Gkl:text:kap26

Das Sechs vnd zwentzigst Capitel.

Wie Gurgellantula mit dermassen feiner zuchtlehrung vnnd Lehrzucht durch D. Lobkundum von Ehrnsteig ward vnterricht/ daß er kein stuͤndlin vergebens hinricht.

(1) ALS Kundlob von hohē Rhumsteg die vndietlichkeit vnd schaͤdliche weiß zuleben seines vndergebenen Gurgelmans erkant/ <<333>> ward er zu rhat jhn in studierung guter Kuͤnst anders anzuweisen. Aber vbersah es jm die ersten tag/ inn betrachtung/ daß die Natur die ploͤtzliche aͤnderungen wegen der gewaltsame/ on verdruͤßlichkeit nicht wol vberstehet vnd außhart. Derwegen solch sein vorhaben fuͤglicher ins werck fort zusetzen/ bat er ein Weisen Artzet derselbigen zeit/ genant Herr Theodor Lilgenkol oder Luͤllenkul (vom geschlecht des Ehrwuͤrdigen Latinzarten Herren Lilij, dessen der Priscianus vapulans Kautreckkodrisch wol gedencket) darauff bedacht zusein/ den Gargantubald auff bessere pfad zubringē: Er Cullingius etwas kluͤger/ doch nicht gluͤckhaffter/ als der Baur/ welcher ein heilige allgmeinhilffliche Purgatz seinen verlohrenen Esel zufinden einnam/ vnd denselben als er sich zu pfluͤtteren beim Zaun nidersetzet/ durch die Hurst ersahe: gieng gleich hin vn̄ ruͤstet jm ein Teuffelsbannige scharffe Purgatz von Anticirischem Helleborischem Nießwurtz zu/ gab jhm die ein/ vnnd reiniget jhm damit alle verruckung/ verschupffung/ alteration vnnd verkehrte disposition vnd vnwesenlichkeit des Hirns. Wundert euch diß/ es dundert noch schlaͤgt doch noch nicht. Es hat doch der Warsager Melampus (der also genandt ward von dem einen schwartzen fuß: dann als jhn sein Mutter Kindsweiß inn ein Wald ließ vertragen/ ward jhm inn der eil alles verdeckt ausserhalb eim fuß/ welchen die Sonn gar schwartz brante) derselb Schwartzfuß hat mit der schwartzen Nießwurtz/ oder Daubmaͤl/ des Koͤnigs Proeti vnsinnigen Toͤchtern wider zu recht geholffen/ vnnd die ein Tochter Huͤpschnaͤßlin darmit verdienet. Hat der nicht wol genießt/ so sagt jhm/ Gott helff euch. Was sag ich vom schwartzen Maͤl am Fuß? Carneades der Philosophus mit den langen <<334>> Negeln/ hat nimmer ein Buch anfangen zu schreiben/ er hat zuuor die schwartz Christierwurtz (welche die Narrē Christwurtz nennen) gebraucht. Darumb haben alle Wuͤrtzler vmb Bingen vnnd Mentz/ auch damals/ als Lingeculius fuͤr vnser Strotzgurgel das Recept macht/ die Clistierwurtz auff der Jngelheimer Heyd all ergraben vnnd zutragen muͤssen/ also daß es die Venediger/ denen mans hieuor Ruckoͤrbenweiß zugetragen/ sehr geklagt/ auch die Bingheimer Meuß/ so deren gelebt/ vor leid seidher gestorben. Nun mit disem Hirnhoͤlenborn bracht Kundlob zuwegen/ daß er alles das/ welchs er zuuor vnter seinen alten Lehrmeistern eingesogen/ vergaß/ gleich wie etwann der Musickuͤnstlich Meister Timotheus seinen Lehrjuͤngern that/ die zuuor von anderen Musicweisern vnderricht waren worden. Dann nicht weniger muͤh ist/ boͤse angenommene vnart abzugewinnen/ abzuziehen vnnd zuentwehnen/ als von Newem zu rechter weiß anzufuͤhren/ zugewehnen/ vnnd gute art zuentlehnen. Derhalben solches bekoͤm̄licher außzufuͤhren/ fuͤhret er jhm zu Gefehrten vnd Gesellen zu/ weise Leut/ alle die er da antreffen mocht: auß welcher beiwohnung er jnen aͤnlich zu sein oder vortrefflicher zuwerden/ auß eifer entzuͤndet/ noch großmuͤtiger ergeysteret vnnd hertzhaffter ermanet/ einen begirlichen gelust vnnd sehnliche begird bekam auff andere gestalt sein studieren anzurichten/ vnnd sich auch wol begabt von angearteter scharffsinne zuerweisen. Dann es jhm auch jetzund anfieng an die Bindriemen/ wie dem Hercule/ zugelangen: Da jm auff dem wegscheid Fraw tugend mit Buch vnnd Rocken/ vnnd Fraw Wollust/ mit Lauten vnd eim Weinkelch der Hurn in der Offenbarung bekamen/ vnd jede auff jhren weg jn bereden <<335>> wolt. [ABB] Derwegen solchen mut nicht vnder der Aschen erstoͤcket ligen zulassen/ sondern mit dem Blaßbalg strenger anmanung vnd vnablaͤßlicher uͤbung mehr auffzublasen/ richtet jm Kindlob sein studium auff ein semliche weiß an/ daß er nit eine tagstund vnnuͤtzlich verzeret/ sondern all sein zeit inn Schrifftgruͤndung vnd ehrlichen zu Weißheit foͤrderlichen kuͤnsten vnd uͤbungen zubracht. Also ward alleweil Gargantua dahin gewaͤnet/ daß er vmb vier vhren morgens erwachet. vnd vnder deß er sich mit eim helffenbeinen Straͤl/ von gantzen Helffanten zaͤnen zusammen gefuͤgt/ kaͤmmet/ vnd mit eim hoͤltzinen Reißbuͤrstlein das Haupt kratzet vnd rib/ laß man jhm etwas auß heyliger Geschrifft/ mit verstaͤndlicher prononciation durch einen jungen Knaben/ buͤrtig auß dem Land/ da man (Kompt <Kompt> jhr gruͤsset/ genannt Anagnostes: Darauff kondt er Gott des andachtiger anruffen: dann was der Mund annimpt zukauwen/ daran hat der Magen zudauwen. Was darff man viel <<336>> Bettgloͤcklein? seinds Puff oder Stoßgebettlein/ so gibt eins jeden anligen genug Notpuͤff vnnd Notstoͤß zum Gebett: derhalben behulff er sich nit der Gebettformular/ die heut ein jeder Cantzelstand vnd Predigstulbeschreiter zusamen klittert/ damit er auch wie ein Schwalbennest am Hauß/ an Doctor Geßners Bibliotheck oder ins Supplimēt zugeflickt werde: aber sie werdē mir im andern theyl zur Liberi noch wol bekommen/ vnd wird sie kein Lumroff schuͤtzen/ es sey dann ein frommul. Folgends gieng er zur heimlichen reinigkeit/ sich der natuͤrlichen daͤuungsmateri zuentladen. Demnach widerholet sein Preceptor was gelesen war worden/ vnnd legt jm die schwerverstaͤndlichsten puncten auß. Kehrten alsdan wider vmb/ vnnd besahen gelegenheit des himels/ ob er noch solcher gestalt/ wie sie jn den vorigen abend gemerckt/ geschaffen: Vund <Vnnd> inn was zeichen Sonn vnnd Mon denselben tag gang/ vnnd solche ohn die Noͤrnbergischen lebendigen Aeurlein/ vnnd ohn ein Vhrwerck im Moͤnster zu Straßburg: Allweil man diß vorhett/ vnder des war er angethan/ gestraͤlt/ vom Schuh biß zum hut/ außgebutzt/ geraͤuchert vnnd erlabt/ also das wann er nur gebeicht het/ wer er mit dem nechsten pergamenseligen in den Himmel gefahren.

