichung/ seiner Nachbauren frid vnd buͤndnuß/ sein Holtzmarckatisch Waldholtz vnnd Kuchenspeiß/ seinen Fischmaͤrckischen Geltnetzechten freyen Fischfang/ sein Schlaffkem̅erliche Wehr vnd Waffen vnd Zeughauß/ seine Kam̅erzuͤnfft vn̅ Hofstuben: seiner Hofkleidung/ auch Hauß vnnd Hofhaltung kosten vnnd vnkosten: Er hat an seim Weib/ Kind vnd gesind/ genug Moͤrraͤuber vnnd Schaphanen <Schnaphanen> im Seckel vnd in der Taͤschen.

<Absatz 14> Diese vnd andere meh Haußnoͤtige stuͤck/ so sie dem Haußkoͤnig gruͤndlich zuerwigen fuͤrkommen/ spuͤret er alsbald seine vnvermoͤglichkeit/ daß er/ wa er nicht von Land vnd Leuten raumig vnd schachmat werden will/ notwendig dem hundertaͤugigen Argo ein Fuͤnff dutzend Fenster auff gute rechnung abborgen/ vnd mit dem Mercurio ein anstand treffen muͤste. Derwegen denselben genug man zu sein/ vergleichet vnnd einiget er sich mit eyner im <jm> anmuͤtigen Gehuͤlfin: Welche er darauff vmb meher erleuchterung inn ebenmaͤssige vollmacht/ das seine zuverwalten vnnd zugebrauchen/ mit jhm als ein gemeynerin vnzertrewlich <?> ein<<118>>lasset/ vnd zu einem Tisch vnnd Bettgeheimesten rhat erwoͤlet: ja gleichsam in ebenwuͤrdigen Thron fuͤr ein Haußkoͤnigin auffnimmet vnd neben jhm einsetzet. Welche freykuͤrliche/ ehrenbilliche vnnd Haußsteurliche gemeynschafft/ so sie ins werck gerichtet/ als bald vor Gott vnnd der Welt/ als ein notwendige Lebensfrist/ vnnd Menschlichem geschlecht vnvermeydliche auffenthaltung wird gerechenet vnd gestattet: Auch solcher contract/ verlob/ Handschlag vnd verbuͤndnuͤß/ von der ewigen trewleistung/ die sie einander in krafft natuͤrlicher zuneygung/ zugelassener Beilag vnnd Ehkoppel/ nottringliches beistands vnnd freiwilliger zusag schuldig/ ein rechtmeßige Eh/ die Contrahenten vnd verlobte aber Ewige Ehleut/ vnnd eins leibs genosse geachtet/ bestimmet vnd gepreiset.

<Absatz 15> Welcher sehr geheymnuͤßreicher/ nam nicht schlechtachtsam ist auff vnd anzunemmen/ inn betrachtung/ daß er auch nach beider Ehgatten toͤdlichem abstand noch nit verschwindet: sonder auch im ewigen Paradiß (da sie einander wider kennen vnd wie keusche Geystlich: Engelshertzen sich beisamen frewen) beharrhafft/ so viel den namen betrifft/ bestehet.

<Absatz 16> Hierumb so allein der Ehnam also ehrlich inn die ewigkeyt (da sich doch sein wuͤrckung nicht mehr ereyget) erhaben wird: Wie viel mehr gebuͤret vns| <vns/> die wir sein krafft vnd steur in vnseren baufalligen Pilgerhuͤtlin vorstaͤndig empfinden/ denselbigen nicht allein werd zuhalten/ sonder auch seiner eygenschafft nachzusetzen.

<Absatz 17> Sintemal solcher noch mehr suͤssere Namen mit jhren auff dem rucken pringet/ also daß man einander mit den allerholdseligsten Namen/ des Vatters/ der Muter/ der Bruͤder/ der geschwister <<119>> benennet/ ruffet vnd gemeynet: darauß abzunemmen/ daß wa sie inn ein abgang geraten/ bald alle Schwerd vnd Spilmagen/ all Sipschafften/ verwandschafften/ Vetterschafften/ Baßschafften/ Oehemschafften/ Mumschafften/ Nef vnd Nichtschafften/ Kindschafften/ Geuatterschafften/ Holdschafften muͤßten wie die glider des leibs/ da sie dem bauch nicht dienen wolten/ abgehn vn̅ fallen: ja die gantze Welt zu grund sincken/ vnnd inn jhrer Muter Leib das Chaos/ den Kochhafen vn̅ Bachofen tretten: Jnn betrachtung daß dieselbige von solchen verfreundungen vnd gemeynschafften allein also gemehret/ bewonet vnd geziert auffkommet: Seit einmal der Mensch sonderlich zu eim geselligen/ leutseligen/ selhafften lebwesen ist geschaffen: Vnnd also/ anhengig zuschliessen/ auch zu der ehlichē Haußhaltung naturneigig geordenet: Dan̅ durch zusamenwachsung/ vnnd vernachbaurung einer gantzen Freundschafft wird ein gaß besetzt/ auß vielen gassen ein Flecken/ auß eim Flecken ein Statt/ auß Staͤtten ein Land: auß Landē ein Koͤnigreich vnd Keyserthumb/ auß Keyserthummen die Welt/ auß der Welt das Paradiß.

<Absatz 18> Dannenher man wol von der Vermaͤlung/ Wie Tullius von der Freundtschafft gleichnußweiß sprechen mag/ daß welche dieselbige abzuschaffen vorhabens/ sich einer vnersinnigen that/ nemlich die Sonn auß dem Weltkreiß hinzureissen vnterstehn. Dan̅ wie koͤnte on Ehliche saat das Land erbawet/ die Staͤtt besetzet/ die Doͤrfer bewohnet/ die Gemeynden versehen/ die Haußpfleg verweset/ die Geschlecht außgepreytet/ vnnd entlich Gottes befehl/ die Welt zumehren/ vollzogen werden/ oder auch die genadgesalbte Kirch (darauß Gott Colonias (doch nicht von Coͤlln noch von Kaͤl) Burgerstifft <<120>> vnd bewoner/ als gejmpffte versetzling vnnd schoͤßling außsetzet vn̅ zihet) allhie bestand haben? welchem zu nutz wuͤrde die Sonn scheinen/ die Erd erleuchten/ auff vnnd nidergehn? Dergleichen der Mon vnnd Thau den Boden erkuͤlen/ der Regen befeuchtigen/ die Wind trockenen/ alle Thir zunemmen/ die Baͤum fruchtbaren/ das Feld getreyd tragen? Mehret sich diß nicht alles/ nach anzahl vnnd menge der Leut/ die es gebrauchen? Befand nicht Keyser Maximilian zu Coͤlln je mehr Brot vberig/ je mehr Leut dahin zum Reichstag kamen? traͤgt nit der Sand vmb Noͤrnberg dest mehr Heydel/ je mehr Heydelfresser da auffstehn? Kom̅en nicht zu Pariß dest mehr Jarkuchen auff/ je mehr Pastetenmangierer sich allda regen? Wachsen nicht die Ruben dest groͤsser/ damit die Krautfresser zu delben haben? Seind dann nicht alle geschoͤpff zu außbringlicher erhaltung des Menschen geschaffen vn̅ gesegenet? Jst nicht die grosse leblose von wegen der kleinen lebhafften Welt erbawet? Wa nun die|selbige auß vnprauch ehlicher mehrung abgienge/ were nicht Gott als ein vnfuͤrsichtiger/ vnd der vnnoͤtlichkeit Bawherr beschuldiget? oder als ein vnkrefftiger erhalter seiner geschoͤpff/ vnd vumaͤchtiger Vollzieher seiner gebott geschmehet?

