Gkl:text:kap57

Das Siben vnd fůnfftzigst Capitel.

Jnnhaltend ein Knochenknorrig/ Scrupescirphisch vnd Gewuͤlckwickelig Rhaͤterisch Raͤtzel nach Warsagerischer einflecht/ inn worten schlecht/ vnnd im sinn recht/ das erraͤtzelet vnd errhatet recht/ ehe jhr das end gar secht. <<556>>

(1) J R Armen Menschen/ die stets harren
Auff gluͤcklich zeit/ wan die kom̄ gfahrn/
Erhebt nun ewer girig gmuͤter/
Vnd hoͤrt mir zu/ was ich euch fider/

Das ist/ was ich euch jetz dictier

Mit der Feder auff diß Papyr.

Wan man soll fuͤr gewiß gantz glauben
Daß Menschlich sinn so hoch sich schrauben

Daß sie auß dem Gestirn dort oben

Oder auß viln vorgangnen Proben

Moͤgen was zukoͤnfftigs vorsagen
Von dem/ was sich hie werd zutragen:

So geb ich zuverstehn nun euch/

Daß eben jetz den Winter gleich/

Ja eben hie inn disem Land
Da du nun stehst vnd ich nun stand

Auffkommen werd ein art von Leuten/

Die also wird Fraw Vnrhu reuten/

Daß sie kein Rhu nicht werden haben/
Sonder vngscheucht herumbher traben

Bei hellem tag/ vnd sich bemuͤhen

Allerley Standes Leut zuziehen

Auff jr weiß zu Rotten vnd Trennung/
Zu streitig Partheischer meynung.

Ja welche jnen geben werden

Gehoͤr vnd glauben/ wie sie bgerten/

Die werden sie gleich/ vngeacht/
Es kost gleich gelt/ gut oder Macht/

Bringen dahin/ daß die Verwandten

Vnd besten Freund/ on schew all schanden

Werden gantz trotziglicher massen
Jn offnem streit sich ein da lassen:

Ja kein schand werden die Soͤn schaͤtzen

Sich dem Vatter zuwidersetzen. <<557>>

Auch werden die von Hohem Stammen
Erfahren/ daß sich thun zusammen

Wider sie jre Vnderthanen

Vnd gegen sie sich starck auffmanen.

Alsdan wird sein inn solcher Wuͤtung
Kein vnterscheid der Ehrerbietung.

Dan ein jeder wird alsdan sagen/

Jeder soll vmb das sein sich wagen/

Man machets hie keim anderst nit/
Was der ein stoßt/ der ander tritt/

Man hebt es auff nach dem es fallt.

Vnd wer dann nicht mehr solcher gstalt

Bestehn mag/ der mag dan außstehn/
Vnd darnach wider herbei gehn/

Vnd sich versuchen auff all Weg

Daß er die schand einbringen moͤg.

Hieruͤber wird sich dan begeben
Ein solches auff vnd ab da schweben/

Ein solches hin vnd wider lauffen/

Ein solches keuchen schwitzen/ schnauffen/

Daß dergleichen Auffrhur/ Erregung/
Vnd widerspaͤnstig Widerlegung

Kein History nie hat gemeldt

So wunderlich wird sein die Welt.

Bald wird man auch erfahren dan
Daß mancher feiner kuͤner Man

Durch sein jung Gmuͤt vnd hitzig Gbluͤt

Verreitzt/ darin also verwuͤt

Daß er sehr kurtz darvon wird sterben
Wan er noch ist im Mitteln werben.

Auch wird keiner von disem Werck

Daran er einmal setzt sein staͤrck

Ablassen/ er hab dan zuvor
Getriben ein selsam Rumor/ <<558>>

Vnd lang gewuͤt vnd lang gewuͤlt/

Alles mit Neid vnd Streit erfuͤllt/

Den Himmel auch mit Gschrei zun Noͤten/
Die Erd mit Tritten vndertretten.

Alsdan werden zur selben zeit

Gleich so vil gelten Trewloß Leut

Als die so warhafft vnd getrew/
Jr beider Glaub wird da stehn frey.

Dann sie all werden sich befleissen

Gantz gefaͤllig sich zuerweisen

Dem vnverstaͤndigen grossen Hauffen/
Auch jren Glaub auff jhn nur schrauffen.

Also daß vnder jnen auch

Der vngschickst wird zū Richter braucht

O der schaͤdlichen Schwaͤm̄ vnd flut/
O der Muͤhlichen Suͤndflutrut.