(2) Hierauff repetiert vnd repliciert man die Lection des vorigen tags/ das er die nicht im SchulSack verligen ließ. Da recitiert ers außwendig: goß/ gruͤndet vnd gab vmb mehr verstands willen desselbigen etlich Exempel von fuͤrfallenden haͤndeln vnnd geschaͤfften/ die er oder andere practicirt hetten: Das weret etwan auff zwo oder drey stunden/ biß er sich gar außgeruͤst/ eingnestelt/ gefegt/ inn die Haͤnd gespeitzet/ die Stuͤmpff auffgebunden/ <<337>> außgebuͤrstet/ ersteubert vn̄ erblasen hett. Da kam man erst darnach auff den rechten butzē/ that jm die ordenliche Lection auff drey stunden. Noch <Nach> vollendung dessen/ giengen sie hinauß auff Ferripfatetisch/ conferierten vn̄ vnterredeten sich von einhalt der gehaltenen Lectur/ vnd fŭgten sich hiemit auff das gruͤn Bruch/ oder auff die Schweitzermatten/ die Reinisch Wisen/ vn̄ die Schwaͤbisch Au/ da spilten sie des Ballens/ sprangen der Roͤck/ stiessen der Boͤck/ des Handballens/ des vberkreyßschenckens/ der Grubenkinder/ des Rucksprungs/ des Haͤuschreckensprungs mit gleichen fuͤssen fuͤrsich/ des Jungfrauwurffs durch die Bein/ der Barr/ des Wettlauffs/ des einbeinigen Thurniers/ der Garnwind/ des Brennjagens/ der fuͤnff Spruͤng der weitest/ vn̄ anders/ damit sie eben so weidlich den Leib uͤbten/ als sie zuvor das Gemuͤt vnd die Seel geuͤbt hetten. Vnnd stunden solche Spiel jnen frey/ dann sie liessen dauon ab/ wann es jnen geful: Vnd hoͤrtē gemeinlich auff/ wan̄ sie vber den gantzē Leib vor schweiß tropfften/ wie ein Badschrepffer/ oder sonst ermuͤdet waren. Darauff trockneten/ wischeten vnd riben sie sich sehr wol/ zogen frische hemder an/ neue kleyder vber alte Filtzlaͤuß/ vnd gingen damit allegemachlich fuß fur <fuͤr> fuß zu hauß/ zusehen ob der Jmbiß fertig sey. Vnder deß sie nun warteten/ prachtē sie beredeter/ diuisierlicher/ Discurirlicher/ auisirlicher weiß die zeit zu/ mit erkuͤndigung vnnd erwegung allerley zeitung/ discutirung etlicher Antiquitteten/ erzehlung etlicher schoͤner Spruͤch/ die sie auß der Lection behaltē hattē. Welchs sie nicht lang tribē/ da fing sie der Herr Happetit von Darmstatt vnnd Eßlingen an zureiten: Satzten sich derwegen ordenlich zu Tisch. Zu anfang des essens laß man etwan ein Lustige Hystori von der alten <<338>> Dapfferkeit: Biß er ein Trunck Weins gethan hett.

(3) Alsdann/ wa es jm gefellig/ fuhr man inn der Lectur fort/ oder wa nicht/ fiengen sie an kurtzweilig sich mit einander zubesprachen/ vnnd gemeinlich zum allerersten nach form des Philosophischen Meusae, <Mensae,> oder der Plutarchischen Gastredē oder Zechkallung/ von krafft/ Tugend/ staͤrck/ eigenschafft vnd Natur alles dessen/ was jhnen zu Tisch auffgetragen ward: als von Prot/ Wein/ Wasser/ Saltz/ Speiß/ Fischen/ Frŭchten/ Ops/ Kraut/ Wurtzeln/ vnd wie solch stuck auffs gesundest vnnd nach dem Mentzischem Kochbuch zubereiten. Mit welcher Tischweiß er inn kurtzer zeit alle die oͤrter vnd allegationen/ so zu disen sachen auß dem Plinio/ Atheneo/ Dioscoride/ Polluce/ Galeno/ Porphirio/ Opiano/ Polybio/ Heliodoro/ Aristotele/ Eliano vnnd anderen/ so hie von etwas gedacht/ angezogen vnd gefunden werden/ kondt wissen/ vnnd ohn sondere muͤh ergreiffen: Pflegten auch offt/ meherer vergwissung halben/ die gemelte Buͤcher vber Tisch darzureichen. Dadurch er benante stuͤck also fein vnd vollkommenlich inn gedechtnuß behilt/ das damals kein Medicus war/ der halb so vil het verstanden als er. Darnach redeten sie wider von den desselben Morgens gelesenen Lectionen. Zu letzt endeten sie jhre Malzeit mit eim Catoniatconfect/ oder kuͤttenlatwerglin/ mit korkraut vermengt: da fieng er an ein weil seine zaͤn mit eim gespitzten Gribelspißlein vom Mastichbaum zusteuren/ seine hend vnnd augen mit frischem Wasser zuweschen/ vnd endlich mit etlichem <etlichen> schoͤnen Lobwasserischen/ Marotischen/ Mentzerischen/ Waldischen/ Wisischen etc. Psalmen vnnd lidern/ zu lob Goͤttlicher mildguͤte gemacht/ danck zusagen: Als nun diß fuͤr <<339>> vber/ trug man Karten auff/ nit zuspilen/ sondern vil hundert geschwindigkeiten/ kurtzweil vnnd neuwe fuͤndlin zu leren vnd zulernen: welche alle auß der Rechenkunst entstunden: durch welche angeneme weiß er ein lustneigung zu derselbigen zalkunst bekam: wie auch wol sonst viel ohn Karten/ wann sie nur vil gelts zuzalen hetten: O rimpffen lehrt fein rechenen. Vnnd also pracht er alle tag nach Mittag vn̄ nachtjmbiß die zeit auff das kurtzweiligst zu/ wie man auff Wuͤrffeln vnnd Karten erdencken mag. Auch verstig er sich inn derselben Plaͤtterkunst vnnd Augenrechnung also hoch/ daß er beides inn der Theoric vnnd Practic/ inn ertuͤrung vnd erprechung derselbigen vortreflich ward beruͤmt. Dann Tunstal der Engellaͤnder/ welcher weitlaͤufig davon geschriben/ selber jhm den Preiß <Preiß gab/> vnnd bekandt/ das er inn vergleichung seiner/ weniger darinn als inn Knifwendischer gab/ Frisischer/ <Knifwendischer/ Frisischer/> vnnd alter Britannischer Wallischer sprach verstand. Vnnd nicht allein inn deren/ sondern inn anderen Matemathischen Weißheißtkundlichkeyten <Weißheitkundlichkeyten> vnnd erfarungskuͤnsten nicht minder/ als inn Geometry/ Astronomy vnd der Music. Dan̄ inn dem er der verdaͤuung vnd Konkochsion seiner eingenommenen Speiß außwartet/ ruͤsteten/ vnnd Zimmerten sie daneben viel tausend lustige Jnstrument vnd Geometrischer Figuren: vbten vnd Practicirten also damit die Astronomysche Hauptregelen vnnd Canones: so gut als het sie Gamnitzer/ Apian/ Lescher/ oder sonst ein Eysenmenger von Weil entworffen. (4) Nachgehends hatten sie jhren mut Musicisch mit vier vnd fuͤnff stimmen zufiguriren/ auß allerlei Partes/ wie es Gernlachs Erben zu Noͤrnberg Trucken moͤchten: Vngefaͤhrlich wie die Baierisch <<340>> apell: oder sonst der Kaͤlen zu lieb/ die zuvben vnd zuentrostigen/ ein gut gesetzlin Bergreyen/ Bremberger/ Villanellen/ vnnd Winnenbergische Reuterliedlin zusingen/ zu gurgelen vnd im Halß Nachtigallisch zu dichten vn̄ zuvberwerffen: Vnd solchs wann sie mutig warn/ dann wann der Mut sigt| <sigt/> so singt man Mutsig nit Mutlig.