<Absatz 19> Stuͤnde nit diß mitteltheyl vnd Punctzweck zwischen den vier Allgemeinten oder Haͤlementen (die das <des> Menschen halben rund gewelwet) seiner eynigen zierd beraubet? Wuͤrde nicht alles traurig/ vnbewont/ wild vnd oͤd ligen? Die kuͤnst abgehen? Die Erbschafften absterben? Frid/ gerechtigkeit/ vnd uͤbung aller Tugend auffhoͤren? Die Him̅lische Engelsbotten jrer freud/ die sie mit vns auch hie von wegen hoffnung zukuͤnfftiger ewiger kundtschafft pflegen/ entbaͤren? Die Teuffel jres Zolles <<121>> mangeln? Der Hoͤllisch Schiff vnnd Karrenmann Charon hungers sterben? Aller Gottesdienst ernider vnd vergessen ligen? Ja gantz vnnd gar kein Gott/ so es regieret/ scheinen? Vnnd endlich dieser mittelkreiß ein ware Teuffelshoͤl werden?

<Absatz 20> Wie koͤnte aber die vberhimlische Mayestatt| <Mayestatt/> so man also die Ehgeluͤbt vnuͤblich machete/ oder vnnoͤtig achtete/ Laͤsterlicher angetastet sein vnnd heissen? Hingegen wie kan sie Ehrwirdiger erhabē vnd geprisen werden/ als so man gehorsamlich nach dero gegontem mittel inn Ehlicher keuscheit jm dienet?

<Absatz 21> Da doch solche ehliche Weltsamung zu foͤrdern/ der hoͤchstgedacht weisest Schoͤpffer dem Mann/ so das ansehlichest vnnd erstgestifftes vernuͤnfftig geschoͤpff ist/ nicht allein von außen ein standmaͤsige vnd zugelassene mitgefaͤrtin vnd gespilin an dem Weiblichen geschlecht/ sonder auch von jnen im Hertzen ein Natuͤrliche zuneigung vn̅ anmut zu derselbigen hat gebildet. Also das er beide von wegē begird vnabsterblicher fortpflantzung vnnd hinderlassung seines gleichen namens vnnd Fleysches/ auch angenemer zudienung (dieweil er kein fuͤglicher vnd jm gefelliger hûlffgesellin/ <hûlffgesellin> zu seinem Eh vnnd Haußgeschefft vnder allen Creaturen dienlich befindet) sich zu dessen beiwonung vn̅ gemeinschafft deßlieber/ ja schier naturbetrenglich einlasset vnd gesellet.

<Absatz 22> Dann zwar ein jeder Ehgeneygter beide beruͤrte stuͤck/ als nemlichē verlangen in seinen Nachkommenen Vnsterblich zupluͤhen vnnd zuerscheinen/ vnd angeborner geschicklicher huͤlff zu Vnterhaltung seiner Person/ vnnd der seinen vnnd des seinigen zugeniessen/ inn der Weiblichen zugesellung allein vnabbruͤchlich befindet. Auch warumb <<122>> solt anders das holdselig Weiblich geschlecht also anmuͤtig/ zuthaͤtig/ kuͤtzelig/ Armfaͤhig/ Bruͤstlindig/ anbiegig/ sanfftliegig/ Mundsuͤsig/ Liebbaͤuglig/ <Liebaͤuglig/> Einschwetzig/ Milt/ Nett/ glatt/ schoͤn vnd zart erschaffen sein/ wa nicht weren die sich darinn erlustigten? Was solt der Rosen Geruch/ wa nicht weren die sie zur Erquickung abbrechen? Was solt der gut Wein/ wann keine weren die jhn zechten? was wer der Thurnirring/ wann nicht die Hofleut darnach stechen? Wie solt Weibern solch natuͤrliche geschicklichkeit dem man zu dienen/ vnd on jne weniger dann ein Hebheu ohn das Hauß zubestehen/ vmbsonst zugestanden sein? warumb wer sie also ploͤd geschaffen/ on daß sie sterckeren zusatz vnd beistand bei dem man het zuerheben vnnd zusuchen? Vnd daß des Manns festleibigkeit die Weibliche Ploͤdmuͤtigkeit/ wie der Augsteyn die Spreuer an sich ziehe. Warumb ist der Mann rauch vnd Harig geschaffen/ dann daß er jhren mehr waͤrm/ Lust vnd Kitzel einreibe vnd eintreibe? Warumb sind jr zwey/ auff daß wo sie Zwilling bekommen/ ein jedes eins auff seiner seit Nachts zuwagen/ vnd zuwiegen hab.

<Absatz 23> Auff was ander end hin wolt sonst ein solche vnerschoͤpffliche lieb vnnd lust Kinder zutragen/ auch vnverdruͤßlichkeit solche auffzuziehen inn jhr hertz eingestigen sein/ ohn durch des vorsichtigsten Artschaffers verordnung/ der daß tugend vnd demutuͤbende Weibliche joch hiedurch der freygirigen vnbaͤndigen Mannschafft wie dem Pferd das Saltzbestrichen gebiß/ hat suͤß vnnd annemlich gemachet.

<Absatz 24> Dann also muß der Mann alle die sorgfeltige wartung/ so an seine recht eingejmpffte Jmpffling| <Jmpffling/> Zweig vnd Erben angewendet wirdt/ jhm als dem <<123>> Stammen selber widerfahren sein auffnemmen/ vnd zu danck gegen seiner Ehverknipfften mit widerlieb verstehn vnnd erkennen. Derhalben man recht saget/ daß die Kinder PfandSchilling/ Staͤrckung vnd Confortatif der Ehelichen pflicht seien/ vnd das beider Ehgesuͤnten lieb inn disen/ wie die auffgezogene Seyten jnnerhalb dem Lautenstern zusamen stimme: Dann dise sind der Eltern schoͤnster WinterMeyen/ leyd vergeß vnnd wend vnmut/ des Vattern auffenthaltung/ Leytstaͤb/ Krucken vnd Stuͤtzen/ inn welchen sein alter wider pluͤsam wird/ sind der pleiblich nam seines Stam̅ens/ Spiegel seiner vergangenen Jugend/ anmasung seiner geberden/ angesicht vnnd angestalt/ gleich wie ein gezeychnete Herd: eyn lebendig gegossen/ doch etwas verkuͤrtzte Modelbildung: eyn grosse traumgebildet hoffend freud von jhrem zukuͤnfftigen wolstand/ sein ewige gedaͤchtnuß/ jm̅erwirigkeit vnd vnsterblichkeit/ inn denen er wie eyn muͤrber Kaͤß zu vielen stuͤcken zerfaͤllt/ in partibus similaribus, deren jedes/ ohn das mißgewaͤchß der Toͤchter/ sein namen/ samen vnd wesen treget/ vnnd genericè prediciret.