Ja wol wird sie ein Flut genent:

Dann dise Muͤh nim̄t ehe kein end/

Noch die Erd wird jr nit ehe gledigt/
Biß daß sie mit gewalt außnoͤtigt

Vil Wassers/ welchs ploͤtzlich mit hauffen

Hin vnd wider herab thut lauffen/

Darmit diselben/ so am meisten
Jm streit groß muͤh vnd arbeit leisten

Werden durchfeuchtet vnd genetzt/

Vnd billich darmit so verletzt

Weil jr Gemuͤt zu disem streit
So gar durchbittert ist mit Neid

Daß es keinem kurtzum̄ vergibet

Vnd kein Barmhertzigkeit nicht uͤbet/

Auch nit gen der Vnschuldigen schar
Des Haußviechs/ welchs vns ist dinstbar:

Also daß sie on alls erbarmen

Von jrn Adern vnd wuͤsten Daͤrmen <<559>>

Zwar kein Opffer den Goͤttern pringen/
Sonder ein schnoͤden prauch erzwingen/

Zu taͤglichem dienst der sterblichen

Vnd der taͤglich zerscherblichen.

Nun laß ich selber euch ersinnen
Wie dise ding all zugehn kuͤnnen/

Vnd was des Runden Gbewes Leib/

Die Himmelsrund gewelbte scheib

Bei solchem vnrhuͤwigem keib
Fuͤr Rhu koͤnn han/ vnd was sie treib.

Doch sag ich/ daß die allerbesten

So sie bhalten am aller mehsten

Am meysten dahin werden walten
Sie vnverderblich zuerhalten:

Doch also/ daß sie sehr mit fleiß

Auff ein sonder Manier vnd weiß

Sich werden aͤngstlich fast bemuͤhen
Gefenglichen sie einzuziehen/

Vnd inn ein dienstbarkeit zubringen:

Also das die/ die man thut tringen/

Vnd aͤngstigen vnd niderlegen/
Vnd jagen hin vnd her mit schlaͤgen/

Nicht haben wird/ zu dem sie flieh/

Als dem/ der sie gemacht hat hie.

Ja wans zum aͤrgsten mit jr staht
Wird die Sonn/ als wans nidergaht/

Ein Fisternuß <Finsternuß> lan vber sie/

Die dunckler dan kein Nacht ward nie/

Oder als kein Eclypsis nit/
Vnd alsdan wird sie gleich darmit

Jr Freyheit sam̄t dem Schein von Him̄el

Verlieren in eim tieffen Schimmel/

Oder zum wenigsten verlosen
Bleiben inn der Einoͤd verstosen: <<560>>
Aber zuvor vnd ehe sie bstand
Der Vndergang/ der schad/ die schand/

Wird sie ein lange zeit erzeigen

Ein hefftig groß Erbidmen/ neigen/

Ja so gewaltsam sich bewegen
Als der Berg Aetna sich thet regen

Da er geworffen ward von hinnen

Auff einen der Titanen Soͤnen/

Oder als wan Typho der Rieß
Die Affen Jnsul ins Moͤr stieß:

Also wird sie inn kurtzen stunden

Bald inn leidigem stand befunden:

Auch so veraͤnderlich/ das die
Welche nun han erhalten sie/

Doch sie denselben werden lassen

Die nach der hand sich drumb anmassen.

Folgends geht an die rhuͤwig zeit
Welche stillt den langwirigen streit:

Dan die gedachten grossen Wasser

Welche sie machen je meh nasser

Thun sie dermassen sehr bemuͤhen
Daß sie muͤssen einmal abziehen.

Vnd gleichwol/ ehe man also weicht

Sicht man/ daß in den Luͤfften leucht

Ein scharffe hitz/ welche ereugt
Ein grosse Flam̄/ die drum̄ auffsteigt/

Damit der Wasserflut sie wehr/

Vnd diß wesen einmal auffhoͤr.

Nach allem/ wann diß nun vollfuͤhrt/
Weiters zuthun sich nicht gebuͤrt

Als daß die Ausserwehlten dann

Mit alln Guͤttern vnd Him̄lisch Mann

Werden erlabet auff die Schlacht/
Vnd zum vberfluß Reich gemacht <<561>>

Mit wolgebuͤrlicher Verehrung

Vmb jre wol erzeigt bewaͤrung/

Auch etlich zu letz außgezogen/
Vnd diß wird billich so gepflogen

Damit so dise muͤh vnd fleiß

Sich endet auff ein solche weiß

Ein jeder hett zu seinem heil
Sein vorbestimpt vorsehen theil:

Jnn massen solchs bewilligt ward.

O wie wird der zu jeder fart

Geehrt/ so biß ans End verharrt.