(5) Sv <So> viel die Jnstrument der Music betrifft/ so lernet er auff der Lauten spilen/ auf dem Spinet/ der Harpffen/ der Teutschen Zwerchpfeiff/ dem Polnischen Sackpfeifflein/ den Braunschweiger Hermele/ die sie inn die Aermel stecken/ der Cytthar/ dem Zincken/ den Posaunen: Aber die HarschHoͤrner vnnd Alpenhoͤrner sambt den Trommeten sparten sie zur andern zeit/ der Floͤten auff neun Loͤchern/ der Geigen/ des Hackprets/ vnnd der Sackebutte. Nach dem also die zeit angewendet vn̄ die verdaͤuung vollpracht worden/ Purgiert er sich des natuͤrlichen vnd jnnerlichen vberlastes: Fuͤget sich folgends zu seinem fuͤrnemesten Principalstudiren auff drey stunden/ oder ferner/ eins theyls sein vorgenommen Buch oder Matery außzufuͤren/ auch dann ein weil zuschreiben vnnd die Feder zufuͤren/ vnnd die alte Roͤmische/ so man die Lombardisch nennet/ Schrifft recht zu arten/ vnnd zuformieren. Deßgleichē auch ander Sprach Schrifften mit rechtem Schreiberischem grund zugestalten: Da wußt er was mit dem breiten theil/ was mit fleche der Federn zumachen/ wußt das recht vnnd Linck Eck der Feder/ jhr Spitz vnd Schneid/ wie die Fechter auff jrn Wehrn (dann die von der Feder geben gute Fechter/ vnd schirmen mit Federklingen vnnd Lemmerkengeln manchen auß dem Land) Er wußt wie die Rauten zumachen/ wußt das Quadrangels Zirckels Eck/ der Circuls flaͤche <<341>> gewunden/ auffgezogen/ verlaͤngt/ die selberwoͤlte/ die sichtige vn̄ vnsichtige Puncten: das geschweifft: das gebogen: das hol: die Schlangenliny: die Schneckenliny: die zerstreiung der Buchstaben vnnd jhr vergleichung/ er kondt die gelegte/ die gebrochene/ die Current Schrifft: die Versal vnnd Canon: Schier wie ein Dintenklitteriger GuldenSchreiber vnnd Schlangen zuͤgmaler/ als hets jn der Nef von Coͤlln/ oder der Neudoͤrffer vnd Prechtel zu Noͤrnberg gelehrt.

(6) Auff diß alles giengen sie auß/ vnnd mit jnen der offtgedacht Kammerjung Kampkeib/ sonst genant Gymnastes/ ein guter Federfechter/ der vnderwiß jhne in allen Ritterlichen vbungen sehr kunstfertig. Da schickten sie sich inn ein andern bossen/ verwechselten die Kleider/ hingen den Schulsack an ein nagel/ da schwang er sich zu Pferd/ da saß er auff ein vngesattelts/ ein gesattelts/ mit sporē/ ohn sporē/ auff ein licht Roß/ ein kuͤrißPferd/ ein Harttraber/ ein Hochheber/ ein Hochstampffer/ ein Sanfftzeltner: ein Jungfraudiener: ein Ren̄roß: da stach ers an: da mußt es traben: treischlagē: Rennen/ gengen: anhalten: Passen: Schreiten: heben: Haͤssiren: Zabelen: Galopen: Lufftspringen: Außspringen/ auflaͤnen: Schweiffen: hacken/ vber den graben vnnd wider heruͤber/ durchs Wasser vn̄ wider dadurch setzen: Schwimmen: Klimmen: vber den Pfal: vber die Schrancken: vber Eppelins Haͤuwagen: Albrecht von Rosenberg hat ein Roͤßlein/ das kan wol reuten vnnd traben etc. Eng in eim ring lincks vnd rechts vmbkehren: sich Zaͤumen: Sperren: Prangen: feldschreyen: Feldmuͤtig: Forstrutig: Vnd was dergleichen geradigkeit mit Pferden zutreiben ist. Doch prache man nicht vil Schaͤfftlin/ dann was soll diß Spißprechen/ diß <<342>> Rumpellantzen. Es ist die groͤste Narrheit die man erdencken mag/ wan ainer kompt vnd sagt: Jch hab im Thurnier: oder Scharmuͤtzel zehen Rennsper erprochen: ein Schreiner koͤnds auch thun: es ist auch ein handel fuͤr Schreiner Jnn der Faßnacht brechen die Fischer auch kolben Stangen im Schiffthurnier: es ist als wan̄ einer vermeint groß Fisch mit zufangen/ wann er etlich Algaͤuische Deller kan nach einander auff eim Finger oder an der Stirnen zerschlagen/ oder zwischen jedem Finger mit eim Deller Fuͤnff Nuß auff quetschen: Diß ist Affenwerck. Aber das ist Rhumswerd/ mit einem Rennspieß zehen seiner Feind nidergesetzt haben. Derwegen erlasen sie dafuͤr gute bewaͤrte/ starcke/ schwere/ gruͤne vnd dicke Rennstang/ damit rannten sie ein Thor auff/ zerspilten einen Harnisch/ stutzten an eim baum/ zersprengeten ein ring/ fuͤhrten inn eim Ritt sattel vnd man hinweg/ vnd trenten alle Pantzer: Vnnd diß alles von Fuß auff biß zur Scheitel beharnischt vnd bekuͤrißt. Sonst so viel das Pferdgepreng/ das trabschencken/ das libtraben/ das zanmdaͤntzelen: <zaumdaͤntzelen:> Vnd sonst solch Poppenspil zu Roß belangt/ kondt er/ wann ers gern that/ besser als ein anderer Reutersman/ also das der Pferddummeler vnd Roßbereuter von Ferrar ein Aff gegen jm zurechenen war. Fuͤrnemlich war er wol geuͤbt/ von eim Pferd auf das ander geschwind zuspringen/ das er kein Erd beruͤrt: Vnnd solche Pferd nannt man Desultorios/ Zu vnnd abspruͤngling: O hettens die gekroͤnten Pfauwenschwentzige helm inn der Sempacherschlacht gekent/ die Vnbeschnittenen Schweitzer hetten so vil nicht erlegt. Er kondt auch auff jede seit die glaͤn inn der faust haltē/ vn̄ fuͤren/ on stegreiff das Pferd besitzen/ ohn zaum vnnd zuͤgel das Pferd nach seim <<343>> gefallen leitē/ on sattel alle spruͤng/ es stiß den kopff zwischen die Bein/ oder warff die hinderste Fuͤß nach den Rappen/ außstehen: die staffelen hinauff/ den Berg hinab rennē/ den Schonbachischen Hirtzsprung thun/ rinn <inn> den Meyn sprengen/ die stiffel zu Noͤrenberg holen. Dann solche wagstuͤck sind krigsstuͤck/ die inn Schlachten vn̄ Streiten zu nutz kommen. Er macht ein feins schnabelschuͤhig S. Joͤrgen fuͤßlein/ kont ein Plappart vnverruckt ein gantzen tag vnabgesessen im Stegreiff fuͤhren: Kondt den abgefallenen Hut im rennen auffheben/ in vollem renn wie die Jrrlaͤnder ein Pfeil auß der Erdē ziehen/ vnd eim auff jhn geschossenen Pfeil entreuten/ saß fein lang/ doch daß ein Haß mit auffgereckten Ohrn zwischen dem Sattel vnnd dem Gesaͤß vnangestossen wer durchgeloffen/ wann er sich in Stegreiff stellt zustallen: Er kont wie ein Egyptischer Mameluckischer Gwardyknecht eim Gaul inn vollem lauff ein Sattel guͤrten: Postiern/ viel tag ohn ein Postkuͤssen: die Gaͤul zur Noht im Wagen auffrecht strack wie die Muͤller auff den Kaͤrchen regiern. Auff ein anderen Tag uͤbt er sich mit breit Beiheln/ als ob er inn der Mameluckenschul inn Egypten wer/ mit den Streitachßten/ mit Boͤmischen Hacken/ mit Wurffgewehr/ mit Vngarischen Streitkolben/ Fausthaͤmmern/ Harnischprechern/ Kutschen/ Knotsen/ Knebelspiessen/ Helleparten/ die er jhm alle so fertig inn der Hand ließ vmbher gehn/ lehrnet sie so kraͤfftig ansetzen/ so nutzlich anlegē/ so steiff halten/ daß er in Schimpff vnnd Ernst fuͤr den besten Ritter Passiret. Hub den schweren Cesthaͤndschuch hoch auff/ vnnd schlug jhn mit solchem geschrey nider/ daß einer vom ruff mehr als vom streich geschlagen ward: wurff Eisene Lantzen wie die alten Frisen: Ließ jhm/ wie der <<344>> groß Keyser Carl/ einen Kuͤrisser auff die Hand stehn/ vnnd hub denselben stracks mit dem einigen arm auff biß zu seinen achsseln/ vn̄ stellt jn darnach wider nider. Darnach schwang er den Reißspiß/ setzt jn gerad/ setzt jhn schrancksweiß/ schoß die Federspiß/ meyet mit den Fochteln zu beiden haͤnden/ focht mit den Degen/ stach mit den Rapiren/ durchstrich mit den Sebelen/ stupfft mit den Tolchen/ nun im Harnisch/ dann on Harnisch/ jtz mit Bucklē/ flugs mit Tartschen/ mit Schilten/ mit Rondelen/ mit Armgewundenen Maͤnteln vnd Kappen/ mit Haͤndschuhen/ ohn Haͤndschuh. Weiter lehrnet vnser Gargantuischer Wolffditerich von seim Gimnastischen Hertzog Bechtung/ wie zu Fuß einer zu Roß zubestehen/ wie mit vielen zu balgen/ wie mit zweien Rapiren zu schirmen/ wie die Knebelspieß vnderzulauffen/ die Baurenhebel abzuweisen/ die Stein zuschlingen werffen/ mit dem stahel zuschiesen/ zu Plaͤttelen/ Raͤdelen/ Ritschen auf den Reutschuhen: Bogenschiesen: wettlauffen: im kalten baden/ im Schnee wie S. Frantz vmbwaltzen/ Schneballengschuͤtz/ oͤpffelkrieg: wie die jungen Koͤnig in Franckreich sich uͤben: barhaupt im Winter reisen/ ein starckē Kopff zumachen/ damit er mit dem Arß ein Thor aufflauff/ so doͤrfft ers nicht außheben wie Samson die Statthor zu Gaza/ noch außwinden/ wie Grunbach die zu Wuͤrtzburg: er bekam sonst ein guten starcken Schedel/ daß er mehr dann neun Stirnschnallen mit Pantzerhaͤndschuhen eim gehalten hett: Ja Stirnboͤcket mit den Herman Leithaͤmmeln. Ein Adler het auch ein Moͤrschneck auff seim Schedel/ wie auf des kalen tropffen kopff entzwey geworffen. Man kont auch von jhm sagen/ wie einer vom Koͤnig Masinissa schreibt: kein Reg jn darzu bracht noch kaͤlt/ daß er sein Haupt je <<345>> decken woͤllt/ vnd war sein Leib so trucken doch/ als ob er all sein hitz het noch/ auch neuntzigjaͤrig gieng er so sehr/ daß er keins Rosses achtet mehr/ vnnd wann er ritt/ stieg er noch ab/ als ob er muͤd wer worden darab. Wer weiß/ er moͤcht vielleicht drab muͤd sein worden/ wie heut vnsere GutschenJungherrn/ daruͤber Marx Fucker inn seim Buch vom Gestud klaget/ daß seidher man auff die Gutschen gefallen/ man kein rechte ReutPferd mehr inn Teutschland ziehe. Aber es sitzt sich dannoch sanfft darinnen auff den Kuͤssen vnder eim Ledern Himmel: Es ist mir nur leid/ daß man jhnen zu lieb die Gleiß oder Wagenlaist nicht reformieret: es wird auch ein noͤtlichkeit sein/ auff naͤchsten Tag fuͤrzupringen/ auch beineben zuberatschlagen/ wie man moͤcht die alt Troianisch weiß auff den Bigis zustreiten/ wider anstellen. Vnder deß lehrt vnser Gargantobel ringen: schwingen: vertraͤhen: kaͤmpffen: Zilschiesen: den Schafft ziehen/ den Helm recht binden/ den Kuͤriß schrauben/ das Visier ablassen: Aber daß Baderisch vnnd Bechtungisch Messerwerffen/ Scharsach schiesen/ ließ er Sant Velten haben: Auch das Fischgarn kempffen/ vnnd oͤlgeschmiert ringen.