<Absatz 25> Durch dise wird er gesegnet/ dise machen jhm alle arbeit suͤß/ dieweil er jhnen gern viel verließ/ von diesen Erben sich die guͤter vnd kuͤnst von eim zum andern inn seim geschlecht staffelsweiß/ wie man einander die Ziegel biß zum Tach hinauff reichet/ vnd die Kaͤß ins Schiff ladet. Dise/ wann sie etwas mehr erwachsen/ werden die ware zier des Hauses/ die Rebenhalter des Tisches/ der schutz vn̅ das lebhafft gemeur des Vatterlands/ die macht des Kriegs/ der Statt Neue Burgerschafft/ der Regiment frische pfeiler. Wo bliben aber diese schoͤne Sproͤßlin/ wann man sie nit auffzilete? wer kan sie <<124>> aber besser auffzielen/ als die von natur darzu geschaffene? die Eh vnd Bettgenosse Weiber: welche es auch zum groͤsten theil antrifft/ als die sie saur ankommen/ die jhres Leibsstammens außschoͤßling vnd Nabelstuͤck sind/ vnd derwegen deß lieber haben: wiewol Aristoteles 8. Ethic. auch ein andere vrsach anzeiget/ warum̅ sie die Kinder hefftiger lieben/ nemlich dieweil sie derselben gewiß sind/ aber die Maͤnner wenen vnd meynen: Daher die Toͤchter den Muͤtern zu Kirchen vorgehn/ aber die Soͤn den Vattern nach. Auch meynt Wilhelm Benedict inn seiner Repetition C. Reinut. es geschech darum̅/ weil die Muter die materi/ die Vaͤtter aber nur die form mit jhrem traͤheisen darzu geben/ vn̅ wie Galen sagt/ auff der Cithar schlagen.

<Absatz 26> Derhalben/ inn Rabelistigem ernst von der sach zureden/ von den guten Weiblin nicht steht zu argwonen/ daß sie an jhrer eigenen Leibsfrucht solten saumig werden/ sintemal sie gleich so wol als der Mann an deren alle Ehr vnd freud begern zuerleben: dann wer hat je sein Fleisch gehaßt? Darumb secht jhr/ wie sie die Kinder lehren betten/ schicken sie zur Kirchen vnd Schulen/ stecken jnen allerley weck/ schleck/ treck vnd Latwergen inn den Schulsack/ verehren dem Schulmeister etwas daß er sie nicht streich/ geben fuͤr/ sie seien kranck/ koͤnen nicht zur Schulen kommen/ geben jhnen zur straff eine Knipp mit dem Fingerhût. Heysen sie das stuͤlchen zum Dütten pringen/ Becorallens/ bemuschelens wie die Jacobsbruͤder/ behenckens wie S. Vrban mit Kutteruffen vnd die Wuͤrtzkraͤmer jhren Kram mit Nießwurtzsecklin: kauffen jhnen guldene Schuͤhelin vnnd Peltzlin/ kleiden sie fein pundlich auff den newen schlag/ setzen Leuß inn Peltz/ hencken jhnen Toͤlchlin an/ lehren sie/ dem <<125>> Vatter/ den sie sonst nicht kenten/ Ette ruffen/ das schmutzhaͤndlin reichen/ sich Elephantisch neygen/ den rechten backen zukuͤssen bieten/ auff den beinen hotzeln/ also reuten die Bauren/ bei den Oren auffheben vn̅ Rom zeigen/ Mum̅elspilen/ die lectz auffsagen/ auß der Predig behaltē/ geben jnen heimlich gelt/ schickē sie zu guten gespilen/ zum dantz/ lehren sie den gang wie der Krebs seine Jungē/ sam̅eln jnen ein Schatz/ verwarn jnen jr verlassenschafft: da stellen sie jre zucht vmb den Tisch staffels weiß wie die Orgelpfeiffen/ die kan der Vatter mit der Ruten pfeiffen machen wann er will/ ou <on> blasbaͤlg tretten: vn̅ da befleißt sich das Weib/ dz sie dise Costentzische Himlische Sackpfeiff oder pfeisen mit eim jungen Discantblaͤserlein/ Vogelgeschrei vnd Pfeiffroͤrlein staͤts ersetz/ damit das Orgelwerck gantz bleib.

<Absatz 27> Vnd wer kan all jhr muͤh/ so sie mit der Kinderzucht haben/ erschwetzen/ was sie fuͤr allerhand kurtzweil vorhaben die Maͤnner zuergetzen/ mir entgieng vil eh der hust/ als jnen der wust: kurtzum̅ wer kein Ehgesibete hat/ ist halb tod/ mangelt ein stuck des leibs/ weißt kein seßhafft Heußlich wohnung/ wie die Tarrarische <Tartarische> Hoͤrkaͤrch/ ist nirgends daheim/ ist meher eim jrrschweifigen Vihe ahnlich/ <aͤhnlich/> als eim eingesetzten Colon vnd Kolbauren/ oder bestalten Abvreigenen Jngevone/ Einwoner vnnd erbauhern dieses zeitlichen Lustbaren Paradises. Dann ob er schon ein obtach hat/ ist jhm als wer er darein gelehnet/ vnd sitzt wandersweiß wie ein anderer Landstreiffer im Gasthauß/ niemand kocht fuͤr seinen Mund/ niemand helt jhm das sein zusammen/ weder das groß noch das kleinest Haußruͤtlein weder das taͤglich/ noch das naͤchtlich/ alles verschwindt jhm vnter den Henden/ hat niemands dem er sein not klaget/ der jhm sein <<126>> anligen abnimpt oder mit gleicher achsel leuchteret| <leuchteret/> keiner eifert vmb sein Heyl/ niemand warnet jhn mit trewen/ vnd wann der Han todt ist kraͤhet kein Henne nach jhm/ niemand truckt jhm mit tieffgesuchten Turteltaubenseufftzen die augen zu/ niemand nimpt Leydkleyder auff jhn auß/ keine laßt jhn inn ein alte Saͤuhaut begraben/ keine trinckt auff Tratzisch ein halb maß Wein auff jhm auß/ keine laßt auff Jndisch sich mit jhm Lebendig verscharren.

