Gkl:text:kap33

Das Drey vnd dreissigst Capitel.

Wie Vlrich Gallet zum Koͤnig Bittergroll ward gesand/ vnd vnterwegen erwog der Regiment Stand.

(1) S O bald die Brieff angeben vnd geschriben gewesen/ verschafft Grandbuchier daß Vlrich Gallet sein Secretari/ ein weiser vn̄ bescheidener Mann/ dessen tugend vnnd rhat er inn mancherley vnd zweiffeligen sachen erfahren/ zu dem Picrocholo ward abgefertiget/ bei jhm/ was im engen rhat beschlossen worden/ einzubringen.

(2) Er als ein verschmitzter Welt vnnd Eißvogel/ flick auff stuͤck vnnd tuͤck/ der etwann auff dem Eiß/ wann der Rein vbergefrorn/ gemacht war worden/ halb wuͤllen vnd halb haͤrin wie des Juden Grama/ vnd etwas beredter als die zur Hochzeit laden/ bedacht sich auff Janisch hinden vnnd fornen/ auff daß jhn kein Storck am Kopff noch Schopff nirgend weißget/ wie sich die Meidlin spiegelen: Er|wag es auff vnd ab/ gieng hin in gedancken wie ein Hund inn Floͤhen/ spintisirt wie die Muck die wand aufflauff/ vnd redet wie ein Comedischer gesanter vom Himmel mit jhm selber. O wie gehts so vbel zu/ wa freuel die Trommen schlegt vnnd hoffart das Faͤnlin tregt. Wie wer manchem so wol/ wann ers wißt: aber wann der Fuchß einen schlaffenden Loͤwen an backen schmeißt/ billich er jm den Balck zerreißt: wann ein Schaf den Wolff will wecken/ muß es auch das Fell darstrecken: Da heißt es/ wer den Kopff bekompt/ der schaͤr den Bart: Vnnd will man da Wecken einschlagen: so muß man warlich darauff schlagen. Aber wie gar ist kein freud ohn <413> leid/ es verlirt eh einer etwas beim dantz/ Reyen vn̄ frewen pringt rewen/ frewen am Morgen/ pringt zu abend sorgen/ die helle Morgenroͤt/ pringt offt ein wuͤßt Abendroͤt: Vnd je hoͤher je gaͤher/ je hoͤher je mehr dem fall naͤher/ je hoͤher/ dest schwindelt eim eher: also sorg ich gar/ des Picrocholi lust werd jhm noch zum vnlust/ sein steigen zum neigen/ sein Obohe zum owe/ sein jauchtzen zum aͤchtzen. Dann Risende Boͤren fallen gern inn die pfitz: Aber er thut erst seim namen Bittergall vnd Gallbitter genug wie Nabal: Es solt einer noch nicht woͤllen Peter heissen/ weil jhn die Sachssen Bitter nennen: gleich wie jene Witfraw kein Andres mehr wolt/ weil sie mit jhrn Enderskoͤpffen offt vber Peterskoͤpff sein. Aber dise des Pickerocholts grewlichkeit belangend| <belangend/> hat er dieselb nur damit gelehrnet/ daß er von jugend auff die arme Kaͤßmaden also lebendig gefressen hat/ meint also/ er muͤß allzeit dahinden anfangen/ weil am Krebs der schwantz dem kopff gleich ist: Gleich wie Keyser Caligula auch allein auß schlechtem anfang so grewlich ward: nemlich/ weil er von Saͤugammen saugt/ welche die Wartzen von den Duͤtten pflegten zureissen/ vnnd weil er so gern Menschenblut von Tolchen lecket. Nun wolan/ so fahr er an/ der Ambos erschrickt nit vor dem Hammer: wer gern zuthun hat/ dem gibt Gott zuschaffen/ vnd/ wie man sagt/ dieweil die Weiber allzeit muͤssen klagen/ darumb schickt jnen Gott allzeit plagen/ auf daß sie haben zusagen: Wer dir dz hauß abpricht/ dem biet zutrincken/ dann er hat muͤh <muͤh.> Es ist dannoch wunderlich/ daß der aͤltst Philosophus Pythagoras/ dessen Seel (wie er sagt) in mancherley Menschen vnnd Thieren vmbgewandert ist/ pflegt zusagen/ es sey jhm viel besser gewesen/ da er ein Frosch/ als da er ein Koͤnig war: Gewißlich nur <414> darumb/ dieweil die Froͤsch nit im Moͤr/ da es stets vngestuͤme gibt/ wonen/ sondern inn Seen/ Pfuͤtzen/ kleinen Baͤchlin vnd darzu nur am gestad/ vnd nur gern inn dem Land/ da fromme Leut sind/ darumb sind sie nicht inn Engelland/ darumb sind auch die Haͤuser gluͤckhafft/ darauff die Storcken nisten/ dann sie tragen Froͤsch hinauff: vnd darumb ist der Storck from̄/ dieweil er Froͤsch jßt: gleich wie der Rapp diebisch/ weil er Diebsfleysch frißt: Vnd die Cartheuser dumme vnd stumme vnflaͤter/ weil sie eitel flegmatische Fisch fressen: Vnnd die Pintzgaͤwer kroͤpffig/ weil sie faul Wasser trincken: Vnd die Sachssenkerles Falbbaͤrtig/ weil sie Bier sauffen: Vnnd die Frantzosen schwartzbaͤrtig/ weil sie gern starcken Wein leppern. Aber an Spanniern fehlets/ die essen gern weiß Brot vnnd kuͤssen gern weisse Meidlein/ vnd sind sie stiffelbraun vnd Pechschwartz wie Koͤnig Balthasar mit seim Affen. Aber wider zu vnserm Thoren vnnd Morenkoͤnig inn Moria/ ein Koͤnig ist wie die vnrhu inn der vr/ ja wie das Schiff auff dem Moͤr/ das die Wind vnd Wellen jetz dahin/ jetz dort hinauß stossen/ darumb nannten die Alten Cimbrer vnnd Triballer das Schiff ein schweiffend Wetterhauß: Vnd darumb reimt ein Poet Jfgem in der Audientz des Keysers sehr wol <wol.> Daß man vil rauherer Wind/ auff hohen Bergen als im Thal find/ im hohen Moͤr gebs groͤsser Gewitter/ als im Rein vnnd stuͤrtzt vmb groͤsser Guͤter/ wer viel versicht/ denselben vil sorg anficht/ wer grosses verricht/ auch grosses pricht/ wer viel besitzt/ auch vil beschuͤtzt/ wer hoͤher vnnd naͤher der Sonnen sitzt/ auch meher schwitzt: was deiten viel Trabanten/ als vil gefehrlichkeit vorhanden? was deiten vil Knecht/ als vil gefecht? besoldete Freund/ besorgte Feind/ vil Volcks vil wachen/ vil Rhaͤt vil <415> sachen? muͤssen andere beschuͤtzen/ vnnd selbs inn sorgen sitzen: Sorgē auff borgen/ vn̄ borgē auff sorgen: sorgen wie die Hund/ die bellen den Mon an/ meinen er woͤll ins Hauß steigen: Wie die Hasen mit sorgen schlaffen. Vnd die Esel mit sorgen sauffen/ dann sie doͤrffen die Gosch nicht recht inns Wasser stossen/ foͤrchten sie netzen die Ohren/ so lieb haben sie jhre schoͤne Ragoͤrlin/ wie die Katz jhr Jungfrautaͤplin: da hingegen ein Gaul das Gefraͤß hinein biß vber die naßloͤcher stoßt/ das er das wasser wie ein Walfisch von sich blost. Ey ja Ohrentrager/ versteckst wie der Strauß den Kopff/ vnd entdeckst das loch. Ja wol/ geraht wol pfeiffenholtz/ ich pfeiff dir ja wol darzu/ oder du wirst zum boltz. Warumb legst nicht auch/ wie das Zaunschlupfferin/ die kloͤlin auff das haͤuptlin/ das nicht der Himmel auff dich fall? Vnnd stehst auff eim Fuß wie ein Kranch/ das nicht die Erd beschwerst: vnd sauffst Wasser/ dz nicht der Wein theur werd? Vnnd fressest Erd/ wie ein Krott/ die sorgt die Erd werd jhr entgehn/ vnnd meint/ sie hab die Erd im Suͤndflut in jhrem Bauch erhalten/ vnnd woͤlls noch thun. Ja wisch das Gesaͤß an die Hecken/ daß nicht das Haͤu vertheurst? Vnd heb die fuͤß wol an dich wie der Han/ das kein Pferd im Stall trettest? Was frag ich nach den Voͤgeln/ die mir vber den kopff fliegen. Will das holtz nit zun Pfeiffen gerhaten/ ich Pfeiff jm dann wol/ so will ich singen/ so gerhats zum boltz. Es heißt/ Sitz auff den arß/ so tregt dir kein Mauß kein Stro drein. Aber Herr <Herrn> sind Katzenart/ streicht man sie glatt rucken ab/ so recken sie den Schwantz/ streicht man sie widerporstig hinauff/ so Funckelen sie/ Darumb schreibt gegedachter <gedachter> Reimist recht/ gute Rhaͤt haben der Prophetin Cassandre gluͤck/ deren der Apollo die <416> gab verlih warzusagen/ aber bey dem Volck nicht warzuglauben: darum wer (wie Euripides sagt) gut das Phoebus selber rhatet vnd warsaget/ weil er nach niemand fraget: Grosen Herrn vnnd schoͤnen Frauen/ soll man wol dienen vnd vbel trauen/ dann jhr beyder lieb hat Sonnenart/ faͤllt so bald auff ein Kuͤtreck als auff ein Rosenblatt. Ach ist diß nicht ein ehrlichs erbieten/ werfft mich nicht zum Fenster auß/ sondern die steg hinab. Ja lieber Hoffman/ der einen heißt die steg hinauff tretten/ der kan einen wider heissen hinab schmettern/ ziecht man dich mit Haaren hinauff/ so ziecht man dich mit den Beynen herab: Bist zur stubenthuͤr hinein gangen/ so fal zum fenster Laden wider hinauß: Sey nur froͤlich vnnd lach nicht/ fall die steg ein vn̄ rumpel nicht: Jedoch/ empfangens auch die Herrn als dann/ wie sie es außgeben: ruffen sie Hotta/ so gehts Wust: da gibts dann beydes Et Caesar & Nolo: doch bleibt er staͤts das Haupt seiner Laͤuß etc.