(7) Nachgehends lieff er der Barr/ der eyer/ des Hirtzes/ des Baͤrens/ des Schweins/ des Hasens/ des Repphuns/ der Roͤck/ des Fasanen/ sprang der Geiß/ sprang vber das Gaͤlglin/ klettert auff Maximilianisch oder Teurdanckisch/ der Gemsen/ spielt des grossen Ballens/ schmiß jn so wol mit den fuͤssen als faͤusten in die hoͤh: rang/ liff/ vn̄ sprang/ sprang/ lief vnd rang/ nit mit trei Passen ein sprung/ nit des hinckebincke Knapfuß/ nicht des Xockspringens/ <?> seit vnd rucksprungs/ noch des Boͤhmischē sprungs/ <<346>> noch auff eim Fuß schupffen: dann sein Abrichter Wolhinan sagt/ solche Spruͤng weren nichts werd/ noch etwas nutz im Krieg. Sondern in eim zulauff sprang er vber ein grabē/ an eim Reiffspiß schwang er sich vber alle pfitzen/ flog vber ein zaun/ ersprang ein wand/ lieff sechs schritt ein Maur auff/ vnnd erstig also ein Laden vnnd Fenster eines spises hoch/ also dz kein Hund sicher am Getter schlief. Schwam̄ inn vollem stram/ zur seiten/ die zwaͤr/ im kreiß/ auf dem rucken/ ein Liechtstoͤcklin/ mit gantzem Leib/ mit halbem/ allein mit den Fuͤssen/ allein mit den armen/ den einen arm vbersich streckend/ vnnd ein Buch darinnen tragend/ welches er vngenetzt vber den fluß pracht/ seinen Mantel inn den Zaͤnen nach ziehend/ wie Julius Cæsar inn Alexandria etwann gethan/ vnd wie die Spanier bei Muͤlhausen vber die Elb thaten/ schwam auff Tuͤrckisch vnterm Wasser/ wie die inn newen Jnsuln/ wann sie die Spanier fliehen: dorfft sich nit wie der groß Alexander in ein glaß schrauben lassen/ die Schaͤtz des Moͤrs zuerspaͤhen: stig mit gewalt inn ein zim̄lich groß Schiff/ mit einer Hand das Schiff/ in der andern ein stecken haltend: Hielt das Schiff mit den Zaͤnen/ wie jener Griech/ da jhm beide Haͤnd abgehawen waren: stuͤrtzt sich alsdann wider ins Wasser/ den kopff vor an/ spilt des Tauchentlins/ holt ein Pfenning darunter/ schloff vnter den Flotz/ saß auff den Flotz/ schwam auff dem Dielen/ buͤrtzelt vmb mit dem Dilen/ spilt wie der Walfisch mit den Tonnen/ sprang wie die Moͤrkaͤlber/ waltzt sich im Mur/ beschmirt sich mit kat/ wusch sich wider/ hing ein ploch an ein fuß/ vnnd schwum darmit: er hett sein Brot mit schwimmen koͤnnen gewinnen/ wie die Kinder inn Egypten am Nilfluß/ welchen man nit ehe das Brot gibt/ man werffs jhnen dann inn <<347>> mitteln stram/ daß sie inn den Nil darnach schwimmen muͤssen/ vnnd es im Maul holen/ wie vnsere Barbehund/ da muͤssens das Hembd vnnd den Mantel wie ein Tuͤrckischen bund vmb den kopff winden. Vnd warlich es thut den Egyptiern vonnoͤten/ dann weil der Nil staͤts nach dem Monliecht außlaufft muͤssen sie wol vō eim Dorff zum andern schwimmen/ wie die in Schweden auff Reiß vnnd Reutschuhen zusamen fahrn: welche/ wan̄ der weg sehr weit ist/ Ried vnd Moͤrbinssen hernach ziehen/ etwann vnderwegen darauff zuruhen: diß mußt Gargantzuwol alles nachthun: dann wann er oder seine Auffwarter etwas lasen oder hoͤrten/ das wacker war/ so mußt mans nach machen. Darumb thurniert er auch auff dem Wasser/ macht plasen vnd waͤllen hinden vnd fornen/ lieff am gestad vnd hielt den Haußrhat/ sprang vber die Prucken ab: darnach wider vber sein Schiff/ welchs der Fischer da anhieng/ auff das des Muͤllers Esel drein gieng vnd drinnen vntergieng/ auff daß man ein rechtfertigung drauß anfieng/ dasselbig wand er herum̄/ stieß es ab: schalt es: regierets: fuͤhrets/ praucht die naͤchst Stang fuͤr ein Steurruder/ tribs geschwind/ tribs lind/ inn strengem ablauff des strams/ wider den stram/ in der mit/ an dem vffer/ hielts im mittelen lauff auff/ mit einer hand leitet ers: mit der andern schirmet er vnd trib sein Affenspiel mit einem grossen Ruder/ wurff daß Netz auß/ stelt den Setzbaͤren/ schoß die Fischergere/ die Tridenten/ die trei Zaͤnig Elger/ die Fuͤscingabel/ <?> stellt Reuschen/ Angelt/ zog die Segel an/ stig die Seilleiter den Mastbaum auff vnd ab/ gieng auff den Zehen auff dem rand/ am bort/ auff der spitze: wickelt vnd wackelt: justiert vnnd richtet den moͤrquadrant vnnd Compaß/ widerstrebet dem Wind/ er ließ sich dem <<348>> Wind/ da band er das Nachsteurruder hoch/ da nider/ hie zog ers zur lincken/ dort zur rechten/ vnnd hett also sein flechten vnd fechten.

(8) Wann er auß dem Wasser kam/ lieff er inn alle macht den Berg hinauff/ bald ins Thal/ flugs wider hinauff/ erklettert die Baͤum wie ein Katz/ sprang von eim zum andern wie ein Eychhoͤrnlin/ oder wie die Jlophagi/ schlug die grosse aͤst herab wie ein anderer Milo: wußt die Tuͤrckisch geschicklichkeit sich von Bergen zulassen: soff wie die Masegetischen Teutschen seins Pferds Blut mit Milch ein auff das kalt Bad: Mit zweyen Meylaͤndischen Schweitzertoͤlchlin/ vnnd wolgestahelten Reuterboͤcken Klemmet er zum hoͤchsten Hauß hinauff/ wie ein Marter/ flog darnach so hoch wider herab/ mit solcher geschicklichkeit der Glider vnnd gleichwagung des Leibs/ daß er vom fall/ sprung oder Fußsatz inn keinen weg beschwert/ noch verruckt ward/ wurff breite Kiselstein am gestaden schlim̄s auffs Wasser/ das sie ob dem Wasser weiß nicht wie viel spruͤng thaten: warff vber alle Thuͤrn/ schornstein vnd Storckennest/ ja dem Storcken auff dem Nest ein bein entzwey/ warff stein mit der obern flaͤche des Fusses/ faßt stein zwischen die Zaͤhen vnd schlaudert sie/ wurff Stein hindersich wie die Pilger zu Mecha/ den Teuffel darmit zusteinigen: Ja wurff auch zum ziel wie die Cynischen Hundsphilosophi. Warff