<Absatz 28> Jn summa/ wer sich mit keiner Ehgehuͤlffin behilffet/ ob er schon der reichste wer/ hat er doch nichts das recht sein ist. Dieweil er es mit keinem inn gleicher freud weiß zugeniessen/ hat niemand dem ers pring/ der jhm bescheid thut/ das sein verwaret/ beschlieset/ verkramet/ dem ers sicher vertrawe/ dem ers auch zukuͤnfftig hoffentlich vnd offenlich koͤnn getroͤst verlassen/ alles das sein stehet in fremder gefehrlicher mißtrawiger Hand/ sein eygene Ehhalten/ ja Weehalten die Knecht vnnd Maͤgd betriegen jhne darumb/ tragen jhm heymlich ab: thun wie des Callimach Aff/ der/ als er sah wie das gesind in jhres Herrn toͤdlichem hinzug anfiengen außzutragen/ zustelen/ zuketschen/ zuschlaifen/ zuverstecken/ wolt er auch von dem vntestierten vnnd vnverlegierten Erb was haben/ lieff hin vnnd nam dem Todschwachen Kallimach die Schlafhaub vom Kopff/ vnnd das Doctorhaͤublin druͤber/ des mußt wol der Kranck lachen/ hat sich auch also gesund gelacht vnd das gesind zum Hauß außgejacht: Aber was ists? vrlaubt er schon etliche/ vnd nim̅t andere an/ so ladet er nur an stat gesaͤttigter/ mehe hungerige Fuchsfligen.

<Absatz 29> Ja das Eseltreibig/ Lonsorgig/ Augendienschafft Gesind ist jhm kaum gehorsam: Jst Mur<<127>>risch/ widerbefftzig/ Diebraumisch/ vnvertreglich/ Futerstichig/ Meysterloß/ Kifig/ Balgisch/ vm̅ ans <ains> andern haar/ Geschwetzig/ außtraͤgig auß dem Hauß/ vnd im Hauß traͤg/ Baurenstoltz: Eißspatzirig: schlauderig/ Hans vnfleiß: der Niemands im prechen vnd verderben/ ist Wolffs_fraͤsig: <Wolffsfraͤsig:> Klosterkatzenart: versoffen: Vollfaul: studfaul: Schlaffduͤrmelig: Kopffkratzig: Wolffslendenschleyfig: Vnvernuͤglich: Vngeschickt: Sorgloß: Verwarloß. Ach welcher Plautischer ComediSchreiber will alles Dauisch vnnd Getisch Knechtrecht nach Niemands Zedel beschreiben? Wie viel Gesind/ so viel Feind/ da ist Hund vnd Katz das best Vihe/ dann so er den Rucken verwendt/ hat er keynen Anwalt noch HaußLieutenant/ der es inn seim Abwesen auff guten Weg richt vnd schlicht.

<Absatz 30> Sein Freund verlassen jhn/ oder warten jhm Erbgirig auff die Seel/ wuͤnschen jhn inn die Hell/ Er ist veracht bei seinen Beinachbaurten/ wird zu dem Regiment nicht gut geacht/ wuͤrd von Ehrlichen/ gemeynnutzlichen Namenswuͤrdigen aͤmptern durch aller Gesatz einhelliges verbott abgewisen vnnd verschmehet: Bedacht/ daß der nicht taͤuglich eyner gemeyn forzustehen/ der jhm ein eygenen Herd zuversehen nicht getrawet: Welcher doch/ wie oben gedacht/ eins rechten Regiments andeitung ist: Ja ein ware Schul vnd uͤbung viler tugenden/ wie dann auch das Ehwesen auß tugend entspringet: sintenal <sintemal> durch diß Eheinig mittel die befleckte vnzucht verhuͤtet/ vnd Gotts huld erhalten wird: da vergleicht man sich mit einer Elige cui dicas, tu mihi sola places, vnnd rc <etc.> placas, Benuͤgt sich mit eyner/ wie der Himmel mit der einigen großgebeuchten schwangeren Erd/ die Sonn dem einigen Mon: Lebt also on eifer/ darff mit keim ande<<128>>ren vmb die Henn gobelen/ hat sein eygene Leibsguardi/ Hauß_gbaͤrin <Haußgbaͤrin> (doch kein Salomons Baͤrin) muttroͤsterin/ sein zweck nach dem er zielet: ziehet Ehehrliche Kinder/ darff sich deren nicht schaͤmen/ wie der Banckressen/ die jhm ein vnehr/ schmach vn̅ rach sind/ dieweil sie den namen des geschlechts jhrer Vorfaren/ den guten Leumund/ die ehrlich ersigte Wafezeichen/ gezierden/ Freyheiten/ vnnd Stammlehen/ nit mit ehren fuͤhren vnd erhalten/ man darff jhnen auß verbott der Gesatz nichts verlassen.

<Absatz 31> Derhalben O mein Heimen ehe/ Ducite ab vrbe domum, mihi ducitur vxor, Mopso Nisa datur, fuͤhre meim Grandgauchiher ein Haußschwalm heim/ die jhm ein Gesellin sey inn der Not/ seins hertzens ein Sessel/ seim Leib ein kuͤssen vn̅ elenbogensteurerin/ seines vnmuts ein Geig/ sein Ofenstuͤtz/ das ander Beyn am Stul/ die jhm auff dem Kopff helf tragen/ was er auff der Achssel tregt/ wie zwen vngleiche Todtensarcktraͤger: Die bei jhm auff dem Stul bleibt sitzen/ daß er nicht thu plitzen: die sein sparhaͤflin sey/ sein Fewr im Winter/ das mit gesottens vnd gebratens vmbgeben ist/ sein schatten im Sommer/ sein Mitzecherin/ seine Teckelwaͤrmerin zu seim Nabel/ wann jn der Baͤrvatter plaget. Die sich auff Alckestisch fuͤr jhren Mann darff inn todt begeben/ auff Spartanisch an jrs Ferrgnants statt sich inn gefengknuß stellen/ das gifft auß jhres Koͤnig Rotwerds Wund saugen/ mit jren henden die Ader schlagen: doch nicht auff Grandcardinalvellisch/ da mans auff Senecisch so lang laßt lauffen biß die Seel mit dem Blut auß dem Loͤchlein wischet: Ja sie darff jhm auffplasen/ mag jhrs Mausols Aschen vnd treck sauffen/ jhren Dauid zu eym Bild machē/ zum Fenster außlassen/ auff Schuͤtzisch <Schuͤtzisch/> <<129>> Euadnisch vnd Getisch zu jhm ins Fewr springen/ auff jhrs Abradots leib sich erstechen/ vor leyd jhrs Bruti gluͤend Kolen schlucken/ auff Eneisch eyn Kraͤtzen auß jhr machen/ die jhren liebsten Schatz auß Winsberg trag/ ab jhres Protesila schatten erschrecken/ inn jhres Amirals armen vor freuden verscheiden/ jhren Juni auff Tanisisch inn der Kist außfuͤhren lassen/ mit jhrem Fildloch <Füdloch> verwundten Fischer inn Larsee stoͤrtzen/ vor leid auff der Binen sich ertrencken/ vber Schnee vnd Eiß/ Stock vnd Stauden/ mit jhm ins Elend reysen/ jhne auff Sarisch nicht Clauß/ sonder Haußherr/ nicht Abraum sonder Herr Oberhaim heissen/ jhrem Keyser Friderich zu lieb kein Wein trincken/ an jhm jhren schmuck suchen/ jren Speriol/ eh er auß dem Hauß geht/ vor kuͤssen/ jm auß grosser lieb auch die Megd nicht vergonnen/ ja jhrem Hector die Bastart seugen/ nicht zu viel heyschig noch beissig sein.