(2) A LS dise Antiquitet ward außgelesen/ holet Gurgelstrozza etliche tieffe Seufftzen daruͤber/ vnd sagt zu den Vmbstehenden. Nun seh ich/ es ist der brauch nicht erst heut auffkommen/ daß man die/ so zur Euangelischen erkantnuß schreiten/ verfolget: Aber wol dem/ der sich nit aͤrgert/ vnd von fleischlichen Affecten vnd neigungen vngehindert vnd vnbetruͤbt/ allzeit nach demselben Zweck zilet/ welchen vns der trewe GOTT/ inn seinem Sohn vorgesteckt hat. Darauff sagt Bruder Onkappaunt: Jhr holts maͤchtig tieff: was meynt jhr andere/ daß durch diese Aenigmatisch Rhaͤtsal verstanden werd? Errhatets/ so wirds ein Gerhatsal. Koͤnt jhr sonst Validos Veneris perumpere nodos, so entnodiert vnnd beißt mir diesen verknipfften Knopff auch auff/ habt jhr anderst gut scharff Naͤgel vnnd spitze Zaͤn. Hie uͤbt euch jhr Knoͤpff vnd Knebel in Waͤmstern/ jr Knorrenspalter/ jr Knochenspilterer/ jhr Marckbeinsauger/ jhr Gordiknoͤpff hawer. O Alexander Magnus hat maͤchtig groß Ehr mit Loͤsung des Gordischen Gurtenknopffs eingelegt/ daß man ein Verbluͤmt Emblema vnnd Diuis hat drauß machen muͤssen/ da ein <<562>> Sebel inn eim Zweiffelknopff steckt. Ja hindenauß/ wie die Kuͤh Seychen: Jeder SchweitzerBaur hets mit seiner Fochtel auch also auffloͤsen koͤnnen: Auch koͤnnen noch zur Knopffnot die Fuhrpech mit jhrn Sebelmaͤsigen Karrenmessern/ vnnd die Fischer mit jhren Salmenploͤtzen sehr fertig die Notknoͤpff auffnoͤten vnd aufftoͤdten/ wie ein Nuß mit dem Arß: Auch war Gordius/ der denselben Knopff vergurtet hat/ vnnd seiner verknipfflichen Knoͤpffigkeit halben Koͤnig der Phrygen ward/ ein Fuhrman gewesen/ vnnd hat so wacker als der best Gespan anschirren koͤnnen/ wie der im Geistlichen Fuhrwerck. Mein Vatter aber schlug mich darumb wann ich mein Nestel der gestalt auffthat/ ob mich auch schon ein angstscheissige Leibsnot bestund/ oder ein traͤppelende Scheiß anstieß. Aber meim Schulmeister wars erlaubt/ wann ich inn Noͤhten auß sorg der Lochfegung mein Nestel auff allen Ecken/ Schantz vnnd Schwantzwehren/ mit Notknoͤpffen verknipfft/ der schnitt sie mir so lustig auff daß ich Baraͤrssig vor jhm niderfuhl. Jch gewann nichts dran wie ichs macht/ ich verknipffts oder verspielts/ so kam man mir vbers Gesaͤß: doch schads nichts Lieben Kinder/ jhr werd nur groß daruon/ es vergeht euch wol biß jr ein Frawen nempt/ solch Nestel auffknipffen vnd Solue Ligulas verwart vor hoch auffknipffen vnnd Henckersknoͤpffen: besser gezabelt am Declinenden Scamno, als am Vndeclinenden Ligno/ so ein GalgenPfosten heißt.

(3) Wiewol/ meint jhr nicht/ daß der Gordisch vergurdtet Zweiffelstrick etwann ein Rhaͤters gewesen sey von seim Knopff im Bart: Dann ein Knopff an ein Furtz sah ich nie machen. Ja bei dem heiligē Bischoff Guͤrtelknopff zu Basel ich glaubs. <<563>>