(3) Dises vnd noch meher bedacht vnnd handelt vnser abgesandter Hoͤralt Herr Gallet mit jhm selber biß er fuͤr den Furt zu Vede kam/ da erkuͤndigt er bey dem Muͤller/ was es fuͤr ein gestalt mit Koͤnig Picrochol habe: der zeigt jm an dz jm desselbigē Volck weder Han noch Hen̄ gelassen/ vnd sich in Clermaltburg geschlagen hette: Vnnd daß er jm nicht rhaten wolt ferner fortzuziehen/ vonwegen der Wacht/ dann sie weren Teuflisch wild/ fressen die Nuß vnauffgeklopfft/ vnd schissen die Kirsenstein gantz von jhnen. Welchem er leichtlich glauben gab/ dann er kant den Han auff seiner Mist/ vnnd plieb derwegen vbernacht bey dem Muͤller. Morgens fruͤ fuͤgt er sich zu dem Schloß/ pließ vnnd schwung die Trommet dreymal vmb den kopff/ <416; recte 417> ritt zu der halt: vn̄ begert mit dem Koͤnig zuparlamentierē/ Welchs als es dē Koͤnig angesagt ward/ ließ er jhn nicht in die Statt/ sondern hieß jhn vor der Statt auff dem Bollwerck seinen warten. Da kam er vnnd ruͤfft jhm/ Was neues da sey? Was ist dein anligen? Wo scheißst her? Hierauff trug seine Sach der Legat fuͤr wie folget.