<Absatz 32> Warauß wollen wir aber solche des Viues außbuͤndige Ehfraw schnitzen vnnd schnetzelen: Auß Eue Leymen nicht: aber vielleicht auß Platons Retpoͤblicheyt/ der Cisererbsen Oredner/ des Sturmen Notwilligtat/ des Vitrovini Archidecker/ des Curions Gram̅atico/ des Augustins Gotstatt/ des Hegendorffs vnnd Cantiuncul Juristen: Nein/ auch nicht/ warauß dann? auß Pirre hinderrucksinnigen Wackensteynen/ oder des Hanssachsen Hundsschwantz. Wie? treffen wirs nicht recht mit dem Ars ins kalt Wasser? Oui par messer: alsdann bleibt das gemecht beim geschlecht/ vnnd das geschlecht beim gemecht.

<Absatz 33> Alsdann wird sie jhrem Haußvatter alle geprechen/ on einen/ vbersehen/ vnd gedencken/ es sey kein Mann/ er hab eyn Wolffszan/ hat er anderst nicht das gantz Maul voll: wird er fluchen <fluchen/> <<130>> so wird sie segnen/ je wilder er/ je milter sie/ pricht er Haͤfen/ so pricht sie Kruͤg/ vnnd wie in D. Mentzers Naturgescheidem Ehezuchtbuͤchlein steht: wann er schreiet/ sie nur schweiget: ist er grim̅sinnig/ ist sie kuͤlsinnig/ ist er vngstuͤmig/ ist sie stillstimmig/ ist er stillgrimmig/ ist sie trost stimmig/ ist er wuͤtig/ so ist sie guͤtig: er ist die Sonn/ sie ist der Mon/ sie ist die Nacht/ er hat Tagsmacht/ was nun von der Sonnen/ bei tag ist verbronnen/ das kuͤlt die Nacht/ durch des Mons macht/ sie laßt keinen vnwillen zwischen jhnen einwerffen/ sonst wo die Erd sich zwischen Sonn vnd Mon einlegt/ so gibts finsternuß/ wann der vnwillen im Hafen zu vil will sieden/ bruͤteln vnnd grollen/ so hebt sie den deckel ab/ schafft jhm lufft/ gibt jhm ehe ein linds Erbsenbruͤlein ein/ welchs jhm den nahegelegenen harten Treck weiche: sie wird ein Wittenbergischer Muͤlsteyn/ gibt dem Mehl Sand zu/ sonst malen zwen harte Steyn nicht reyn: Er wird jhr Abgott sein/ das Bett jhr Altar/ darbei man die Schuh stelt/ darauff alle versoͤnung geschicht: Sein streich halt sie fuͤr Huldpfetz/ wie des Herbersteins Reusisch Haußjuckend Fraw die Beulen fuͤr liebsigel/ darumb mußt der Mann auch ob Tisch jhren ein Taschenmeulige vnd Maultaͤschige/ ein faustpaͤuderige vnd pauderfeustige Product abkehren. Seine schwerwichtige Cestische Fulcanische Holtzschlegelige Baͤrentapen (magna vi brachia tollunt) sind jrem Handtrucksame Bulerdaͤtzlin/ sein kropffstoͤß jhr Niderlaͤndisch Kuͤtzelttrutteln/ Sein zanck bei tag/ liebs anfang zu Nacht/ animantium <amantium> irae amoris pyrae, der Buler zorn/ der Bulschafft Sporn vnd Dorn/ liebs gram̅/ liebs flam̅/ liebs zanck/ liebs danck/ jhr lieb wachßt durch kieb. Wirfft er jhr schon alles im Hauß nach <nach/> so ist es jr/ als schiß ein Spanier Streuß<<131>>lin vnd Roßwassereyer nach jr: sein saur sehen/ ist jr als wann ein Vatter mit dem Kind mum̅els spielt: Trifft er sie schon auff die recht seit/ so hinckt sie auf der lincken/ trifft er sie auffs linck Aug/ so helt sie das recht zu/ nennt sie jhn schon nicht Laußknicker mit worten/ so zeigt sie es jm doch auß dem Bronnen mit fingern/ schlegt er sie heut schon vnschuldig auff die Eselshaut/ so gedenckt sie auff morgen es zuverschulden mit der Hundshaut/ dann sie weyß/ daß sie jhrs Leibs nicht maͤchtig ist: Beißt derhalben alles inn sich/ tregt den Mann nicht darumb auff dem Marckt auß/ sie geh dann ins Bad/ oder vnter die Schrannen: Vnd gewonet also gar seiner geschlachten art/ daß jr daß schwer leicht wird/ wie sehr sie es auch truck/ das saur suͤß/ wie vngern sie es auch schluck/ jhr wird auff Gaucklersweiß/ der Kopff die Fuͤß/ ait, aio, die gemaͤhet Wise ist jhr beschoren: Dann es ist kein tugend/ mit eim guten Mann außkommen/ sonder eim Boͤsen: Jhr wißt/ man loͤset kein Gelt zu Franckfort inn der Meß/ wann man schon lang ein scherlosen Krebs vmbfuͤhret/ sonder ein Loͤen.