(4) Derhalben mein Liebe Wamstknoͤpff/ auch jhr Wam̄stKnebel/ entknoͤpffet vnnd entknebelet mir diesen Meisterlichen Weberknopff: schneidet dapffer inn diesen zusamen gelegten Faden/ ich kan jhn wider gantz machen ohn Schaden: Aber trefft jhr mirs nicht/ so muß hie diser Keib zur Straff fuͤr alle ein Bastonata mit Knoͤpffen von Barfuͤsser Corden außhalten. Was darff es viel wesens/ sagt Gurgellantua/ Jch halt es sey nichts Lecherlichs/ es deitet auff den Lauff vnd die erhaltung Goͤttlicher Warheit. Bei dem heiligē Sanct Goderan/ sprach der Moͤnch/ was kodert jhr hie? diß kompt mit meiner Außlegung gar nicht vberein: Es ist des Propheten Maͤrlini Stylus vnnd Art zuschreiben: Jhr moͤcht die wichtigsten vnd ernsthaffsten Allegorien druͤber zu Marckt bringen/ die jhr wolt/ so halt ich meins theils/ kein anderer verstand sey vnder den gelesenen verzwickten dunckelen Worten darinn begriffen: Dann ein Beschreibung des Katzenspringenden Ballenspils oder Ballenspiligen Katzensprungs. Dann die Anstiffter zum Spiel seind die so sich Partheien/ welchs gemeinlich gut Freund seind.

(5) Wann die zwo Schasse vollbracht worden/ so seind auß dem Spiel/ der so darinn war/ vnnd der hinein kompt. Man glaubt dem Ersten/ welcher sagt/ ob der Ball vber oder vnder die Corden sey gangen. Der Schweiß ist das Wasser so anlaufft. Die geremßten Schnuͤr vnd Netz in den Racketen seind von Haͤmmel oder Geyßdaͤrmen gemacht.

(6) Die Runde Machina oder das Rund vmbwelbt Gebew ist der Ball/ darumb man so vnrhuͤwig <?> ist. Nach dem Spiel erfrischt man sich vor eim guten Fewer vnnd ziecht frisch Hembder an/ das ist an statt viel Badens/ gleich wie den Meidlin das <<564>> dantzen: Auch zecht vnnd Collacioniert man gern hernach/ aber die jenigen mit mehrerm lust/ so gewunnen haben. Nun gut geschirr/ wir woͤllens auch geniessen: Studiert nicht zu sehr/ dann die nichts koͤnnen die studieren: Euch aber ist schon geholffen/ jhr tragt den Ring schon am foͤrdersten Finger: Wie wann jhr den foͤrdersten inn den hindersten steckten? Habt mir nichts fuͤr ein Kuͤbel/ wann ich ein Brenckel bracht: Es gieng mir auch offt vbel/ wann ich die Feder ins Glaß stieß/ vermeynend ins Dintenhorn zustossen: Vita verecunda est, <?> Musa iocosa mihi. Welche am meisten von grossen streichen vnd vilem Bulen singen vnnd sagen/ die Thaten am wenigsten schaden.

(7) Jedoch/ soll vnnd muß ich dermal eins wider das fliegengeschmeiß ein Nasenschirm schreiben? Melius non tangere clamo/ <clamo,> Qui me commorit, tota cantabitur vrbe: Ja tota orbe, dann ich kan auch noch fuͤnff Sprachen ohn Schwaͤtzenschwaͤbisch/ das ist die sechßt/ heißt <?> Luͤgen. Aber nicht halb so wild/ es mags einer versuchen: Jm folgenden zweiten Buch will ich sie suchen: Es wird mir die Liberey zu S. Victor wol dienen inn die Kuchen: Auch Panurgi weiß/ vnd wider die Dipsodischen duͤrre duͤrstige Riesen die Reiß/ sampt den Zwerchen welche kamen auß Pantagruels Fuͤrtzen/ vnd den Frewlin Zwerchinnen/ welche auß seim Wasser theten rinnen: Auch werden mir sehr wol stehn zuhanden/ die new Zeitung von Teuffeln vnd den Verdampten/ sampt der Zung/ darmit Pantagruel/ <Pantagruel> ein gantz Hoͤr deckt/ vnnd was wunderlichs jhm inn dem Maul steckt. Hie woͤllen wir ein ander weisen/ daß man den Rabelais nicht vmbsonst ein Aristophanem hab geheisen: Jedoch also: mit dem geding/ Si mala condiderit in quem quis Carmina, Ius est (merckts jr Juri<<565>>sten) Iudicium%/que esto, si quis mala: Sed bona si quis Condiderit ^&c. Si quis Opprobrijs dignum latrauerit, integer ipse, Soluentur risu tabulae, tu missus abibis. O geb Vntrew Wein als die Reben/ wir wolten all Trincken vergeben. Nun wolan/ stirbt mir einmal ein Kuh/ will ich euch auch laden zu Gast darzu: Oder kompt jr lieber zum Speck/ so lad ich euch auch/ wegen Reimens/ zum Seumagen. Haben wir schon kein Gelt/ han wir doch gut Kleider/ das best Hembd hat kein Ermel. Hie heißts zur schmalen Wart/ da jßt man vbel vnd ligt hart/ etc.

F I N I S.

Win vß.