daß Englisch Beihel/ schlenckert den Spiß/ schlaudert die Stangen vnnd schweresten Rigel/ warff Leiter an vnd stig darauff/ warff Hacken an vnnd zog sich hinauff/ warff mit Bengelin nach der Ganß/ hefftet auff Saulisch den Spieß/ dartet den sparrē/ schoß zum zweck/ trug den schweresten Palcken auff eim daumen/ wie des Pompeij Gwardiknecht seine gefangene: ketschet einē baum <<349>> das er sich darunder buckt wie Simon vnter dem kreutz/ oder die Giganten/ da sie die Berg auff einander setzten/ stieß den stein/ viel schwerer als den Turnus dem Aenea nachwurff/ haͤtschiert mit der Hallenpart/ zog darmit wer den anderen von der statt reiß: wann er ein Seyl gefaßt hat kondens jm fuͤnff Kerles nicht auß der Hand zwingen/ wie des Keysers Valentinian Vatter Gratian/ so deßhalben der Seyler ward genannt: Er ließ jhm ein Ampoß auff die Brust setzen/ vnnd darauff Hemmern/ wie Firmus der Roͤmisch Regent. Er kont mit der Faust eim Roß die Zen einschlagen/ vnnd oben die Schenckel entzwey stossen/ vnnd mit beiden Henden ein Roßeisen von einander reissen/ wie der ReißEisen Keiser Maximin/ so Acht Schuh lang war: Ja kont wie der groß Keyser Karl (von dem es Bischoff Turpin schreibt) vier newer Huffeysen von einander reissen (aber nicht beissen) Kruͤmmet sich wie ein Spartiatischer Bub nit/ wann man jn schon schlug: O es gibt gut starck hart Buben/ die darnach die Folter vnd ein Strapekorden wol außstehn koͤnnen/ wie auch der Spartaner/ so den Gestolnen Fuchß vnder den Mantel versteckt/ vnnd jhm ehe die halb Seite wegfressen ließ/ ehe er schreien vnnd sich verrhaten wolt: Er stund auch offt vier Stunden inn nasser Kleydung/ der Kelte zugewonen: Er verschwur offt nicht zutrincken/ er schieß dann ein auffgehengten Angster von eim Haußhohen stangenbaum herab/ wie es die Holtzfloͤtzhendler bei jhrn Holtzmerckten/ oder die Wirt bei den Herbergen stehen haben. Gleich wie inn Balearischen Jnsuln die Muter dem Kind ein ziel steckt/ vnnd ein stuck Brots oder Schuͤssel mit Muß auffs zilholtz bindet/ welchs es nicht ehe essen dorfft/ es wuͤrffs dann am anstall herab/ Er spannt <<350>> von Freier sperriger hand des Herculis Armprost/ kruͤmmet den Tuͤrckischen Flitschbogen vber das Knie/ legt die Sennen an/ zog sie an/ ließ sie ab/ zielt mit der Buͤrstbuͤchssen/ legt sich hinder die Toppelhacken/ praucht Eßlingische Handror/ Gasconische Musceten/ Hispanische Muscatnuß auff gaͤbelen wischt vnd Pliß/ Pliß vnnd wischt/ ward einaͤugig/ damit ers zil reicht/ schoß mit Lumpen/ mit gekawet Papir/ mit Schroͤt/ mit Speck/ mit trei vnnd vier Kugeln/ mit toppelem Lot/ gestaͤlten Kugeln/ mit trippeler ladung/ halb zuͤndpulffer vnnd halb Ladpulffer/ schoß im ritt/ im tritt <tritt/> im lauff/ im sincken/ nach dem augenmaß/ im griff/ nach des Daumens absehen/ so gewiß als schiß er nach dem bestē mit einer Noͤrnbergischen geschraubten Buͤchssen/ die Neuner hettens jm auch zugesprochen/ schlug bald an/ zielt kurtz/ baut nit lang/ acht nit das Aermelpopperle/ truckt schnell ab/ hub nicht viel ab/ kont daß Geschoß wol stechen/ trang den anschlag nicht zu viel/ hielt recht auß/ verwart das Treff sehr wol: Richtet vnd vnderlegt das Feldgeschuͤtz/ zilet nach dem Zweckvogel/ schoß vom Berg zu thal/ auß dem thal gehn Berg/ fuͤrsich/ zur Seiten/ hindersich wie die Parthen/ vn̄ das Thier Beuasus, nach dem hoͤltzenen Zweckman/ nach dem kopff vnnd Latz/ mit dem Fewrstein/ mit der Zuͤndrut/ mit den Zuͤndlunten/ da waren kein faͤler/ eitel Treffer/ es wer im rechtē Berg oder versuchrein/ on quadrant/ ohn Sattelschlagen: kein Poͤltz giengen vberzwer/ sie Pfiffen dann: oder waren jhm versehrt vnd zerschossen: oder trugen zu weit auff die seit: man schwang jhm nimmer die Gaͤrten/ sie waren all vmbspringens vnnd auffschreibens werd: er schoß eim ein Pomerantzen vom Kopff/ wie Histaspes vnnd Wilhelm Dell den Apffel seim Kind/ schoß <<351>> eim ein Groschen zwischen den Fingern hin: Sein Geschoß war aller Ehrn werd/ dz mans mit trummen vnnd Pfeiffen aufftrug. Jm stechen verlor ers nimmer/ es wer dan die senn zerstochen/ verruckt oder zerprochen: oder das Schloß hett gelasen: oder ein Wind hett jhn angeplasen: oder einer hett jhn gestossen: oder der Stul wer verritscht: oder der Fuß wer ihm geglitscht: oder der Stand war vneben: oder hett was vmb das Jnbeyn geben: oder die Sen war zu lang: daß jhm der Schuß nidersanck: oder hett den Bogen gehengt: oder die Seul zersprengt: oder die Nuß war zu klein: oder der Poltz nicht rein/ oder einer neben jhm auffstund: oder die Nuß gieng nicht vmb sehr rund: oder die Wind wer vberrungen: Oder das Beyn abgesprungen: Oder hett zu vil eingeleimet: oder den Poltz nicht recht eingereimet: oder daß schloß nicht gehangen: Oder jhm zweymal war gangen: Oder war jhm zu Hart: oder der Bock zu krumm: Oder der Pfeil zu stump: oder das Geschoß zu groß: oder die wartz jhm abschoß: oder der Treff nicht recht kam/ oder der Windenschlupff jhm entkam/ oder der Windfaden gewichen/ oder die Nuß entzwei gestrichen/ oder der Poltz hett sich gestrichen/ oder het das messen vergessen/ oder das Reißbein gieng jhm auff (dann er besorgt sich nit/ daß er sich im bart raufft) oder des <das> Zuͤnglin kroch vnnd hieng/ oder ein feuchter lufft gieng/ oder der berg waͤr zu weich/ daß der Poltz zu tieff hinein schleich/ oder giengen die Federn ab/ oder der windfad ein streich gab/ oder die sen̄ erließ sich/ oder vergieng