<Absatz 34> Ja sie wuͤrd zu letzt gar in jhren Ehgejochten verwandelt/ geht er auß zum Wein/ so bleibt sie wie die Coͤlnische Weiber vnnd jhene vom zapfflosen Mann erschlagene Roͤmerin beim zapffen daheim: vnd darff/ wie des Plinij Fraw jrem Ehvogt/ jrem schwatz vnd Schatzgenossen zu lieb studieren vnnd Doctoriren/ seine Schrifften vnd Reimen außwendig lehrnen/ seine Gesang singen vnd springen/ vn̅ auff dem Seitenspil klingen: sorgt nicht wie D. Ges. Ehkuppel/ daß jr das Nachtfûter dadurch abgang. Schickt sich gantz vnd gar nach jhres Ehgegatten geberden/ wie der Wittebergisch Magister/ der seines Preceptors Schlaffhaub auff\satzt/ vnnd auff <<132>> Philippisch ein wunderlich Schrifft kratzt. Jst jhr Ehwirt froͤlich/ so frolockt sie/ Gott sey gelobt/ der Korb ist gemacht/ sie kan mit jhm weinen/ auch gleich wider lachen/ nach dem man auff der Papirmuͤl bald den zapffen fuͤrstopfft: Sein einfach gluͤck ist jhr zwifach/ macht er ein par Stuͤmpff/ so macht sie vier par Roͤck: welchen jhr Haußherr schilt/ den lobt sie gewißlich nicht/ die Bauren moͤchtens sonst mercken: Fluchet er/ so lechelt sie/ ist der Saul vnwirs/ zisch zisch Dauidlein/ daß die Kinder nicht schreien/ er schiset sonst ein Spiß nach jhnen: ist er truncken/ so thaͤdingt sie jhn ins Bett/ raumt jhm Stuͤl vnd Baͤnck auß dem Weg: Daß er dest baͤlder fall hinab die Steg: spart inn die Gesatzpredig/ biß morgens: thut jhm dann das Haͤuptlin weh/ so ist jr gleich allenthalb nicht wol/ klagt er sich wenig/ so fragt sie viel/ klagt er sich viel/ so fragt sie jn wenig/ noͤtigt jhn auff die Federn/ beredt jhn hinder den Vmhang/ fast den harn/ schickt zum Doctor/ pringt Schleyer her/ daß sie jhm den Kopff wie ein daubenfellig Faß vmbbind vnd vmbwind/ vmbreiff/ vnd vmbschweiff/ sie reicht jm auß jrer Reiffischen Haußapoteck/ jhr selbs geprant Wasser/ bereit Confect fuͤr den Schnupffen/ Husten/ Pfnissel/ Raud/ Grimmen/ Weinwe/ Durchlauff/ Augen/ Wuͤrm/ Fieber/ Prand/ deckt den Gauch warm zu/ daß die Gaucheyer nicht erfrieren/ gewermt Kirsenstein|secklin vnd erhitzigten genetzten Ziegelstein im sack zun fuͤssen/ vmbwickelt den Wunden finger/ hengt jn in die Schlingen/ bei leib das kein Mertzenlufft darzu gang/ den Nachtbeltz her/ die Socken vnnd Solen her/ wischt jm den schweiß ab/ so kehrt er jhr die Floͤh ab: fragt jn was jm schmackt/ vnd gibts jm nit/ wehrt jm der Mucken/ wann er hat Bremen/ streicht jm die Fuͤß/ langt jhm Krucken/ die Etsch<<133>>laͤndische Hund/ beruffet Jobs freund/ die jhn auß dem Podagram̅ischen Trostbuͤchlein trotzlich troͤsten/ vnd troͤstlich trotzen: sie giesset jhm das Suͤpplin ein/ schuͤttelt all augenblick die Pfulwen/ sperret die Laͤden zu/ verbawet den Lufft/ macht ein Rouch/ betast vnd schmiert den Puls/ zeucht jn auß vnd an/ greifft selbs zur Wunden/ truckt das Geschwer/ scheucht kein Pestilentz/ verbinds vn̅ salbts selbs: sein stinckender Athem von allen enden/ riechet jr wie Encian/ Specian Gruͤben dran/ meinet alle Maͤnner stinckē vnter den Vchsen nach Marter|treck/ vn̅ zwischen den Baurenzehen nach Jmberzehen/ sein Hechelbart ist jr wie Wollen: hoͤrt jhn selbs beicht/ holt den Pfaffen der den Wagē schmier| ehe er recht faren will: vnd will jn kurtzum̅ mit jhrer trewen pfleg dem Todt auß den Klawen reissen.

<Absatz 35> Secht ist da der Ehestand ein Wehstand? O neyn/ sonder ein bestand vnd beistand/ dann da ist er eben sie selbs/ vn̅ sie er selbs/ ist ein gehackt Muß/ Sie ist sein Handhab/ sein Haußhab/ sein Brustgesell/ sein Waͤrmpfann/ recht Kirsensecklin/ wie Dauid eins im alter begert: sein Haußehr/ Haußtrew/ Haußfreud/ Haußzierd/ Haußstern/ Haußmon/ sein Morgenroͤt/ wann sie spat auffsteht/ sein Abendroͤt/ wann sie spat nidergehet/ ja sein Gluͤck/ wann sie bald abgeht/ sie ist seins lebens labung/ Bettgenoß/ Lebensgespan/ sein KuchenKeyserin/ sein Besems_fuͤrstin/ <Besemsfuͤrstin> sein Kunckelgraͤfin/ Spindelsceptrige Windelkoͤnigin/ HaußGluͤck/ Haußduͤck/ Haußschmuͤck/ sein Schweitzerisch vnd Schottisch Leibsgwardi/ sein Dietartzt/ Mundsaltzerin/ Mundkoͤchin/ will er Krebs/ so kocht sie Zwibelen/ jßt er kein Kaͤß/ so jßt sie kein Wuͤrm/ wie jhener Francisci Kuttengenoß/ der wie der Frosch sich blaͤhet Ochssengroß/ vnnd lag auff der <<134>> Nonnen/ wann Franciscus im Stro lag/ aß keyn Beyn/ wann Frantz kein Fleysch aß: jßt ers gern kalt/ so macht sie es warm/ dann den Feberhafften gibt man das widerspiel: sie truchsessiert jhm zu seiner gewonlichen zeit/ daß so bald er heim kompt/ nichts gekocht sey/ sie gibt achtung was jhm fuͤr Kleider wol anstehn/ vnd jhne an jren geduncken schoͤn vnd thut die widersinnigen an/ hat acht auff was gestallt das Bett bereitet jhm mundet/ die Feder oben oder vnden/ oder inn der mitten vest/ so sticht er als dann vmbs best: auch was er fuͤr Gaͤst wol leiden mag/ welcherlei gesprech vnd Sach: sie ist sein Lustesseriger Senff/ sein senffiger Lust/ sein augenbeissiger Moͤrrettich/ sein weinender Augenbiß.

<Absatz 36> Ja/ so es war ist/ wie es war muß sein/ daß kein Gasterei vnnd Malzeit recht herrlich/ Herrschisch/ Xerxisch/ Persisch/ mutig/ rustig vnnd lustig sey/ wa nicht Frawen sind darbei/ so wird gewiß eim solchen Haußmann nim̅er an freuden abgehn/ angesehen/ daß er solche Tischmusic/ Prett vnnd Bettspiel augenblicklich vmb sich hat/ an der Tafel| <Tafel/> bei der Seiten/ auff dem Lotterbett/ oder Hobelbanck/ im Garten/ vnterm Baum/ neben dem Baum/ wie der Susanna zwen Alten/ nicht auff dem Baum/ wie die Teuffelsbraut mit jrem Kaltsamigen Stinckbraͤutgam/ Ja im Bad/ inn der Buͤtten/ auff dem Schrepffbanck/ inn der Senfften/ inn der Kammer/ mit welcher er vngehindert mag schertzlen/ stertzelen/ mertzelen/ kuͤtzeln/ kritzeln/ schmuͤtzeln/ <?> schwitzeln/ Pfitzelen/ duͤtzelen/ muͤtzelen/ fuͤtzelen/ fuͤrtzeln vnd buͤrtzeln/ so offt es jhn gelust zustuͤtzlen vnd zustuͤrtzlen.

<Absatz 37> Ach wann der lieben Ehegespilin etwann einmal jr nachtspeisiger Haußtrost/ Haußsonn/ Hauß<<135>>han/ Ehegespan/ auß den Augen kom̅et/ vnd vber Feld ziehet/ o wie sorgfeltig geleytet jhn die Andromache fuͤr die Thuͤr/ als solt jhr Hector mit dem Achille ein Kampff antretten/ O wie nasse Augen gibt es da/ wann es schon Speichel wer oder Zwibel|safft. Ja wann ers zuließ/ sie zoͤg mit jhm in Landsknechtischen Hosen/ wie Mitridats Gemahl wider den Teuffel ins Niderland/ auff daß sie jhren Alexander von Metz im weissen Badhembd am Pflug nicht verliere.

<Absatz 38> O wie ernsthafft betten gibt es alsdann fuͤr jn/ daß er wider gesund heimkomme: da bekompt man Witwens andacht/ die wehret biß sich eyner auffnestelt/ da lasset das gemeyn Gebett fuͤr jhn thun/ gedenckt seinen vber Tisch/ wann der Knecht an seiner statt liget: hat sie ein guts Bißlein/ so wuͤnschets sies jhm/ vnd gibts dann dem Pfaffen: O wie ein Penelopisch sehnen im eynoͤden Bett/ O wie schwere Traͤum hat sie von jhm.

<Absatz 39> Kompt er alsdann wider/ da ist freud in allen Gassen/ da darff sie sich wol verkoͤstigen/ vnnd wie die Noͤrenbergischen Weiber ein Kreutzer zum Bottenbrot verschencken vn̅ fuͤr ein plappart Zwibelfisch kauffen zu dreyen Trachten/ da ruͤffet sie den Nachbauren/ Frewet euch mit mir/ dann mein Groschē ist gefunden/ Mein Sau ist wider kom̅en/ da rûst man/ da verduͤst man/ da streiet man dem Palmesel Zweig vnter/ da macht man die Thor weit/ daß der Haußkoͤnig einreut/ laufft jhm mit zugethanen Armen entgegen/ die Toͤchterlin sitzen jhren auff dem Arm/ wie die Moͤrkaͤtzlin/ die Soͤnlin hencken am Rock/ wie die Aefflin/ vnnd ruͤffen all Brot/ Brot/ so fragt sie nach dem Kram/ bald nimpt sit <sie> jhm den Mantel ab/ bringt jhm ein frisch Naßtuͤchlin/ tregt das beste auß dem Hackstock <<136>> auff/ das sie von seinetwegen nicht hat essen moͤgen| <moͤgen/> macht jm mit den Kindern ein kurtzweil vor dem Tisch/ Guck Vatter vnser Soͤnlin/ mit dem Satinlin/ wie wachßt es so sehr/ die Ermel seind jhm zu kurtz/ es bedoͤrfft wol ein anders Roͤcklin: da ist er erfreut/ als kaͤm einer vnd brecht jhm nichts? Flugs bringt die Magd ein Fußwasser/ da schuͤrtzet sich die Fraw/ kniet zum Kuͤbel/ waͤscht jhm die Zaͤhen/ trocknet jm die Schenckel: vnnd solchs warumb? Darumb (wie Joan Andreæ der Jurist in c. literas, in verb. incert. de restit. spol. cum concord: meldet) weil er jr Haupt vnd Ehelicher Bapst ist/ vnd auff daß er sie weniger oder gelinder vnnd sauberlicher mit fuͤssen trett: Dann wie gedachter Doctor sagt/ ist sie auch von Rechtswegen schuldig sein Kuchenlump zusein/ daß sie jhm koch/ weil er sie speißt/ jhm das Bett mach/ weil er muͤh hat/ jhm das Bad waͤrm/ weil er sie auch waͤrmt/ jm ein frisch Hembd lange/ weil er jhr zum ersten das Hembd auffhub/ ja sie butzt jhm die Schuch/ fegt die Kleider auß/ hengt die Hosen auff/ waͤrmet das Bett/ reicht jhm die Schlafhaub/ da wiget sie das Kind/ da wehet der Wind/ da ligen wir beide alleine/ alleine/ daß man die Huͤnerbruͤ verdiene. O wie ein koͤstlich ding ist das Naͤchtlich singen zur Wiegen/ es vertreibt das Gespenst: Merckts jr Maͤnner/ vnd singt wann jhr auff der einen Seiten wieget/ daß es zum Discant stimme/ wann sie auff der anderen Seiten gigaget vnnd knappet/ klopffet an die Kammer/ so schweigen die andern junge schreiling so lang still/ biß sie es vergessen: O die Kinder singen offt wie einer durch ein finsteren Wald/ mit forchtsamer freud vnd freudiger forcht/ das eine jnnerlich/ das ander eusserlich. <<137>>

<Absatz 40> Vnd was ists wunder/ daß die Weiber so fein wissen mit jhren Ehegetrauten vmbzugehn/ demnach sie es doch von jugend auff mit Docken vnnd Puppen Spielsweiß also gewohnen/ daß sie nachgehends inn der Ehe auch solche Poppenspiel mit jhren Ehegepareten uͤben: dardurch sie dann jhr Gegenlieb erwucheren/ vnnd nach Biblischer Sprach zureden/ jhnen das Hertz stelen/ vnnd das Lauff mir nach geben: Also daß der Mann jr gantz geheym wird/ jhren viel vbersicht/ jre Mengel fuͤr holdselige Kinderfehl rechenet/ jr Geschwetzigkeit fuͤr ein Mittel sein letzmûtigkeit zu linderen/ jhr Zunggaͤnge geschwetzgirigkeit/ fuͤr ein foͤrderliche vnterweisung die Kinder durch uͤbung bald reden zulehren/ ehret <ehret/> nehret vnd mehret sie/ trucket vnd schmucket sie. Welche Ehr des Schmucks jnen doch Viues wider der Spanier art will abstricken: Ach es gereuet darnach den guten Mann/ wann er jhr etwann zu vnseuberlich hat den Schleyer geruckt/ haͤlt jhr die Kindbett des besser/ vnd gonnet jr desto ehe die ewige rhu.