jhm das gesicht/ daß er zuweit ins windloch sticht/ oder het jm zuviel herab geprochē/ oder das gesicht verstochen. Oder bey der Buͤchssen hat er nicht wol gewischt/ oder das Puluer het gepflischt <<352>> oder der schuß versagt/ oder jhn verwagt/ oder nit recht eingeraumpt/ oder der <den> filtz versaumt/ oder dz Puluer wer zu feucht: oder das futertuch zu leicht: oder der schwā nit prent: oder die Son̄ plent: oder daß schloß war verruͤrt: oder hett nit vor der kugel gschmirt: oder der han schlug nit ein: oder felet schmaͤr: das ist gut wein: oder het den schuß verschufft: oder hets auff die buͤchsen trufft: Solche mengel verwireten zuzeiten vnsern jungē schuͤtzen: die klagt er seim hoffmeister: der sagt jm hinwider solcher faulen außreden muͤsig zustahn. Dan gewiß wann der jaͤger kompt vnnd sag. Wer daß nit gewesen etc. so pringt er keinē Hasen: des Nisi kondt ich nie geniessen. Vnnd weiter sprach er/ wie kein kunst ist bey eim guten Wein wol leben/ vnnd eym frommen weib nachgeben/ mit einer guten Feder wol schreiben/ vnnd auß gutem flachß gut Garn treiben. Sonder bey eim schlimmen Wein/ auch froͤlich sein/ vnnd mit eim boͤsen Weib/ leben ohn keib: Also ist kein kunst mit gutem geschoß vnnd geschraubten oder gezogenē Buͤchssen wol schissen/ sondern auß jeder/ wie selsam sie auch sey/ das schwartz zutreffen wissen. Dann was sind das fuͤr faule schnacken/ daß man sagt/ man hab zuviel am backen/ oder die buͤchß hab gestossen/ oder das Feur hab jhn erschreckt <erschreckt/> O Glockengeck/ daß dich der erst streich nicht erschreck: Bist Haͤrings Art/ stirbst vom Plitz/ oder Krebsart/ stirbst vom Donner| knall: So verkriech dich auch wie die Krebß/ Foͤrchst nicht: wanns Tonnert/ ein Tron werd vom Himmel fallen? Weist nicht das schrecklich laut kecklich/ vnnd kecklich ist schrecklich. Die Gethischen voͤlcker/ wanns donnert/ Schossen sie inn all macht mit Pfeiln dargegen/ dem Jupiter solchen trotz zuwehren/ seine rumpelende steinfaͤsser vmzukern/ <<353>> wie vnsere kugelklem̄er heut mit grobem geschuͤtz thun: Heut haben die Leut meher als ein Loͤēmut ja vber Basiliscenmut/ dan̄ die Loͤē foͤrchten ein Hanengeschrey/ die Basiliscen ein geraͤusch vom Wisel/ aber die Menschē nicht dē Feurspeiendē/ Puluerscheissenden vn̄ Salpeter furtzendē hoͤllēfund/ vnd das Praßlend erschuͤtterē vnd erzitterend Praßlend Teuffelsgeschrey. Ja sie jagen mit den Puͤchssen Proͤllen/ dē Teuffel noch mit seinē Hechssen auß der Lufft in die Hoͤllen/ Ja Schisen sie bey totzend herab: Daß sie wol bey vns hie vndē bleibē muͤssen/ auß sorg man schieß sie wider heraber: daher kompts dz die Leut nit mehrr <meher> des Ton̄ers: noch Erdbidems achtē/ ja schier dē Juͤngstē Tag gar verachtē/ dieweil er im Feur soll kom̄en. Also daß Granich recht schreibt/ Han̄ibald mit seinen Ochssē/ welchen er feur vn̄ stro zwischē die hoͤrner legt/ Pyrrhus mit seinē Elephanten/ Alexander mit seinē hoͤltzinē raͤdergengigē thuͤrnē/ Antiochus mit seinē hauenden hackenkarrē/ Caesar mit seinē Feurigen Bergablauffendē faͤssern/ wird heut die Leut so wenig schreckē/ als lieff einer mit nassen Stroschauwē gegē jhnen: dan̄ sie fuͤren heut nicht mehr Staͤtt vm̄ die Berg/ sonder Berg vm̄ die Staͤtt/ geleytē Moͤr darumb/ ja grabē abgruͤnd darum̄: Allweil mā die Suͤndflut besorg/ bauet mā vff die Berg: heut da mā die Suͤndbrunst besorgt/ bauet mā inn die tieffe in̄ die Wasser: vn̄ hilfft doch so vil als es mag/ steigt schon kein Troianisch Roß hinein/ kom̄t doch etwā ein Goldbeschlagener vn̄ goldbeladener Esel darein/ oder schießt Guldē Kettē hinein/ oder schickt Bestechgold in eim Faß mit Wein. Aber dz Hurrlebausisch geschuͤtz hat dannoch ein Weck vff in die andacht gebracht/ vnd die Leut gar Heiligenehrsam gemacht: Dan̄ wie fallē sie nur so demuͤtig nider/ wan̄ S. Peters oder S. <<354>> Marx/ oder eins andern Heiligen begevatterter Maurbrecher inn tonnerender gestalt vom Berg Sina mit jhnen das Gesatz redet/ also daß mancher vor Welterstorbener demut vergißt auffzustehn/ wie die Moscowiter Legaten/ die den kopff zur ehrerbietung wider die Erd stossen. O wie bucken sich die Koͤnigische vor dem Roschellischen Euangelio/ vnnd die Jngolstadische vor dem Protestantischen verbo/ vnd die Tordesillische Junckern vor des Bischofs Gweuare Zamorischen Pfaffen geweiheter Kreutzbuͤchß/ der kondt sie Beicht hoͤren/ vnnd also gefirmt par gen Himmel schicken/ O wie lieffen die Maͤuß vor dem Frantzoͤsischen geschuͤtz auß Terowan/ vnd zu Quintin liessen sich die Ratten zwen Monat nit sehen/ vnnd starben vor schrecken/ vnnd die Hasen lieffen im Land Luͤtzelburg auß den Hecken. Derhalben vnerschrocken/ fehrt Sant Johans Kugel inn dich/ so bist wol vor dem Teuffel gesegnet. Schreibt doch Lemnius inn seyner verborgenheit (die doch heut jeder mag lesen) die Lantzknecht inn Flandern vmb Tornay haben mit puluergestanck die Pestilentz weggeschossen: diß war ein besser Meisterstuͤck als Hippocratis/ der die Waͤld deßhalben anzuͤndet/ oder eben disses Lemnij/ da er mit gestāck gebranter Abschnidling von Leder vn̄ Hoͤrnern die Pest wolt vertreibē/ als ob die Leut die Baͤrmuter hetten. Ach neyn/ es hilfft nicht ein jeden das Lorberkraͤntzlein fuͤr den Donner/ wie Keiser Tiberium. Es regnet nicht wann die Bauren auff Steltzen gahn/ es hat aber geregnet <geregnet.> Vnnd Claus Narr sagt/ daß seyen die besten Schuͤtzen die faͤhlen/ denn sie schiessen niemand tod.

(9) Man hieng bißweiln vnserm Durstgurgeler zu oberst eins Thurns/ ein groß Kamelseyl an/ das <<355>> biß vff die Erd reichet/ an demselben haspelt er mit beiden Haͤndē hinauff/ darnach fuhr er widerumb so gewaltig vnnd gewiß herab/ daß einem das Gesicht darob vergieng. Man richtet jm einen grossen Gabelgalgen auff zwischen zwen Baͤum gesperret/ an demselbigen hieng er sich mit den Haͤnden an/ vnnd fuhr daran herumb vnnd herwider/ wie ein anderer muͤrber braten am Spiß herumb/ daß er mit dem Fuß gar nichts beruͤhret/ so starck war er inn den Armen: Er kondt auch auff eim Arm auff ein Stock sich steuren/ daß der Leib wie ein Kauffmaͤnnische Bilantz inn der Wag stund. Auch auff daß er das gebuͤrst <gebruͤst> vnnd geluͤng exercieret/ schrye er wie tausendt Teuffel/ wie die Schifleut vber Rein/ als ob er im Heckelberg seß. Jch hab jhn einmal gehoͤrt/ daß er seim spießjungen Wolbeiart von Sanct Vitorsporten biß zu Montmartre ruffet/ vnnd inn der schlacht wider die Hutzelbutzen/ auff dem Lechfeld hort man jhn schreyen biß gehn Langweit/ etwas neher als das Geschuͤtz vor Metz. <Metz/> welchs man vber Rein Teutsch Laureto oder Lor gehoͤrt hat. Der beruͤmbt Stentor hett lang kein solche stim̄ inn der schlacht vor Troi/ noch Demosthenes/ der stein inn mund nam vnnd am Moͤrvfer in den Wind ruffet/ als ob jhm der Halß ab wer/ damit er das R außsprechen lehre. Auch seine Glider vnnd Adern mehe zusteiffen vn̄ inn seiner staͤrcke zuerhalten/ worden jhm gemacht zwo grosse Bleiene Kugeln/ groͤsser als die Margraff Albrecht inn Franckfort geschossen/ ein jede acht tausent/ sibē hundert Quintalpfund wigend/ welche er Alteratzen vnd Zuckander nennet. Dieselbe nam er von der Erden inn jede Hand/ hub sie inn die hoͤhe vber den Kopff/ vnd hielt sie also vnverwendet drey viertheil Stund/ vnnd wol noch <<356>> mehr/ welchs ein vnnachzuthunige staͤrck ist. Spielt mit den Glingstangen/ Sperrbaͤumen/ Handspacken vnd Sperrlingen: riß mit den aller staͤrckesten. Vnnd wann es zu dem fall kam/ stund er so fest auff den fuͤssen/ daß er sich eim jedē Waghals außbot/ wa er jhn von der stett ziehe/ wie vorzeiten faustbeheb Milo that: Nach dessen Exempel pflegt er ein Granatapffel inn die Hand zunemmen/ vnnd schanckt jn dem/ der jhn jhm auß der Hand kondt bringen. Mit diser weiß gewoͤhnet er sich/ daß er nicht alleine staͤrcker ward/ sondern mit der staͤrcke auch juͤnger: wie Koͤnig Masinissa/ der durch gleiche weiß sich erjunget wie ein Adler/ daß er auch neuntzigjaͤrig einen Son erzielet: vnd kont 14. tag Postlauffen.

(10) Wan er also nun die zeit hat zugebracht/ vnd sich getrocknet/ geriben/ gewischt <gewischt/> gefrischt/ vnd die Kleider geendert/ zettelt er allgemach wider heim/ nam den Weg durch etliche lustige Wisen oder andere krautbare Oerter/ da hat er sein Gesprech von Feldbaulichen Sachen/ von des Liebalti Meyerhof/ erfragt der Bienen Policei vn̄ Regement/ <Regiment/> erwog/ wie Stigelius an eim jeden kraͤutlin Gottes fuͤrsehung/ besichtiget/ vnd ersuchet etliche Baͤum vnd Kraͤuter/ die heut etwas zweifels haben/ vnd hielt sie gegen der Alten Buͤcher/ die dauon geschriben/ als Theophrast/ Dioscorid/ Marin/ Plinius/ Nicander/ Macer vnd Galen: trugen auch der simplicien hand voll zu hauß: welcher ein junger Knab/ Rhizotomus genant/ vd' <von> Wuͤrtzburg buͤrtig/ warten mußt mit Hackengraben/ Schaufelen/ Sichelen/ Karstlen/ Rattenkloen/ Spaden/ Hebzapffen/ Jettauen/ <Jetthauen/> Grabstickeln/ Eggezincken/ Gerthauen/ Hippen/ Pickeln/ ZaͤnGaͤblin/ Gerteln/ Bindmessern/ Hagmessern/ Haͤplin/ Raupenhecklin <<357>> vnnd anderm Gartnerszeug/ wol zuarborisieren/ vnd zuherbieren/ zupflantzen/ zubeltzen/ zuversetzen/ zuschripffen/ zujetten vnd den baͤumen zuschneutzen/ zubeschneiden/ zupfrupffen/ zuschroͤten. So bald sie nun heim kamen/ erholten vnnd sinnschoͤpfften sie etlichs was zuvor gelesen war worden/ alleweil man das essen zurichtet/ vnnd sassen damit zu Tisch. Hie solt jhr mercken/ daß er sich von dieser Disciplin auch vber Tisch bessert: Dann seine Mal waren nuͤchtern/ maͤßig vnnd sparsam/ sintenmal er der Speiß nur genoß den widerspennigen aufflauff des Magens zustillen: aber das Nachtmal war gemeinlich etwas fluͤssiger vn̄ weitleuffiger: vnd also solls sein: darumb haben die Alten das Nachtessen allein fuͤr ein recht Mal gehalten/ den Mittagjmbiß zu acht Vhren nur fuͤr ein Morgensupp: daher kompts daß man sagt: Ein Abend ist froͤlicher dann vier Morgen. Was auch der Troß anderer vieler vngehoͤfelter vnerbeutelter vnd schuͤpiger Artzet in der Sophisten Werckstatt abgerollet vnnd gewalblochet im gegentheil halten vnd rhaten. Vnter des man nun aß/ ward die Lection zum Morgenjmbiß angefangen/ vnnd als lang es jhenen gefellig vollzogen. Die vberige zeit ward mit guten gelehrten vnnd nutzlichen reden zugebracht. Nach dem nun der Tisch auffgehaben/ vnnd Gott vmb seine Gaben danck gesagt gewesen/ da fieng man widerumb an Musickartlich zusingen/ auff zugestimpten Jnstrumenten zuspilen/ quatuor, trium, Muteten/ Vilanellen/ etc. oder die kleine kurtzweilchen auff Karten/ Wuͤrffeln vnd Prettspiel vorzunemmen: Vnd dabei bleiben <blieben> sie mit grossem lust vnnd gutgeschirrig/ vnnd uͤbten sich zuzeiten biß sie die stund zuschlaffen scheidet. Bei weilen besuchten sie gelehrte belesene <<358>> Leut/ wolgeschickte Versamlungen/ Historicos, Poëtas, die einen vnsterblich machen koͤnnen/ entweders Jambisch oder Heroisch/ Dann Carmen amat quiquis <quisquis> carmine digna gerit: Wer Lobswuͤrdig kan thun vnd beweisen/ der liebet die so einen koͤnnen loben vnd preisen. Oder sie besprachten Leut/ welche frembde Laͤnder gesehen hatten.

(11) Jnn mitteler Nacht/ ehe sie sich zur ruh begaben/ giengen sie zuvor an das lufftigste ort/ welchs offen vnnd frey stund/ des Himmels wesen vnnd enderung zubeschauwen/ vnnd da gaben sie acht auff die Planeten/ Cometen/ Figuren/ leger/ gelegenheit/ Aspect/ ansehen/ Oppositzen/ vnd conjunctionen des Gestirns. Darauff recapitulirt/ vnnd vberschlug er kurtzlich auff Pythagorische weiß mit seinem Lehrweiser alles was er die gantze Tagzeit durch gelesen/ gesehen/ erfahrē/ gehoͤrt/ gethan vnnd vernommen hat. Ja er trutiniert sich auch vnnd legt sein Leben vnnd wandel desselben Tags auff die Wag des Vergilischen Vir bonus ^& sapiens, ^&c. Wann du dich legst zu sŭsser rhu/ vnnd dir woͤllen gehn die augen zu So denck zuvor ein jede nacht/ Wie du den tag habst hingebracht vnd was daselbst weiter folgt.