<Absatz 41>

Dargegen ist dise Nadelveste Ehegefaͤhrtin aber nicht faul/ spinnet jm Hembder darfür/ nehet jhm reine Kraͤgen/ mit Toppelkroͤsigen Kesselringen/ macht Leilach/ Bettgewand/ Tischtuͤcher/ Teppich/ Vmbheng/ Schalaunen/ Decken/ Ziechen| <Ziechen/> Zwelen/ Hand vnnd Schnaubtuͤchlein/ Windeln/ alles auß des Manns Gelt/ ordnet den Haußrhat auff alle Euclidische Ecke nach dem Schwadrangel/ wie die Jungfrawen die Schleyer auffsetzen/ hat jhre Hafenschaͤfft (welcher ordnung dem Jschomach bei dem Xenophon gar wol gefallen) jhr durchsichtig Zinnkensterlin/ jhr Kesselhenck/ jhr Schrepffhoͤrnlln/ <Schrepffhoͤrnlin/> jhr Orgelpfeiffen von Schaum|loͤffeln vnnd Hafendeckeln/ jhr Fischsecklein blaw <<138>> vnd weiß eingetheylt wie ein Brettspiel/ jhr Salomonische Leuchter/ jr Federwerck/ jhr eingebisamt Schmuckladen/ jr Stangen voll gesottener Garn|strengt/ jr Gewelb voll Flachs/ jhr Stuͤl/ Sidel vnd Schemel nach Reichstaͤgischer session geordenet: etlich vnd dreissig Saltzfaßlin <Saltzfaͤßlin> vnnd Schuͤsselring/ die man zu eim Jar treimal reibet/ jr Pfannen/ jr Kannen/ jr Becken/ jr Fischplatten/ jr taͤglich vnnd feyrtaͤglich/ ja Festtaͤglich/ Ostertaͤglich/ vnd Kottfleischgaͤstlich Teller/ jr Kindbettfestlich Kuͤssen vn̅ Silbergeschirr: sie verwahrt jr Kastengeraͤht vor Motten/ henckt jaͤrlichs jr Kleider in die Mertzensonn/ saltzt das Gethuͤch ein/ Lauandelierts vnnd einspicknardisierts: da bessert sie das zerrissen/ dort zerreiß sie das gebletzt/ da bletzt sie das zerbrochen/ da zerbricht sie das gespalten: Allzeit findt man sie wie Lucretiam vber der Spindel/ wann schon Tarquinius bei Nacht kaͤme: sie manet den Mann bei| zeiten einzukauffen/ erinnert jhn von dem das abgeht/ er manet <ermanet> jn zu dem was zugeht/ dann sie koͤnnen gute Haußrhaͤt geben/ wie Sara jrem Mann <<139>> mit der Magd/ daß er von jr solt samen erwecken.

Lucretia am Spinnrocken

<Absatz 42> Sie geht im Hauß auff wie die Sonn/ ist des Hauses Lucifer (Gott behuͤt vns) versicht das Vihe/ melcket die Kuͤ/ <?> weckt die Laͤn wie der Han fruͤ/ schickt die Knecht ins Feld/ schaffet den Maͤgden jr Tagwerck/ ist die vnrhu in der Vhr/ ein lebendiger Haspel vnd Bratspiß/ des mans Muͤl vnd vnrhuͤwiger Beutelsteck/ ist ein HaußSchneck/ traͤgt das Hauß am Halß/ ist sie schon leiblich drauß/ ist sie mit sinnen zu Hauß/ dasselb ist jr Niniueisch großstatt/ jr liebgebannte hofstatt/ jr einiger spacierplatz/ jr Dantzboden/ jr Lustgarten/ die Thuͤrschwell halt sie fuͤr jr heylig verbotten Romulisch Maur/ daruͤber sie zuschreiten jren mehr als Remus ein gewissen macht: ohn sein willen geht sie nicht auß/ ist nit raͤßzuͤngig/ tachtropfig/ widerbeffsam/ auffruckig/ Adelstoltz/ treckbatzig/ schmaͤh/ zornkaͤuig/ kleyderpraͤchtig/ Heimsteurruͤhmig/ Gallkallig/ Wortstichig/ Wurmstichig/ Stichwortgelehrt/ freundtschaffttrotzig/ Redscharpffig. Jst kein Schandhipischer Haußhagel/ der nach dem Donnern auch den Regen mit Bruntzscherben vn̅ Scheißkacheln jhrem Man Saukratz Pfannkratz vber den Kopff abschuͤttet/ sie ist ein <kein> Pestilentznebel/ kein Haußrauch/ nit Taubschreisam/ prediget nicht vber die Stund/ man bringe jr dann ein Stuͤlchen. Darumb Bruder Naß nicht vnrecht sagt/ daß die Weiber in dem fall fast Lutherisch sind/ lieber predigen/ dann Stillmeß hoͤren/ aber sonst inn anderm Bettgeluͤbde besser Catholisch/ mehr auff die Werck dann den Glauben halten. Sie vergißt auch bald alle Schmach/ fuͤrnemlich wann die Federen stieben/ allda die recht Virgaplaca/ der rechte Bettanstand vnd Rutenfridigung regiert/ on der Athener Eherichtiger/ vnnd der Spartaner Harmoneiischer <?> Harmosiner vnd Eheversuͤner. <<140>>

<Absatz 43> Was soll ich weiter sagen? sein Hertz darff sich auff sie verlassen/ da regnets dann eitel Gluͤck/ daß man im Treck sitzet biß vber die Ohren/ da schneiet vnd hagelt es mit Gelt zu/ das es Beulen gibt/ da sitzt Sanct Peter auff dem Tach/ wirffet Bieren herab/ vnnd Sanct Claus faul Oepffel hinauff/ da bauet man/ da brauet man/ da gedeiets wie Hundisch Trauben/ spritzen hinden wider herauß: dann gewiß zwo getrewe Eheversipte Hende/ foͤrderen mehr als acht frembde: da gehen die Staͤtt auff vn̅ das Land ab: dieweil ein solche Ehemuter ist wie ein Kauffmanschiff auß Jndien/ welches Gold vnd Specerei bringet. Jr Liecht verleschet nicht/ wa Oel genug ist: sie hat notturfft inn der Not/ vorsihet wie ein Sternverkuͤndiger die Theurung/ versorget sich wie ein Omeyß vor dem Winter/ brauchet den Sommer wie die Haͤuschrecken/ froͤlich weil mans hat/ hat man nichts/ so sauget man die Tapen/ sie verwahret das kein Regen noch Schnee jr Hauß schaͤdige/ traͤchet das Fewer zusamen/ beschleußt Thor vnd Thuͤr/ die letzt schlaffen/ die erst auff/ schlaffet mit offenen Hasen_Augen/ ist die Ganß im Capitoli/ Anser vigilantior cane, ist der Samier Schaf/ welches den Kirchenraͤuber Apollinis verrhiete mit Blaͤhen vngesehen/ ist gewarsamer als ein Kettenhund/ vnd daß ichs alles beschließ/ bringet jren Man zu Ehren: wer wolt sie dann nicht wider Ehren? <<141>>